Hebrews 1 - Bo-Ung NT

1:1–10:18 Ung-Bo Tunjurum Ungma Kolomong-Auli 1-2 Mulú-Koleana Angkellama Mandupa, Yesos Olandupaliinga Ungele 1:1-3 Ekupu Pulu Yili-nga Málale-ni Oliu Pulu Yili-nga Ungma Nimba Silimú Ung Te

¹ Aima ui Pulu Yili-ni taki-taki oliu Ipuru-yambumanga anda-kolepalimandu ‘Nanga ungma piliangi.’ nimba yunga ungele piliiku yandu niku siring yima yu-ni “Ninjui!” nimba ung nimba sirimuma piliiku kene oliunga anda-kolepalima niku siring. ‘Yambuma aima piliangi!’ nimba liipa tapunjurum kene yi kanuma-ni ulu pulele liiku ora siku ung pulele niku siring.

² Akiliinga-pe ekupu ‘Yunga Málale-ni oliu yunga ungma nimba sinjipili.’ nimba Pulu Yili-ni yu mana mandu liipa mundurum. Kang kanili Pulu Yili-ni ‘Nanga moya-mélema kamu yu simbu, liipa nosupa molumba.’ nirim kangale. Kang kanili yu Pulu Yili-ni ui mulú ma mélema “Teambu.” nirim mélema pali tirim yiliko.

³ [Enale talang pulimú mele aku-sipa] Málale talang pulimú akili-ni Pulu Yili-nga talang tondulu mundupa pulimú talang puliele oliu liipa ora silimú. Pulu Yili molemú mele Málale aku-sipa molemú. Málunga ung tondulale-ni mélema pali kapula molemele. Yu-ni ‘oliunga ulu-pulu-kísima omba mania pupili, oliu yambu kalaru naa mulúlima molangi.’ nimba kongun tepa pora sipa kene [mélema pali nokumbandu] mulú-koleana Yi Nuim King Auli Olandupaliinga ki-bokundu pupa mulurum molemú.

1:4-14 Pulu Yili-nga Málale Aima Olandupa Molemú, Angkellama Mandupa Molemele Akiliinga Ung Te

⁴ Aku tirim-na yunga bili lepa ‘Nanga Málu’ nirim bi akili aima olandupa purum, mulú-koleana angkellamandu bi lepa ‘Pulu Yili-nga kongun tinjili yima’ nirim bi akili aima mandupa, aku-sipa mele yu-yunu aima olandupa, angkellama mandupa.

⁵ Pulu Yili-ni nimba mele: “Nu nanga Málale. Ekupu na nunga Lapale.” Konana 2:7 nirim mele angkella te-ndu walse aku-sipa nirimye? [Mólu. Yunga Málundu mindi aku-sipa nirim.] Mola yu-ni nimba mele: “Na yunga Lapale molumbu, yu nanga Málale molumba.” nirim Samuel Aelepale 7:14, King Kumbi-Lepama Tale-Sipale 17:13 akili angkella te-ndu nirimye? [Mólu-ko. Málundu mindi aku-sipa nirim.]

⁶ Yunundu ung te wasie nirimko. Yunga kang-komulayele mana liipa mandu mundupa Pulu Yili-ni yunga angkellamandu nimba mele: “Kangale popu toku kape niku yunga bili paka tonjai.” nirim. Ung akuma piliipuliinga ‘Málale olandupa, angkellama mandupa.’ nimbu piliilimulu.

⁷ Angkellamandu Pulu Yili-ni nimba mele: “Yunga angkellama popuremima mele molku, yunga kongun tinjili yima tepi mele molangi.” nilimú. Konana 104:4

⁸ Akiliinga-pe Pulu Yili-ni Málundu nimba mele: “Pulu Yili, nu taki-taki yi nuim kingele mollu mele molkunu mindi puni. Nu-ni ulu sumbi-nílima tekunu yambuma nukuni.

⁹ Nu-ni ulu-pulu sumbi-nílima mendepulu numanu sikunu tellu. Ulu-pulu-kísima numanu naa monjukunu aima naa tellu, akiliinga nunga Pulu Yili-ni ‘Nu yi nuim kingele molkunu mélema pali nokani.’ nimba makó topa kene nunga pulu lelemú yambumanga pali namba aima olandupale nu sirim. Nu aku-sipa tepa kunjurumeliinga nu kene nunga pulu lelemú yambuma kene numanu singí.” Konana 45:6-7 nirim.

¹⁰ Pulu Yili-ni [Málundu] ung te wasie nimba mele: “Auliele, ui-pulu-pulu nu-ni male tekunu, nunga kili-ni nu-nunu mulále teku mimi tirinu.

¹¹ Méle akusele pora nimbá, akiliinga-pe nu taki-taki molkunu mindi pullu. Mulumbalema ping pupa sungu nimba kis lelemú mele mulú-masele aku temba.

¹² Yambuma-ni wale-pakuli suluma toku mundungíndu kimbulimele mele nu-ni mulú-masele aku-sikunu kimbuni; mulumbale te-lupa panjingíndu alowa telemele mele nu-ni aku-sikunu mele akusele alowa tiní. Akiliinga-pe nu-nunu aku-sikunu alowa naa tekunu, mollu mele taki-taki molkunu, anda naa lekunu, taki-taki molkunu mindi puni.” Konana 102:25-27 nirim.

¹³ Pulu Yili-ni ui walse nimba mele: “‘Nunga ele-túma nu-ni nokani.’ nimbu penga enini topu mania mundunjumbu akiliinga isili-ui nu [na-kene wasie tapú-topulu yi-nuim-sele molupulu mélema nokambili] nanga ki-bokundu okunu mului.” Konana 110:1 nirim ung akili angkellamandu nirimye?

¹⁴ [Ung akili angkellamandu naa nirim lem] angkellama nameléye? Angkellama mini melema molku Pulu Yili-nga kongun tinjili yima molemele. Angkella kanuma Pulu Yili-ni yambu tepa liipa, mindili nolkemela kupulanum-na wendu liipa, yu-kene wasie molku kunjingí kupulanum-na liipa monjulemú ulu-pulele liingí yambuma ‘liiku tapunjuku nokangi pai.’ nimba liipa mundulimú yima molemele.