Hebrews 2 - Bo-Ung NT

2:1-4 Pulu Yili-ni Oliu Tepa Liimba Kene Mindili Naa Nombu Yu-Kene Wasie Molomulú Akili Aima Ulu Auli Olandupale Akiliinga ‘Wendu Naa Pamili.’ Niku Nokuku Konjangi Akiliinga Ung Te

¹ [Kapula, Málale sika angkellamanga olandupa molemú] akiliinga, [Pulu Yili-ni oliu-kene ulu-kaíma temba mele Yesos-ni nimba sirim] sika ui piliirimuluma enembu kolupu naa piliipu kene kamu mundupu kelemuláliinga ung akili numanu liipu mundupu ambulupu molamili.

^2-3 [Pulu Yili-ni ui oliunga anda-kolepalima-kene ung nimba panjipa mi lirim ungele-ni enini nukurum kene] Pulu Yili-ni oliunga anda-kolepalima [“Ulu mare i-siku teai! I-siku naa teai!” nimba ung-mani ‘Moses-ni sipili.’ nimba] ‘Angkellama-ni [Moses niku sai.’ nirim kene] yunga ung-mani niring ung-mani akuma tondulu pupa pirim. Ung-mani kanuma naa piliiku pula turing yambuma teku kis-siringeliinga méle-kaluli [kis]ma liiring. Ekupu Pulu Yili-ni oliu tepa liipa, ‘Mindili nolkumula kupulanum-na wendu oku na-kene wasie molku kunjingí kupulanum-na pangi.’ nilimú ulu akili aima olandupale. Penga angkellama-ni ui niku siring ungma pula turing kene mindili nuring lem Pulu Yili-ni oliu ekupu tepa liimbandu tepa liilimú ulu Auli [Yesos] yu-ni yunu ui kumbi-lepa nimba sirim ulu aima olandupa akili mundupu kilímulu lem penga oliu ulu-pulu-kis telemulumanga nambi-sipu kowa pupu mindili naa nomulúye? [Ekupu Pulu Yili-ni oliu-kene ung kona te nimba panjipa mi lirimele pelemú enamanga] Pulu Yili-ni oliu tepa liili kongunale aima olandupa akiliinga oliu kapula kowa aima naa pumulú. Pulu Yili-ni oliu tepa liimba mele ung akili ui kumbi-lepa Auli [Yesos] yu-ni yunu nimba sirim kene penga ung nirim akili piliiring yima-ni yandu oliundu niku mele: “Ung ili aima sika.” niring.

⁴ Aku-siku niku molangi Pulu Yili-ni kepe ‘ ‘Málunga ungele aima sika.’ niku piliangi.’ nimba yi kanuma liipa tapunjupa tonduluma sirim kene enini liipa ora sirim ulu-tonduluma tiring. Pulu Yili-ni Mini Kake Tiliele-nga tondulale liipa yu-yunu numanale-ni piliipaliinga kongun mola ulu lupa-lupama tingí tonduluma ung niku siring yambuma moke tepa sirim. [Pe ung kona kanili ‘Aima piliangi.’ nimba Pulu Yili-ni yu-yunu ung kona kanili liipa tapunjurum lem ung kanili piliiku liiku kene munduku kilingí yambuma “Mindili nangi.” naa nimbáye?]

2:5-18 Pulu Yili-ni ‘Yesos Yu Mana-Yambuma-Kene Yunga Anginipilima Mele Mulupili.’ Nirim Ung Te 2:5-13 Yesos Yu Yi Aima Kaí Olandupale-ni Oliu Tepa Liipa, Molupu Konjumulú Kupulanumele Akisinjirim Yili-nga Ung Te

⁵ Ma kona te wendu ombálendu nikimulu ma akili Pulu Yili-ni ‘nokangi.’ nirim akili angkellamandu naa nirim.

⁶ Aku mólu. Pulu Yili-nga bukna [yambuma-ni ma penga wendu ombále nukungíma] ung te nimba sipa kene nimba mele: “[Pulu Yili,] nu-ni oliu yambuma nambulka mélema numanale-ni liiku mundukunu kene oliu kanukunu bi silluye? Mana-yambuma-ni melemele yambuma nambimuna nu-ni kondu kolkunu nokolluye?

⁷ [Nu-ni yambumandu nikunu mele:] “‘Yambuma angkellamanga laye-kolte mandupa molangi.’ nimbú.” nirinu. [Pe] nu-ni eninga bima paka tonjukunu, nambama sikunu,

⁸ ‘Enini mélema pali nokangi.’ nirinu.” Konana 8:4-6 nimba molemú. Pulu Yili-ni ‘Mana-yambuma-ni mélema pali nokangi.’ nirim bukna molemú lem Pulu Yili-ni méle tirimumanga tiluri kepe ‘Enini naa nokangi.’ nirim méle te aima naa lelemú. Akiliinga-pe [‘yambuma-ni mélema pali nukungí’ nilimú nimba molemú mele ekupu aku-sipu nimbu naa kanolemulu.] Ekupu ‘yambuma-ni mélemanga mare naa nokolemele.’ nimbu kanolemulu.

