Kada Bulawan 3 - Alkitab Duri

Pangpakainga' lako tomalolle'

¹ Ee anakku', danggi' mukalupaii to kuajaranko. Tuli ingaranni to parentaku'

² dikua mumalambeh sunga', namanyaman katuoanmu.

³ La mupusipa' to mamase mupusipa' tooi to dikatappa'i, mupallan penawa tonganni butung to mupurara' jio kollongmu.

⁴ Ia ke mupugaukki susi joo, napakamoja'ko naangga'ko Allataala sola padammu rupa tau.

⁵ Palantuk tonganni penawammu matappa' lako Puang Allataala, danggi' mupattuan kamapahanganmu.

⁶ Pakkaeloran-Nara Puang Allataala la muturu' namaruruh to lalan katuoanmu.

⁷ Danggi' musanga bang kalemu macca, la ngkalaja' ngkasiri'ko Puang Allataala mupaboko'i penawa to panggaukan gaja'.

⁸ Ia ke mupugaukki susi joo, butung pejampi mpamalekeko.

⁹ Passompanni ewananmu to melona sola pamula assele' jamanmu tandana mpakala'bihko Puang Allataala,

¹⁰ na sakerangngan-rangnganna to ewananmu susi pa'pak diissi saponno-ponnona, ba'tu susi wai anggoro' lempah llan mai busu.

¹¹ Ee anakku', danggi' mucia' ntarima pangpangngajah-Na Puang Allataala, na danggi' too pumarossoi to pangpakainga'-Na.

¹² Nasaba' ia to to-Napakamoja' Puang Allataala, Napangngajahhi ke salai susi mesa' ambe' mpangngajahhi anakkana to napakamoja'.

¹³ Maupa' to tomemmacca na memmapahang,

¹⁴ nasaba' la'bih keangga' to macca na ia to pera', na la'bih keangga' na ia to bulawan,

¹⁵ na la'bih makeangga' na ia to nnampui paramata. Sininna to mukadoangngi muampui te'da mpadanni to macca.

¹⁶ Ia to kamalamberan sunga' pole jio mai lima kananna, na kasugiran sola kadianggasan pole jio mai lima kairinna.

¹⁷ Napangngujuko lako katuoan kamasannangan, napatujuko lako lalan kamanyamanan.

¹⁸ Kamaccan butung garonto' kaju mpaden katuoan lako tonnampuii, napumasannang tompentoeii.

¹⁹ Puang Allataala mpake kamaccan mpajaji lino, na kamapahangan-Na mpatiballahhi to langi' jao ngenanna.

²⁰ Mpake-I kapaissenan-Na mpatosso mata wai jiong tasik natitaleh, Namparatu uran jao mai saleu'.

²¹ Ee anakku', la mupubiasan to mangpikkiri' melo sola matarruh mangpikkiri', ingaran rampa'i joo.

²² Susimi joo la mupugauk mumalambeh sunga', na susi rara' llan kollongmu to la'bih mpamaloloko

²³ mumanyaman male lumingka na te'da mutitodo.

²⁴ Ia ke la mamma'ko te'da mumalaja', manyaman mamma'mu.

²⁵ Danggi' mumalaja' ke denni abala' ratu tangdikalannai, danggi' mumalaja' ke denni kamacilakan ngkanna togaja',

²⁶ nasaba' jio-I sa'demu Puang Allataala, rrui'ko jio mai to nanii poja abala'.

Pangpakainga' mangpanggaukan melo

²⁷ Danggi' mumangdoppa-doppa mpugauk kameloan lako tomparallui pangtulungan na mukulle una mpugaukki.

²⁸ Danggi' mukua lako padammu rupa tau, “Polemoko jolo' masawapa muratu pole' kubenko,” na sitonganna den muampui to wa'ding ta'pa mubenni.

²⁹ Danggi' na den llan penawammu la mpugauk kagajatan lako padammu rupa tau, nasaba' te'da nakabataiko to tomusolan torro.

³⁰ Danggi' mumassipura punala bang lako padammu rupa tau na te'dara namangpanggaukan gaja' lako iko.

³¹ Danggi' pangngimburui assele'na tomaparrang, danggi' turu'ii to sipa'na.

³² Nasaba' Nakaba'ci Puang Allataala to tomajekkong, apa Napusoba' to tomaruruh penawanna.

³³ Natangdoi Puang Allataala to issi bolana togaja', apa Nabarakka'i to issi bolana tomakassing.

³⁴ Nacapa' Puang Allataala to topacapa', apa Napakamoja' to tompamajiong penawanna.

³⁵ La ditaratte' to tomacca, apa tangdiangga' to tobattuk.