Kada Bulawan 31 - Alkitab Duri

Pangpangngajah lako Raja Lemuel

¹ Susi tee to naajaranni indona Lemuel, to napau pole' Lemuel, raja jio Masa,

² “Ee anakku', to kupellao doangan naden kujajian. Apara tuu mupugauk anakku'?

³ Danggi' lalo mupaboro-boro kamawatanganmu ba'tu mpake sala wattummu sibawa-bawa baine. Budamo raja nasolangngi baine sala kedo.

⁴ Ee Lemuel, ingaranni! Te'da na sipato' to raja mpubiasan mangngiso' anggoro' iarika tomangparenta ngkadoangngi pangngiso' mepamalango.

⁵ Danggi' napangngiso' melangoan, na te'damo naingaranni to atoran, na te'damo namaruruh mpugaukki to sipato'na lako todipandasa.

⁶ Iara ben pangngiso' melangoan to tolalanynya', na tomasussa penawanna.

⁷ Ake'mo namangngiso' dikua nakalupaii to kamakaasi-asianna na te'damo naingaranni to sussana.

⁸ Pangkadanni to sininna totangnakulle mpangkadan kalena. Pangngewanni to sipato'na natarima tomasussa.

⁹ Pangkadananni to todipandasa sola tokaasi-asi, ra'tah maruruhhi to kara-karana, benni to sipato'na natarima.”

Baine kemuanemo to macca

¹⁰ Masussa diampa' to baine macca nnurusu' repokkona, la'bih keangga' na paramata.

¹¹ Nakatappa'i muanena, nakebarakka' to muanena.

¹² Melo penawanna lako muanena, te'da naden namangpanggaukan gaja' ratu lako matena.

¹³ Marajin nnangah rami sola bulu bembala', na maringngan lima njamai.

¹⁴ Nnangahhi kande nabawai lako bolana, susi kappala' wai mbawa kande jio mai kampong mambela.

¹⁵ Malillin unapa nami'cokmo mpasadian kande tau llan bolana, napada mpabarakkannii jaman pangjamana baine.

¹⁶ Nnallii padang to nakabudai, na assele' limanna natanannii anggoro' to bara'bahna.

¹⁷ Mpemandikkii sa'wakkana na mpemawatangngi limanna mangjama.

¹⁸ Na naissen kumua ia to assele'na napusaro, mandalan bongipi namane' paja mangjama.

¹⁹ Ntoe gintiran naunuhhi to bannang tama padati.

²⁰ Malaboh lako tokaasi-asi nakabudai mangpangbengan lako tomakario-rio.

²¹ Te'da namalaja' ke wattu macakke', nasaba' napasadian jolomo baju makamban to repokkona.

²² Ia kalena ngkabua' ampahna jio mai bulu bembala', ia to pakeanna sigaja kassing dikabua' jio mai kaen lenan makudara'.

²³ Todiangga' to muanena llan kasirempunan tomatua-tua llan kampong.

²⁴ Ngkabua'i pakean jio mai kaen lenan nabalukki, nggaragai pessaqwak nabalukki lako pangdangkang.

²⁵ Kamawatangan sola kamala'biran butung napubaju, na te'da napuselangngi to wattu la naoloi lako.

²⁶ Ia to kadanna mepamacca, mangkada malamma ke mangngajahhii.

²⁷ Marajin mangjama, na gaja mparinawa jaman llan tananan dapohna.

²⁸ Nakuanni anakkana kumua, “Tomasannang tee indoki',” napujii muanena.

²⁹ Nakua muanena, “Buda baine to macca, apa te'da ncau' maccako.”

³⁰ Ia to lindo macanning wa'ding bang mepakena, na ia to kamaloloan te'da bua'na, apa ia to baine ngkalaja' ngkasiri' Puang Allataala, nang la sipato' dipuji.

³¹ Benni balahna to sininna panggaukan melona, ake' na panggaukan melona nadipakala'bih jio ngenan kasirempunan!