Revelation 4 - Bo-Ung NT

Kolomong-Auli 4–11 Kung-Sipsip Walále-ni Mulú-Koleana Lelemú Bukeliinga Pipima Wendu Liirim Kene Ma-Koleana Ulu Mare Yambuma-Kene Wendu Urum Temanima Kolomong-Auli 4 Mulú-Koleana Pulu Yili Kape Niku Bi Paka Tunjuring Temanele

¹ Ung akuma piliipu pora sipu kene penga kanurundu kene mulú-koleana lku-kunele liipa lirim kanurundu. Kanu-kene ung ui piliirindu kene bikull mele ung nirim akili-ni nimba mele: “Penga wendu ombá uluma na-ni nu liipu ora sambu ilinga olandu ui.” nirim.

² Aku nirim kene enaliinga na mulurunduna Mini Kake Tiliele omba na ambulurum-na kanurundu kene mulú-koleana yi nuim kingele molupa koleama nokulemú polu te lirim, akuna yi te mulurum.

³ Akuna ola mulurum yili i-sipa mele mulurum: Ku-moni olandupa pulimú ku-jaspa kene ku-kunduli konillian-sele pa telemú mele yu aku-sipa pa tirim. Ku-moni olandupa pulimú ku-unji-gomú kaulu lili emera pa telemú mele mulúna-wambiye killipoyale aku-sipa yi nuim kingeliinga polale liipa poku tenjipa ku-emera kanu mele tondulu pa tepa lirim.

⁴ Yi nuim king kaniliinga poluna yi nuim kingimanga polu tokapu-tilu nosuku poku tiring, polu akumanga ola yi-nuim tokapu-tilu muluring. Enini wale-pakuli kake tílima pakuku, yi nuim kingima wanie ku-gollu-ni tílima pakolemele mele wanie-kraonma pakuku muluring.

⁵ Yi nuim kingeliinga poluna kariyapa tepa, ung tondulu mundupa nimba, mulú turum. Polaliinga kumbina kamaye angere yupuku-guli nurum, akuma Pulu Yili-nga Mini angere yupuku-guli.

⁶ Polaliinga kumbina numú-kusa mulurum akili gllas mele tepa aima kake tirim. Méle angere kona mulúlima kolea ai-suku-singina yi nuim kingeliinga poluna molku poku teku muluring, méle akumanga bulkundu olkundu pali [yambumanga] mong [mele] pulele angiliirim.

⁷ Méle akumanga te lopa-pus llayon melale, te kung-kao melale, te yunga kumbi-kerale yambu melale, te mulúna buru nimba andolemú kera dowa melale, aku-sipama muluring.

⁸ Kona mululi méle angere akuma eninga lupa-lupa pu angere tale-guli nimba angiliipa, [yambumanga] mong [mele] aima pulele kangimanga angiliipa, pumanga wasie olakundu kepe maniakundu kepe monguma angiliirim. Sumbulsuli kepe tanguli kepe enini múlu naa liiku taki-taki niku mele: “Pulu Yi Olandupa Molupa Tondulu Puliele yu aima kake tiliele, yu aima kake tiliele, yu aima kake tiliele, ui mulurum, ekupu molemú, penga ombá yili.” niku molemele.

⁹ Yi nuim kingeliinga polaliinga molemú yi, taki-taki molupa mindi pulimú pumba yili [niku] yu kona mululi méle angere-ni taki-taki kape niku bi paka tonjuku “Angke” nilimele kene

¹⁰ yi-nuim tokapu-tilu enini ne yi poluna molemáliinga kumbi-kerina mania molku tamalu peku, yi taki-taki kona molupa mindi pulimú pumba yi kanili kape niku bi paka tonjuku, yi nuim kingima-ni wanie-kraon pakolemelema mele eninga wanie-kraon pakolemelema wendu liiku yunga kumbi-kerina mania nosuku kene niku mele:

¹¹ “Oliunga Auliele, oliunga Pulu Yili, mélema pali nu-ni wenginjikunu tirinu. Nu-nunu numanale-ni piliiku kene nunga tondulale-ni mélema tirinu kene wendu uring, nunga tondulale-ni mélema wendu-wendu oku molemele, akiliinga, yambuma-ni pali “Nu Yi-Auliele-ni tellu mele aima tellu.” niku “Angke” niku “Nunga bili aima ola molemú. Nu yi-nuim aima auliele molkunu mélema pali nokollu nukuni tondulale pelemú yili.” niku nu aku-siku kape niku mulungí kene kapula.” niku ti-pui-upui teku molemele.