1 Kol 11 - Musamu Wamubwete 2013

¹ Beenee minsombisiri mya me, bunu bu nyikwesombosolo me se Kiristo.

Mubakala na mukyeetu ha busu bwa Mfumu

² Me nyilusiika bu lukootsiminaa me mu myominso, na bu luri lwakebe kikulu bunu bu nyalutubukiri kyo.

³ Ngo me ntiiri ti beenu luyaaba, ti Kiristo ngo mfumu mpisi wa mubakala; mfumu wa mukyeetu ngo wa mubakala; mfumu Kiristo ngo Nzaambi.

⁴ Mpisi mubakala wusaambila, bunu pe wubikula kuri mutu wafuka, lo wahele kukiinsa mfumu yaandi.

⁵ Mpisi mukyeetu wusaambila, bunu pe wubikula kuri mutu wahele kufuka, lo wahele kukiinsa mfumu yaandi, bukuri lo nde wuri bwobumosi na kuri watebe kungulu.

⁶ Mbuti mukyeetu wahele kufuka mutu, lo hemese katebe mfu. Ngo mbuti diri dyansoni, kuri wa mukyeetu mu kuba kuri watebe mfu bunu pe wuri na kungulu, lo hemese kafuka mutu.

⁷ Wa mubakala ngo wuri, wahele kuyelemene mu kufuka mutu, bukuri nde ngo kifwaani na nkeembu ya Nzaambi; kasi wa mukyeetu, ngo wuri nkeembu wa mubakala.

⁸ Bukuri, kari wa mubakala wapalila mu wa mukyeetu ko, ngo wa mukyeetu wapalila mu wa mubakala;

⁹ na kari wa mubakala bari bayirika mu ntoono wa mukyeetu ko, ngo wa mukyeetu bari bayirika mu ntoono wa mubakala.

¹⁰ Hango-nkuumbu, wa mukyeetu yelemini kuba na kidiimbu kya lutumu ha yulu mutu, mu ntoono bambasi.

¹¹ Ngo kasi, mu Mfumu, kuri wa mukyeetu ko kwahele wa mubakala, na kuri wa mubakala ko kwahele wa mukyeetu.

¹² Mukwongo, bunu buri wa mukyeetu wapalila mu wa mubakala, bunubwo se wa mubakala wabutuka mu wa mukyeetu, na byobinso byafumuna kuri Nzaambi.

¹³ Beenu-meene yirikee kutala: buri lo bwabubwete ti wa mukyeetu kasaambila Nzaambi, kuri mutu wahele kufuka?

¹⁴ Buri nsi yo-meene yahele kuluyikisa, ti diri dyansoni kuri wa mubakala mu kuba na mfu dzadzila,

¹⁵ kasi wa mukyeetu, mbuti wuri na mfu dzadzila, lo yiyo nkeembu kuri nde? Bukuri nde bamuheeri mfu dzadzila bunu kitambala.

¹⁶ Ngo mbuti kuri muutu wutii kusa nkalikisi mu mimyo, lo beetu twahele na kifu kikyo, na mabuundu ma Nzaambi se mahele na kifu kikyo.

Ndiilu yangisi

¹⁷ Mu myeki kwiisa mi, me nyahele kulusiika, ngo nyiri na misamu mya kululeele, bukuri beenu bu lukookutukunaa, kari mu kuyirika mibvuriri bubwete ko, ngo kasi mu kuyirika mibvuriri bubi.

¹⁸ Dyatete diri, me nyiri mu kuyukaa ti, beenu bu lukookutukunaa mu dibuundu, lo ha kakati dya beenu hari nkabunu; me nyitsima ti musamu wunde kampe wangwanwa.

¹⁹ Mukwongo, nkabunu se yiyelemini kuba ha kakati dya beenu, mpisi heki bakuma mu nsindukulu, bamonoko ha kakati dya beenu.

²⁰ Ngo beenu, bu lukookutukunaa ha kimosi, kari byandya bya Mfumu lukoodya ko;

²¹ bukuri mu ntaangu ya kudya, muutu-muutu wutekisilaana kudya byandya bya nde-meene, na wamosi bu kari na nzala, wakaka wakolo malu.

²² Buri beenu lwahele na manzo ma kudiila na ma kunwiina? Hoti beenu dibuundu dya Nzaambi luri mu kwesaana, na nsoni luri mu kudzusaa bahele na kitotolo? Me nyiluleele ti kwe? Nyi lusiika? Me nyahele kulusiika mu mimyo.

²³ Mukwongo, me nyataamburi kuri Mfumu, mimyo mi nyiri nyatubula kuri beenu ti: Mfumu Yesu, mu butsuku bu baba muyekele, nde waholo mpa

²⁴ na bu kabvutula matoondo, wabukuna yo na waleele: «Yimayi ngo nyutu yaami, me mpeeri mu ntoono beenu; seenee bumabu mu kubambukila me mwooyo.»

²⁵ Nde wasa bunubwo se mu mbasa, kamana kudya, waleele: «Yimayi ngo mbasa ya lulelusunu lwamoono, mu makila maami; seenee bumabu mpisi ntaangu yi lutsiitsa kunwa yo, mu kubambukila me mwooyo.»

²⁶ Mukwongo, mpisi ntaangu yilutsiitsa kudya mpa yimayi, na kunwa mbasa, lo beenu luyaabisaana lufwa lwa Mfumu natee ku kakwiisa.

²⁷ Hango-nkuumbu, mpisi wunde wudya mpa, bunu pe wunwa mbasa ya Mfumu kwahele kuyelemene, lo bakiri kibila mu nyutu na mu makila ma Mfumu.

²⁸ Ngo mpisi muutu, kafyongokono mu mutima waandi, tumi kadya mpa yi, na kanwa mbasa yi,

²⁹ bukuri wunde wudya na kunwa kwahele kufyongokono nyutu Mfumu, lo wuri mu kudya na kunwa mutsuundu mu nde-meene.

³⁰ Mu didyo, ha kakati dya beenu, hari bangaa-bipfuumi na babeeru, na balaka na balaka, bamwaafwa.

³¹ Mbuti tufyongokini mitima myeetu, lo tuba batsuundusu ko.

³² Ngo tubaanaana twatsuundusu kuri Mfumu, lo turi basuunguku, mpisi bahele kutukesele mukanu kintwaari na nsi.

³³ Mu didyo, bampaangi baami, lubaanaana lukutukini mu kudya, lo kingisineenu beenu na beenu.

³⁴ Mbuti muutu wuri na nzala, lo kadya ku nzo, mpisi luhele kukutukunaa mu kubwa mu mutsuundu. Mu misiiri ngo miri, me sa nyirika ha nyikwiisa.