Matius 10 - Alkitab Duri

Puang Isa mpilei sangpulo dua rasulu' 10:1-4

¹ Natambaimi Puang Isa to sangpulo dua anak gurun-Na sirempun, nabenni kuasa nnula'i setang, na mpamalagah mangrupa-rupa sakinna tau.

² Ia to sanganna joo sangpulo dua rasulu'-Na Puang Isa susi tee: Simon (ba'tu Petrus) na Andreas to sile'tona. Namane' dua anakkana Zebedeus, iamo to Yakub na Yahya.

³ Sitarruhna Filipus, Bartolomeus, Tomas, Matius to passassung, Yakub anakkana Alfeus, Tadeus,

⁴ Simon tobarani, na Yudas Iskariot to undinna mpangpejokkoan Puang Isa.

Puang Isa ssua anak gurun-Na male mpangpeissenan Kareba Kasalamatan 10:5-15

⁵ Nasuami Puang Isa joo sangpulo dua anak gurun-Na, napasanni kumua, “Danggi' mimale lako bangsa tangngia to-Yahudi, moi lako to-Samaria.

⁶ Apa male lako manda kamu' to-Israel, nasaba' susimi to bembala' sala lalan.

⁷ Pauanni kumua cingga'tu'mora naratu Puang Allataala mangparenta susi Raja.

⁸ Pamalagahhi to tomasaki sola tomasolak, patuoi to tomate, ula'ii to setang. Ia tee diben bangra kamu', iamo joo la mipangben bang todari.

⁹ Ia ammimale, danggi' mibawa doi' bulawan, ba'tu salaka iarika tambaga.

¹⁰ Danggi' too mibawa sepu', ba'tu baju duang lambah, iarika sapatu ba'tu tekken. Nasaba' ia to tomangjama, sipato' ntarima sarona.

¹¹ Ia ke ratu kamu' lako mesa' kota ba'tu kampong, angahhi tosipato'na la minii torro jio sanggemmi male pole' mpatarruh kalingkanmi.

¹² Ia ammimentama bola la mikua, ‘Dennaa upa' nabarakka'i kamu' Puang Allataala.’

¹³ Ia ke natarima melo kamu' joo ampu bola, ia joo pangbarakka'mi la torroi lan joo bola. Apa ia ke te'da natarima melo kamu', ake'mo na pole pole' joo pangbarakka'mi lako kalemi.

¹⁴ Ia ammiratu lako mesa' bola ba'tu kota, na te'da natarima kamu' to tau jio, iarika tangnapesa'dingngi kamu', salai joo bola ba'tu kota, mipentambakanni to carepa jio ajemi.

¹⁵ Ingaranni! Ia ke Kiama'mi lino, la'bih nasessai Puang Allataala to tau lan joo kota na ia to to-Sodom na to-Gomora.”

Danggi' mikalaja'i to tompakario-rio kamu' 10:16-25

¹⁶ Nakuan pole' omi Puang Isa to anak gurun-Na, “Pesa'dingngii! Kusua kamu' male susi bembala' mentama tangnga serigala. Iamo joo la macca kamu' mbawa kalemi, mimaruruh.

¹⁷ La majaga kamu', nasaba' la dijokko kamu', ammidipangngolo lako tomangra'tah kara-kara. La dirambi kamu' lan bola passambajangan.

¹⁸ La dipangngolo kamu' lako tomangparenta sola raja, nasaba' mituru'na'. Iamo joo wattu la minii mpangpeissenanni to Kareba Kasalamatan lako tuu lako tau, sola totangnnissenpa Puang Allataala.

¹⁹ Apa ia ammidipangngolo, danggi' miselang kumua apara la mipau, ba'tu umbo la mikua mebali. Nasaba' la dipauan kamu' apa to la mipau joo wattu.

²⁰ Jaji tangngia kamu' la mangkada joo wattu, apa Roh-Na Ambe'mi Puang Allataala mpupangkada kamu'.

^21-22 La nakaba'ci kamu' buda tau, nasaba' mikatappa'ina'. Na la jaji susi tee, tomassile'to mpangpebunoan sile'tona. Susi toda ambe' lako anakkana. Anak nnewa tomatuanna, napangpebunoanni. Apa ia to tomatappa' tarruh ratu lako ssalainna lino la dipasalama'.

