Kada Bulawan 24 - Alkitab Duri

–19–

¹ Danggi' mupangngimburuii to togaja', danggi' mumadoang sisoba'.

² Ia manda llan penawanna to la mpandasa tau, na sipangkada umbo nakua la ncilakai tau.

–20–

³ Ia to bola, dipake'deh situru' kamaccan, nadipemawatangngi kamapahangan.

⁴ Na ianna den kapaissenan, tantu ia to sapa' llan bola la diissi parewa makeangga' na makassing naponno.

–21–

⁵ La'bih makuasa to tomacca, na samawatang-watangna to topaissen.

⁶ Ia ke mangngattaki' parari dipesa'dingngi to pangpatuju, sabuda-budanna tomangpakainga' nang den kapataloan.

–22–

⁷ Te'da nakullei tobango' mpahangngi to macca. Kamma' bang ke mukkunni to tau mbicara sininna kara-kara parallu.

–23–

⁸ La disanga toparicu to tompangngattai bang panggaukan gaja'.

⁹ Ia to akkalan bango' mpaollong dosa. Nakako'do' tau to topacapa'.

–24–

¹⁰ Ia ke ka'tu rannuko ke mperasaiko parri', battuananna tomalammako.

–25–

¹¹ La'paranni to todipattantumo la dipatei, pasalama'i joo todigararakmo male lako ngenan la dinii mpateii.

¹² Wa'ding bangko mangkada kumua, “Tangngia issenku' joo.” Apa Puang Allataala to nnuji penawa na Naissen to issi penawa. Puang Allataala to njagai penawammu na Naissen to llan penawammu. Napabalahhii to tolino situru' panggaukanna.

–26–

¹³ Ee anakku', melo to nniso' canik, macanning to canik to'do tama anga',

¹⁴ susi toomi joo, dipumelo to macca. Ia ke maccako, la melo to katuoanmu to la muoloi lako, muampa'i to murannuan.

–27–

¹⁵ Danggi' mususi togaja' to mesa' penawa la mbokoi tomakassing, narampaii to bolana.

¹⁶ Moi napembuda melolin to tomakassing, nang la ke'deh pole'i. Apa la ancuru' nakanna abala' to togaja'.

–28–

¹⁷ Danggi' mupumasannangngi ke macilakai to ewamu, danggi' mupumarioi ke melolinni,

¹⁸ dikua danggi' Nakita gaja'i Puang Allataala joo panggaukanmu, na te'damo Nasessai joo ewamu.

–29–

¹⁹ Danggi' mumabirih lako tomangpanggaukan gaja', danggi' pangngimburuii to togaja'.

²⁰ Nasaba' te'da narannuan to togaja', susi palita bosi apinna.

–30–

²¹ Ee anakku', ngkalaja' ngkasiri'ko Puang Allataala na raja. Danggi' mukaturu'-turu' lako tonnewa Puang Allataala sola raja.

²² Wa'ding ta'pa silalona macilaka to tosusi joo, sanga tangdicapa' to abala' Naparatu Puang Allataala sola raja.

Denpa ba'tu pira-pira pangpakainga'

²³ Den tomacca mangkada susi tee: Te'da nawa'ding mangpasilaenan to tomangra'tah kara-kara.

²⁴ Ia to tomangkada lako togaja' kumua, “Te'da nasala to panggaukanmu”, la natangdoi sola natampakki ropu tau jio mai sininna bangsa.

²⁵ Apa la dibarakka'i to tomangra'tah, ke napasala unami to tosala.

²⁶ Ia to pebali tongan, iamo tandana kasisobaran tongan.

²⁷ Danggi'pa mukabua' bola, ke te'dapi jamanmu ba'tu te'dapi assele' bara'bahmu.

²⁸ Danggi' mumenjaji sa'bi lako padammu rupa tau ke te'dai lalanna, danggi' musa'bi tangtongan.

²⁹ Danggi' mumangkada kumua, “Ia to nagaukanna' tau, ia too la kugaukanni, la kupabalahhii to panggaukanna lako aku'.”

³⁰ Den kulumingka nnola jio bara'bahna mesa' tomakuttu, bara'bah anggoro'na tote'da akkalanna.

³¹ Duri manda sola reu kukita tuo llan bara'bahna. Moi rompona ro'pok toomi.

³² Ia tongkupemakitaii, kunawa-nawai, kuala pangngajaranni kumua:

³³ Ia pale' ke ia manda dipugauk to cingga'tu'-cingga'tu' mamma', cingga'tu'-cingga'tu' maroja, mangkoko kalepak na cingga'tu'-cingga'tu' mbambangan kale,

³⁴ la makaasi-asi to tau butung to dirampai, na te'da apa diampui butung to narampo' tosibawa balili'.