Matius 25 - Alkitab Duri

Pangpasusian sangpulo ana'dara 25:1-13

¹ Mangkada omi Puang Isa nakua, “Ia ke ratu pole'na' tee Aku', Anak Mentolino, wa'ding dipasangrapang tee curita sangpulo ana'dara mbawa palita male la ntammui tobotting muane.

² Lima ana'dara bango', na lima ana'dara macca.

³ Ia to lima bango', mbawai palita, apa ci'di'ra minynyakkana.

⁴ Na ia to lima macca, buda ia minynyak nabawa.

⁵ Apa mela'i ratu to tobotting muane, marojami na sileppengan tuu lako ana'dara.

⁶ Ia tonna tangngamo bongi, metamba-tambami to tau nakua, ‘Jiomi mai to tobotting muane! Tammuimi!’

⁷ Mi'cokmi joo sangpulo ana'dara, na pada mpasadia palitanna.

⁸ Nakuamo joo lima ana'dara bango', ‘Benkan ci'di' tuu minynyakkami, la bosimo tee palitangki'.’

⁹ Mebalimi tuu lako ana'dara macca nakua, ‘Te'da kilampangbenni, nasaba' te'da dau naganna' kipake. Male kamu' nnallii.’

¹⁰ Malemi joo lima ana'dara bango' nnalli minynyak. Ia tonna malemo, ratumi to tobotting muane. Ia joo lima ana'dara macca mentamami pangmaroasan sola tobotting muane, nadisalli' to bola.

¹¹ Mane'ri ratu joo lima ana'dara bango'. Metamba-tambami nakua, ‘Oo puang, timbakanpakan bolata'.’

¹² Apa mebalii joo tobotting muane nakua, ‘Te'da lalo kuissen kamu'!’ ”

¹³ Natampakkimi Puang Isa joo pangpasusian susi tee, “Iamo joo, majaga kamu', nasaba' te'da mikalannaii to karatuan-Ku'.”

Pangpasusian tallu pangjama 25:14-30

¹⁴ Nakuapa Puang Isa, “Ia ke ratu pole'na' tee Aku', Anak Mentolino, menjaji Puang la jaji susi lan tee pangpasusian. Den mesa' tau la male sompa'. Ia tonna te'dapa namale, ntambaimi kaunanna la napabarakkanni sininna ewananna.

¹⁵ Pada diben doi' nadangkanganni situru' pakullena. Den to diben lima talenta, den to diben dua talenta, na ia to laenna diben mesa' talenta, namane' male sompa.

¹⁶ Ia joo kaunan to diben lima talenta, ta'pa malemi ndangkanganni, nasumaro manglokkon penduan.

¹⁷ Susi todami joo kaunan diben dua talenta, nasumaro too manglokkon penduan.

¹⁸ Apa ia joo kaunan diben mesa' talenta, maleri ngkali padang, nalamunni joo talentana puangna.

¹⁹ Ia tonna masaimo, polemi joo puangna, natambai to kaunanna, nasaba' madoangngi la nnissenni to sarona.

²⁰ Ia joo kaunan diben lima talenta napapolemi menjaji sangpulo talenta. Namangkada nakua, ‘Oo puang, takitai, lima talenta tabenna', nasumaro lima talenta.’

²¹ Nakuamo joo puangna, ‘Gaja kassing tuu panggaukanmu! Natatta' makassing to penawammu lako aku'. La kupabarakkanniko to la'bih matonggo, sanga wa'dingko dikatappa'i moi na panggaukan biccu'ra. Malemoko mai, taperasai kamasannangan sola!’

²² Ratu todami joo kaunan diben dua talenta namangkada nakua, ‘Oo puang, takitai, dua talenta tabenna', nasumaro dua talenta.’

²³ Nakuamo joo puangna, ‘Gaja kassing tuu panggaukanmu! Natatta' makassing to penawammu lako aku'. La kupabarakkanniko to la'bih matonggo, sanga wa'dingko dikatappa'i moi na panggaukan biccu'ra. Malemoko mai, taperasai kamasannangan sola!’

²⁴ Ia joo kaunan diben mesa' talenta, ratumi namangkada nakua, ‘Oo puang, kuissen kumua kita'mo tau masa'ga'na. Mpeburaiki' apa tangngia pantananta', na nnala bangki' kita' to tangngia assele' pangngambohta'.

²⁵ Iamo joo kumalera llamunni do' litak to talenta tabenna', nasaba' malaja'na'. Inde'mi kupapoleanki'.’