²³ Ianna pakario-rio kamu' tau lan mesa' kampong, palai kamu' lako kampong laen, nasaba' sitonganna Aku', Anak Mentolino, ngkuan kamu' kumua, ‘Te'dapa napura to kota jio Israel milelei, kuratu pole' keanu'.’

²⁴ Ia to mesa' passikola te'da nala'bih matande na gurunna, susi toda to kaunan te'da nala'bih matande na puangna.

²⁵ Ganna'mi ke passikola pada gurunna, na kaunan pada puangna. Ia ke nasangana' tau Beelzebul, puanggawana setang, apa pole'pi kamu' to tonturu'na' la'bih-la'bih la gaja' sangammi.”

Puang Allataala ia to sipato' dikalaja' 10:26-31

²⁶ Nakua pole' omo Puang Isa, “Danggi' mimalaja' lako tolino, nasaba' te'da to membuninna tangladipangpekitan, na te'da to dibunianan tangladipangpeissenan undinna.

²⁷ Apa to kupauan kamu' ke bongi, la mipau ke allomi. Na apa to kupangbisikan lako kamu', la mipetamban jio pangbudan tau.

²⁸ Danggi' mimalaja' lako tolino to batang kale manda nakulle nabuno, apa te'da nakullei mbuno penawammi. Puang Allataalara to sipato' mikalaja', nasaba' ianna mangka mbuno kamu', makuasapa Ia mpatamai naraka to batang kalemi sola penawammi.

²⁹ Mesa'ra de'pen allinna ke dua denah, apa moi mesa' te'da nakullei mate, ke te'da napuelohhi Ambe'mi Puang Allataala.

³⁰ Susi toomo moi beluak jao ulummi mangkamo dibilang ngasan.

³¹ Iamo joo danggi' mimalaja', nasaba' la'bih keangga' kamu' na ia to denah!”

Nnakui ba'tu mpessakkanni Puang Isa 10:32-33

³² Mpatarruhpa kadan-Na Puang Isa nakua, “Ia to tonnakuina' jio olona tobuda kumua tomenturu'i lako kale-Ku', la kuakui todai jio olo-Na Ambe'-Ku' jao suruga.

³³ Apa ia to tompessakkannina' jio olona tobuda kumua, te'da namenturu' lako kale-Ku', la kupessakkanni todai jio olo-Na Ambe'-Ku' jao suruga.”

Kasiewalian nasaba' Puang Isa 10:34-39

³⁴ Nakuapa Puang Isa, “Danggi' misangai kumua ratuna' mbawa kasikalinoan tama lino. Tangngia kasikalinoan to kubawa, apa kasiewalianra.

³⁵ Ia to karatuan-Ku' napusaba' anna anak muane nnewa ambe'na, anak baine nnewa indona, na anak mamintunna baine nnewa indo matuanna.

³⁶ Pada kamu' tosangbola la siewa tarruh.

³⁷ Inda-inda to la'bih mpakamoja' tomatuanna na Aku', tangsipato' menjaji taung-Ku'. Susi toomi to la'bih mpakamoja' anakkana na Aku'.

³⁸ Na ia to tocia' mpassan kaju sitambenna na nturu'na', tangsipato' menjaji taung-Ku'.

³⁹ Ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na.”

Barakka'na to ntarima melo taun-Na Puang Allataala 10:40–11:1

⁴⁰ Mpatarruhpa kadan-Na Puang Isa nakua, “Ia to tontarima kamu', padamo to Aku' natarima. Na ia to tontarimana', padamo to ntarima Puang Allataala to ssuana'.

⁴¹ Ia to tontarima nabi, sanga tonasuai Puang Allataala, la llolongan barakka' susi nabi. Na ia to tontarima tomanggauk melo, sanga tomeloi, la llolongan barakka' susi tomanggauk melo jio mai Puang Allataala.

⁴² Ia to tompaiso' sala mesa'na tee todikita majiong, nasaba' naturu'na', moi wai lino bangra, ingaranni kumua, la llolonganni barakka'.”