⁹ ‘Aku sika akiliinga-pe ekupu [mana-yi tilu sika] yunga bili kene nambale kene mélemanga pali aima olandupa molkom.’ nimbu kanolemulu. Akili Yesos. Ui Pulu Yili-ni oliu we kondu kolupa ‘Yu yambuma tepa liipa, eninga pali alko topa mindili nomba kulunjupili.’ nimba ‘Yu angkellamanga mania mele mulupili.’ nirim. Yu mindili nomba kulurumeliinga Pulu Yili-ni yu mélemanga pali namba olandupa-sipa yunga bili paka tunjurum nimbu kanolemulu.

¹⁰ Akiliinga ung te wasie niambu: Pulu Yili-ni mélema pali tirim, yu mélemanga pali Pulu Yili. Yu-ni yu-yunu piliipaliinga mélema tirim, akuma ekupu nokulemú akiliinga yu-ni yambu pulele makó topa ‘Nanga kangambulama molku, na-kene wasie tapú-topu molamili.’ nirim kene enini tepa liipa, mindili nolkemela kupulanum-na wendu liipa, yu-kene molku kunjingí kupulanum-na liipa munjurum yili ‘mindili nupili.’ nirim akili kapula nirim. Yu mindili nurumeliinga yu yi aima kaí sumbi-niliele molupa enini tepa liipa mulú-koleana pungí kupulanumele liipa ora simbandu memba pulimú.

¹¹ [Yu-ni Pulu Yili-nga kangambula pulele manda mulú-koleana memba pulimáliinga pulele i-sipa mele:] Yu kene enini kene yambu-talape tiluele. Yi te-ni yambuma liipa tapunjupa ‘Pulu Yili-ni kanupa ‘yunga yambu kake tílima’ nimba piliipili.’ nilimú yili kene yi kanili-ni yambuma liipa tapunjilimú-na enini Pulu Yili-ni kanupa ‘nanga yambu kake tílima’ nimba piliilimú yambuma kene oliunga Lapa tiluele. Akiliinga, yu-ni eninindu “Ang” nimbándu pipili naa kolemú.

¹² Akiliinga ui ung te nimba mele: “[Pulu Yili,] nu mollu mele nanga anginipilimandu nimbu simbu. Enini-kene wasie nu popu tomulúndu liipu máku topu molomulú kene enini piliiku molangi konana nimbu nu kape nimbú.” Konana 22:22 nirim.

¹³ Akiliinga alsupa walse yu-ni ung te nimba mele: “[Nanga anginipilima-ni telemele mele] na-ni [aku-sipu] Pulu Yili-ni “Na nokumbu.” nirim mele ‘Sika temba.’ nimbu piliipu táka-nimbu molumbu.” Asaya 8:17ekendu nirimko. Akiliinga ung te wasie nimba mele: “Pulu Yili-ni na kangambula sirim-ma-kene wasie molemulu.” Asaya 8:18 nirimko.

2:14-18 Yesos Oliu Tepa Liimbandu Mana-Yi Au Talurum Ung Te

¹⁴ Kangambulamandu [‘Nanga anginipilima’] nirim akili mana-yambumandu nirim, akiliinga, Yesos yu ‘enini-mele molambu.’ nimba mana-yi au talupa mulurum. ‘Eninga nimbu kolunjupu kene kululi ulu-pulele nokulemú yili topu mania mundambu.’ nimba aku-sipa mana-yi au talupa kene kulurum. Kululi ulu-pulele nokulemú yi akili [kurumanga nuim] depollale.

¹⁵ ‘Kulungíndu taki-taki numanu liiku munduku mundu-mong teku mindi molemele yambuma aku-siku molemele kupulanum-na wendu liambu.’ nimba Yesos kulurum. [Kurumanga nuim Seten-ni] ‘Enini mundu-mong teangi.’ nilimú akili ka-lkuna mele panjilimú.

¹⁶ ‘Yesos-ni aku-sipa tirim akili angkellama liipa tapunjumbandu aima naa tirim.’ nimbu kanolemulu; ‘Eprayam-ni kalupa liirim yambuma liipa tapunjumbandu aima sika tirim.’ nimbu kanolemulu.

¹⁷ Akiliinga, yunga anginipilima ma-koleana molemele mele yu aku-sipa ma-koleana molupa enini buni telemú mola mindili nolemele aku-sipa uluma pali yu-kene tilu-sipa wendu naa olkanje kapula mólu. Yu yambumanga kondu kolupa Pulu Yili popu tunjuli yi-auli-olandupale molupa Pulu Yili-nga kumbi-kerina kongun akili tondulu mundupa ambulupa molumba kupulanum te-lupa naa pirim. Yu Pulu Yili-ni ‘yambumanga ulu-pulu-kísima omba mania pupili.’ nimbá, yu-kene kapula-kapula mulungí kongunale tembandu aku-sipa mana-yi te mindi omba mulurumeliinga ekupu kongun akili kapula tepa molemú. We-nje kapula naa tepa molka.

¹⁸ Yu-kene kundi topa manda lili ulu pulele wendu omba, mindili nurum akiliinga, yambuma-kene kundi topa manda lili uluma wendu olemú kene yu-ni kapula enini liipa tapunjilimú.