1 Zon 4 - Manam

Mariaba Kamatoitoidi Noko

¹ Ruangagu negu, mariaba goalakadi ka ‘propet’ bolingadi ratadi sule diandi be ambe kokoko-tina ege-ege kateka-o dilako. Bokaibe pilengadi moarunga nge moaki lama-ba kaungdi. Moaki-tina. Kamatoitoidi noko, Nanaranga-lo ka dipura ki tago.

² Bokainatuka kamamuzimuzi be kamakauakaua mariaba ngaedi nge Nanaranga-lo ka dipura ki tago: Mariaba nangata ipile Kristus Iesus ka tamoata ipura nge Nanaranga Oli Spirit ne.

³ Tamoata naita ipile Iesus tago tamoata ipura nge Nanaranga Oli Spirit ne tago ngaia-lo isoaki. Mariaba maka dipile Kristus tago tamoata ipura nge Kristus erekei nena-lo ka dipura. Kam ambe kalongo-doi Kristus erekei ne masa ngapura, be ambe makare kateka ngaenao isoaki.

⁴ Natugu negu, kam Nanaranga tamoata ne. Bokaibe mariaba kateka-onaona kauasadi be kabalakidi. Maka ma Nanaranga Oli Spirit ne kam-lo isoaki nge ikaiboang-tina, be Satang makare kateka-o isoaki nge iuasai.

⁵ Tamoata ngaedi nge kateka tamoata kaoa be kateka kana dirarangaki, be kateka tamoata nge tamoata ngaedi pilengadi dilongolongo.

⁶ Ata kita Nanaranga tamoata ne. Bokaibe tamoata naita ilolongori-kita nge Nanaranga ikauataki. Ata tamoata naita tago ilolongori-kita nge tago Nanaranga-lo ka ipura. Nge bokainatuka be ono Oli Spirit moimoi be kalingo be mariaba bolingadi ratadi muzingadi takauakauataki.

Nanaranga Reretaka Ne

⁷ Ruangagu negu, neda-la taerereretaki. Reretaka mata nge Nanaranga-lo ka ipura. Tamoata naita reretaka mata ienoni nge Nanaranga natu, be Nanaranga ikauataki.

⁸ Tamoata naita reretaka mata tago ienoni nge Nanaranga tago ikauataki. Maka ma Nanaranga ka reretaka mata labu.

⁹ Nanaranga bokainatuka be reretaka ne kita-lo itiking-kita: Natu tekena-la kateka-o inepiaria. Bokai masa ngaia-lo be kita moauriuri-la tasoaki.

¹⁰ Reretaka mata labu nge bokai: Tago kita ka Nanaranga tarereretaki. Tago. Nanaranga ka kita irereretaki-kita be Natu inepiaria makare kateka-o be ono muzigoala neda ikatu.

¹¹ Ruangagu negu, Nanaranga irereretaki-kita bokana kita taritokada tarereretakidi.

¹² Tamoata tago teke Nanaranga ite. Bokaibe kita neda-la taerereretaki masa kilalangada tananga Nanaranga kita-lo isukoaki, be reretaka mata masa adoado ere-moarunga be kita-lo ngaeno.

¹³ Nanaranga ambe Oli Spirit iang-kita. Bokaibe kita takaua ngai kita-lo isoaki be kita ngaia-lo tasoaki.

¹⁴ Be kita ambe kana taita nge mangata tamoata be aine takadi taradi. Bokainatuka taradi: Tama ka Natu inepi be tamoata be aine kateka-o Uketiketi nedi ipura.

¹⁵ Tamoata naita mangata ipile Iesus ka Nanaranga Natu nge Nanaranga ngaia-lo isoaki be ngai Nanaranga-lo isoaki.

¹⁶ Be kita takaua Nanaranga reretaka ne kita-lo dieno, be kilalanga tananga. Nanaranga ka reretaka mata labu. Tamoata naita reretaka mata-lo isukoaki nge ngai Nanaranga-lo isoaki be Nanaranga ngaia-lo isoaki.

¹⁷ Nge bokainatuka be reretaka mata nge kita-lo ikalingo. Maka ma bong kateka-o tasoaki nge Kristus-la bokana ka tasukoaki. Bokai masa bong Nanaranga aro tui ngapura kananao masa moimoi be kaiboang tadoki.

¹⁸ Be tago iboadu taburida dara Nanaranga masa sururu ngang-kita, bakara Nanaranga ambe muzigoala neda irokakileda! Bokaibe Nanaranga karereretakia-tina nge kam kakaua tago iboadu sururu ngang-kaming. Maka ma taburi-ra zazanga ne nge sururu dokiadi.

¹⁹ Reretaka mata kita-lo ieno, bakara Nanaranga ireretaki-kita mua. Alauri ka reretaka mata kita-lo ieno.

²⁰ Tamoata teke bokai ipile, “Nanaranga urereretaki,” ata taritoka isegeaki nge iboliba-tina. Nge masa baituka be Nanaranga tago iteate nge ngarereretaki, be taritoka iteate nge tago ngarereretaki!

²¹ Nge bokai ka Kristus mata ngae iang-kita: Tamoata naita Nanaranga irereretaki nge taritoka ngarereretaki be.