Mark 16 - Bo-Ung NT

Kolomong-Auli 16 Yesos Ola Mulurum, Yambuma-ni Kanuring Mele Temanima 16:1-8 Yesos Lomburupa Ola Mulurum Kene Ambu Mare-ni Yunu Kanuring Temanele

¹ Ena pupa kalá turum kene [kóru muluring] ena-Sambatele omba purum kene Makdalla taon-na ambu Maria kene Jemis anum Maria kene ambu Sallomi kene enini ‘Yesos-nga ónuna kopungu-wel mura tuli mare kopungu kanjinjamili.’ niku kene mare taropu toku liiku [nosuku piring].

² Peku kene aima ipulam-ui, eninga kumbi-leku kongun tiring enale ola ombándu ena ola urum kene ambu kanuma puku [Yesos-nga] ónale nusiring ku-muruna pungí puku kene,

³ anju-yandu walsiku kene niku mele: “Ku-muru keri-puléle pipi siring kuli nae-ni wendu liipa perele-marele memba pupa nosunjumbanje?” niring.

⁴ Akiliinga-pe oku olandu-siku kanuring mele ku kanili, aima ku auliele, ui wendu liiku perele-marele meku puku nusiring, [keri-puléle we lirim] kanuring.

⁵ Ku-muruna sukundu puku kene ki-bokundu kang-yi te mulumbale sulu aima kake te pakupa mulurumele kanuku kene mini-wale munduku numanu liiku munduring.

⁶ Kanu-kene yu-ni eninindu nimba mele: “Numanu liiku naa mundai. Kolea Nasaret yi Yesos ‘Kulupili.’ niku talku unji-perana [toku] ku toku panjiring yi kanili kanungí okomelale na piliiker. Yunu lomburupa ola molupa omba pumu. Ya naa pelemú. Ónale ui nusiring koleale oku kanai.

⁷ Kanuku kene anju puku Pita kene yunga lumbili andúlima kene pali i-siku niku sangi: “Yesos kolea Gallalli distrik kumbi-lepa pulimáliinga akuna “Eni na kanungí.” ui nirim mele sika eni akuna yunu kanungí.” niku si-pai.” nirim.

⁸ [Angkellale-ni aku-sipa omba mokeringa molupa kene nirim akili] kanuku piliiku kene ambuma pung-pungu niku numanu pulele liiku munduku kene ku-muruna ulsu puku munduku kelku aima lkisiku puring. Mundu-mong tekuliinga yambu tilurindu kepe kanuku piliiring mele niku naa siring.

16:9-13 Makdalla Ambu Maria Kene Yi Tale Kene Yesos Lomburupa Ola Mulurumele Kanuku Kene Niku Siring Temanele

⁹ Pulu monjuku kongun tiring enaliinga, aima ipulele-ui, Yesos lomburupa ola molupa kene, Makdalla taon ambu Maria, ui walse kuru angere yupuku-guli numanuna muluringma Yesos-ni topa makururum ambu kanili mulurumna pupa [‘Na lomburupu ola mulundu we moliu akili kanupili.’ nimba] liipa ora sirimele.

¹⁰ Kanu-kene Yesos [mokeringa angiliirim] kanupa kene ambale yunu pupa, ui Yesos-kene muluring yambuma mundu-mong mindili kolku kola teku muluringna pupa kene kanurum mele enini nimba sirim.

¹¹ Yu-ni enini Yesos kona mulurum akili kanupa kene nimba sirim mele piliiku kene ‘Yunu gólu tokum.’ niku piliiring.

¹² [Makdalla ambu Maria Yesos yunu liipa ora sipa kene,] penga [yu lumbili anduringimanga] yambu tale [kolea-auli Jerusallem munduku kelkulu] kupulanum tenga-lupa puringlina Yesos yunu kumbi-keri kangiele topele topa yunu ‘kanangli.’ nimba omba mokeringa angiliirim.

¹³ Penga yu kanuku bi sikulu kene yambu kanusele kelku yandu okulu [lumbili anduli] yambu wemandu elsele-ni kanuringli mele niku siringli akiliinga-pe elsele-ni niku siringli akili kepe ‘Gólu tokombele.’ niku piliiringko.

16:14-18 Yesos Omba Yunga Lumbili Andúlima “Nanga Kongunale Tenji-Pai.” Nimba Liipa Mundurum Temanele

¹⁴ Penga walse lumbili anduli rurepunga yupuku enini langi noku muluringna Yesos omba mokeringa molupa kene, enini ung-mura tepa kene nimba mele: “Eni na ‘Lomburupa ola mulúm.’ niku tondulu munduku naa piliiku, na kona mulundu mele yambu mare-ni kanuku kene eni niku síngi mele ‘Gólu tokomele. Akili aima aku naa tímu, kapula naa temba.’ niku pilííngi, akili nambimuna aku-siku karaye teku niku pilííngiye?” nirim.

¹⁵ [Aku nimba kene] yu-ni eninindu nimba mele: “Eni ma-koleamanga pali puku yambuma pali temani kaiéle toku silsiliiku andu-pai.

¹⁶ Ningí mele piliiku kene ‘Akili sika nikimili.’ niku tondulu munduku piliiku kene no liingí yambuma [kot enale wendu ombá kene] Pulu Yili-ni enini tepa liipa ‘Enini mindili nolkemela koleana naa puku, molku konjuku mindi pangi.’ nimbá. Akiliinga-pe [eni lumbili andúlima-ni] ningí mele piliiku kene ‘Akili gólu tokomele.’ niku piliiku kene liiku su singí yambuma [kot enale wendu ombá kene] Pulu Yili-ni ‘Enini mindili noku mindi pungí koleana pangi.’ nimbá.

¹⁷ “‘Temani akili sika.’ niku tondulu munduku piliingí yambuma ‘Na enini-kene sika moliu mele akili we-yambuma-ni niku kanangi.’ nimbále kene ulu-tonduluma tingí kene yambuma kanungí mele akili i-sipa: Enini nanga tondulale-ni kuru mare yambumanga numanuna mulungíma toku makuruku; bo-ung lupa-lupa naa piliingíma niku;

¹⁸ yambu noku kunjuli wambiyema naa kanuku kili-ni ambulungí kene akuma-ni enini naa noku kunjingí; kupuná pelemú no te naa piliiku nungí kene ulu te aima naa temba; kuru tomba yambuma kili-ni ambulungí kene kona pungí.” nirim.

16:19-20 Yesos Mulú-Koleana Olandu Liirim Temanele

¹⁹ Auli Yesos-ni [yunga lumbili andúlima]ndu aku-sipa nimba pora sirim kene [Pulu Yili-ni] yu mulú-koleana olandu liirim. Akuna [bi ola mulupili Pulu Yili-kene mélema nokumbandu] Pulu Yili-nga ki-bokundu pupa mulurum.

²⁰ Yesos yunu mulú-koleana olandu purum kene yunga lumbili andúlima koleamanga pali puku Yesos-nga temani kaiéle yambuma toku silsiliiku anduring kene ‘Enini nanga ungma yambuma niku singí kene yambu kanuma-ni ‘Ung sikale.’ niku ung piliiku liangi.’ nimba Auliele enini-kene wasie pupa liipa tapunjurum kene yu-ni liipa mundurum yambuma enini ‘Pulu Yili-ni mindi ulu-tonduluma kapula telka mele teangi.’ nimba liipa tapunjurum. [Akili manda.]