Kada Bulawan 6 - Alkitab Duri

Mangrupa-rupa pangpakainga'

¹ Ee anakku', ia ke denni mujanji padammu rupa tau ba'tu mpangngakui mbajaran indanna to tote'da musiissen,

² napojamoko kadammu, natumangko timummu.

³ Apa susi tee to carana muwa'ding la'pah, nasaba' nakuasaimoko joo tau: maleko lako musuju' jio olona mpeta'da tonganni, nala'paranko jio mai janjimmu.

⁴ Danggi' mangtorro-torro ba'tu mamma' jolo'.

⁵ Pangngattai tonganni nala'paranko joo to munii mangjanji, susi jonga la mella'pah jio mai poja ba'tu susi manuk-manuk la mella'pah jio mai ba'tikan.

⁶ Ee tomakuttu, kitai to lintik, mupelajahhi to apa napugauk mumacca.

⁷ Ia to lintik, te'da tonnatoro'i, te'da tomparentai, te'da tombandoro'ii,

⁸ apa rrempunni kande ke wattu peparean naden nakande ke wattu karorian.

⁹ Ee tomakuttu, la mamma' bangrokoka, piranra mulami'cok?

¹⁰ Ia mandara mupugauk to cingga'tu'-cingga'tu' mamma', cingga'tu'-cingga'tu' maroja, mangkoko kalepak na cingga'tu'-cingga'tu' mbambangan kale.

¹¹ Ia ke ia manda mupugauk to susi joo, la makaasi-asiko butung to dirampai, na te'da apa muampui butung to narampo' tosibawa balili'.

¹² Te'da bua'na na gaja' panggaukanna to tomale melako bang mangnguraga,

¹³ na mangkidi' mata sola mpupangkae' ajena na mangjillok-jillok mangngara la mangnguraga.

¹⁴ Mangnguraga manda llan penawanna to mangngatta bang mpugauk kagajatan, na umbo-umbo nanii mpaden bang kasisakkan.

¹⁵ Ia ngasanmo joo panggaukan gaja'na ncilakaii, nata'pa rratuii abala', naancuru' lalo, na te'damo nadikulle mpemeloii.

¹⁶ Den annan panggaukan to gaja Nakaba'ci Puang Allataala, iarika pitu sipa' to Nasanga gaja mecarepan:

¹⁷ mata ngkita majiong padanna rupa tau, timu mangkada tangtongan, lima papatean lako totangsala,

¹⁸ penawa mangngatta bang mangpanggaukan gaja', aje matika' male mangpanggaukan gaja',

¹⁹ mukkun bang sa'bi tangtongan, mpaden bang kasisakkan llan alla' soba'na.

Pangpakainga' danggi' manggauk sala

²⁰ Ee anakku', parinawa meloi to apa napatujuanko ambe'mu, na danggi' mukalupaii to pangpakainga'na indomu.

²¹ Tuli ingaranni kadanna tomatuammu butung mupurara' jio kollongmu.

²² Ia to sininna pangpangngajahna la mpakitanko lalan kameloan, naampaiko ke mamma'ko, napangngingaranko ke mi'cokko.

²³ Ia joo sininna nasuanko tomatuammu mpugaukki butung palita ssuloiko na susi arrang nnarrangngiko, na ia to pangpakainga'na mpatujuko lako lalan katuoan melo.

²⁴ Iamo mpamambelako jio mai baine sala kedo, sola jio mai passedena bainena tau.

²⁵ Danggi' napakacinnako kamaloloanna, danggi' nale'ke'i penawammu to kamaballoan matanna.

²⁶ Ia to baine bandarang wa'ding dibajah allian sangpiring kande, apa ia to manggauk sala sola bainena tau, wa'ding ntumang sunga'.

²⁷ Denraka ia tau mpatama api kocikanna, na tanglangkandei api to bajunna?

²⁸ Denraka ia tau lumingka jao kuaro na tanglamangla'po to ajena?

²⁹ Susi toomi joo to tomanggauk sala lako bainena padanna rupa tau, te'da nalala'pah jio mai pangsessa.

³⁰ Ia ke denni tau boko moi sangpiringra nande, nasaba' tangbarahhi, nang la te'da naangga'i tau.

³¹ Na ia ke diampa'i boko, nang la nabajahhi manglokkon pempitu, iamo la ncappu'i ewananna.

³² Ia to muane manggauk sala lako bainena tau ssolangan kalena naliwa' bango'.

³³ Na nnampa' pangsessa sola pangcacca jio olona tobuda na te'da pajana masiri'.

³⁴ Liwa' magalli muanena joo baine, nasaba' mapa'dik penawai. Te'da lalomo asse penawanna ke membalahhi.

³⁵ Moi apa disedeanni te'da namadoang, moi pira budanna apa dibenni te'da namparadan kamagallianna.