²⁶ Mebalimi joo puangna nakua, ‘Ee, ikomo kaunan ganjangna sipa'mu na kuttuan! Muissenmo kumua, mpeburai bangna' tangngia pantananku', nnala toona' assele' tangngia pangngambohku'.

²⁷ Ia ke susii joo, la mupatamari bang joo talentaku', na ia ke polemo' kualai sola bunganna.’

²⁸ Nakuanmi to kaunan laenna, ‘Alaii joo talenta, ammibenni joo kaunan to nnampuimo sangpulo.

²⁹ Nasaba' ia to todenmo naampui, la dibenpa la'bih buda, na kala'bian pissen. Apa ia to tangnnampui apa, ia to apa ci'di'mora naampui la dialai pissen.

³⁰ Ia joo kaunan tangmakkeguna, ca'beanni lako ngenan kaminang malillin. Ntuu jio nanii kumarrak sola sunggarigi'!’ ”

Puang Isa mbicara ke kiama'mi lino 25:31-46

³¹ Mpatarruhhi kadan-Na Puang Isa nakua, “Ia ke ratu pole'na' Aku', Anak Mentolino, sola sininna malaeka'-Ku' mpupangngarrang kamala'biran-Ku', la cumadokkona' jao cadokkoan mala'bih, angkumangparenta susi Raja.

³² Sininna bangsa lan lino la dipupennolo lako kale-Ku'. Kumane' mpangduai ngenanna susi to tomangrewa mpasisarak bembala' na beke.

³³ Ia to bembala', iamo to tompugauk pakkaeloran-Na Puang Allataala, dipangmesa jio sa'de kanan-Ku'. Na ia to beke, iamo to totangmpugauk pakkaeloran-Na Puang Allataala, dipajio sa'de kairing-Ku'.

³⁴ Mangkai joo too kukuamo lako to jio sa'de kanan-Ku' kumua, ‘Malemo kamu' mai sininna to tonabarakka'i Ambe'-Ku' Puang Allataala. Mentamamo kamu' kaparentan-Ku' to nang dipasadiamo sipamulanna lino.

³⁵ Nasaba' ia tongkutangbarah, mibenna' kande, na ia tongkumawakke, mibenna' wai diiso'. Ia tongkumentoratu, te'da mikita tolaenna'.

³⁶ Ia tongkutangmebaju, mibenna' baju. Ia tongkumasaki, mijaranaina'. Ia tongkuditarungku, ratu kamu' ngkitana'.’

³⁷ Mebalimi tuu lako to jio sa'de kanan-Ku' nakua, ‘Oo Puang, umbora wattu antatangbarah, kibenki' kande, ba'tu mawakkeki', kibenki' wai diiso'?

³⁸ Umbora wattu antamentoratu, na te'da kikita tolaenki'? Umbora wattu antatangmebaju, kipakeiki'?

³⁹ Umbora wattu antamasaki, kijaranaiki', ba'tu ditarungkuki', kimale ngkitaki'?’

⁴⁰ La mebalina' kukua, ‘Sitonganna kukuan kamu' kumua, ia to mipugauk lako tee mai to kupusile'to, moi namakario-rio, battuananna mipugauk lako too Aku'.’

⁴¹ Mangkai joo too kukuamo lako to to jio sa'de kairing-Ku' kumua, ‘Ee, kamu' to ditampakki ropu, palai kamu' ntee! Mentama kamu' api naraka dukku te'da cappa'na, to dipasadianmo Ballisi' sola tuu lako malaeka'na.

⁴² Nasaba' ia tongkutangbarah, te'da mibenna' kande. Ia tongkumawakke, te'da mibenna' wai diiso'.

⁴³ Ia tongkumentoratu, te'da mikambaroina'. Ia tongkutangmebaju, te'da mibenna' pakean. Ia tongkumasaki sola ditarungku, te'da mijaranaina'.’

⁴⁴ Mebalimi tuu lako to jio sa'de kairing-Ku' nakua, ‘Oo Puang, wattu umbora antatangbarah ba'tu mawakke ba'tu mentoratu, ba'tu tangmebaju, ba'tu masaki, ba'tu ditarungku angkitangnjaranaiki'?’

⁴⁵ La mebalina' kukua, ‘Sitonganna kukuan kamu' kumua, ia to te'da mipugaukki lako tee mai to kupusile'to, moi namakario-rio, battuananna te'da mipugaukki lako kale-Ku'.’

⁴⁶ Ia tuu lako tau susi joo la disessa te'da cappa'na, apa ia to tompugauk pakkaeloran-Na Puang Allataala la diben katuoan melo te'da cappa'na.”