Yudas 1 - Ɗû na sɗik na wiini Alaw

Ɵiɓini wuti

¹ Yudas, ɗif zi sɗa na wiini Yesu Kristu, tawalni Yakob lai, siɗi nagai n'Alaw Api a yikiŋsi, n'a diriɗi gara, n'a na giɗimiɗi lai burini Yesu Kristu.

² A juva ɓa yum gaini ɵeɗ gaini diri a sa siki abai.

Nagai n'e hitri hitri na jre kai

³ Tiki marmakaiya zi diri gara, mu firiya ɓa mu ɗoɗi siki burini seŋ na wiini kûri, n'a na arbamu aŋ bonu, a za mada aŋ wala zi dewele buri mu za hanɗa, kapai mu siki arai zi pi, aŋ hitima buri yum n'Alaw a saŋ siɗi na sɗik paŋ, n'aga a saŋsi pra kir kai.

⁴ Buri ɓa ɗai zamai e niyisi e ɗa arbaki, na sariya na wiiɗi a ɗosi haa gamai par, ɗai na maafanai n'e bindi yumna wiini Alaw na wiimu edi aŋ wala na meefeŋ, n'e siɗi Epin-gezamu na ktai, Epiɗ-ɗaimu Yesu Kristu ɗa kai.

⁵ Tiki na ki siɗi wazagai hanɗa paŋ ya ɗa, mu dara mu ɵiki midiki na ɗa ɓa Epiɗ-ɗai, asakal n'a kurɗiɗisi ɗai edi war Egipte par, asakal par nagai n'e diri e yimi kai ɗa a fiɗiɗi edi.

⁶ Ɗai zi ɵeŋ na war fuŋ-n'Alaw n'e giɗimi hormoɗi abaiɗi kai, amma e hini hlai zi simni na wiiɗi edi, a miliɗi war daŋgai gaini niggi, war gegeŋ n'abai haa kureɗ, aŋ biyi mefeŋ n'abai zi sariya.

⁷ Sodoma gaiɗi Gomora gaini fuŋ n'abakai na ɵimaɗi nɵa lai, n'a za maini nɵa, n'a niya war zini maɵara, e tipi gaini wazagai zi rgi na maiɗi ɗai nɵa kai, e bindi aŋ wala n'a kiɗa a hitrumu, nagai e nivi gir gaini afu n'a vada kai.

⁸ Nagai n'e hitri hitri na maafanai nɵa lai, pin hiiniɗi na meefeŋ ɗa, e bindi siɗi dama hihir, e miisiti abai na wiini Alaw, e tirki spak n'arbani hlai n'amai ɗa lai.

⁹ Paŋktai, won hlai na Mikayel n'abaiɗi ɗai zi ɵeŋ na war fuŋ-n'Alaw gaini mat e sispi burini kopoŋni Musus ɗa maa a kiɗa aŋ tirkaŋ kai, amma a miɗini ɗa ɓa, Epiɗ-ɗai aga a zuku gir.

¹⁰ Nagai ɗa e tirki ɗa a wala n'e siɗiŋ kai, pin na siɗi a siŋɗi maini wazagai n'edi buza na yel miɗini kai ɗa nɵa, hanɗa a wazagai n'a na tûûriɗi ɗa mal.

¹¹ Haw gara buriɗi, buri ɓa e tikiti te futi na wiini Kayin, e niyi warni wili n'edi na wiini Balaam burini vrak, e bi edi na ɗa buri e fiki amai maini Kore nɵa.

¹² Ɗai hanɗa e ɗi wala zi siyer war simi na ki simiŋ arbaki tiki tawalakai zi yimi ɗa, e simi, e ci li maini na min fet nɵa, gaini hunai piɗi kai; e ɗi ɗugul zi faŋ na yem warni kai, na smer a fanaŋ, e ɗi luwaŋai n'e hili li aŋ rûwi ali tini par ɗa e nivi ali tini kai, e ɗi ɗai na gaini mri azi sulu, na gaini hûrɗi amai gaini sirdaini paŋ lai.

¹³ E ɗi mayaw na gdaŋ na war yem-ra-n'abai, n'a ha meɵeɵebe na wiini sdani zi siyer ɗa amai, e ɗi meeɵek n'a jogo yaw yaw, na gegeŋ na tikiɗim a zizina buriɗi haa hlai n'a vada kai.

¹⁴ Enok, n'ag'aŋ muguzak sin Adam par, a muɗa seŋ na wuze midiɗi maini nɵa: Epiɗ-ɗai a na halasi gaiɗi na sɗik na wiini dubu-dubu viya,

¹⁵ kapai a zitiɗi sariya wiiɗi ɗai paŋ, a dûgûɗi gaini siyer burini sdaɗi na maafanai paŋ, gaini seŋ na ɗewek na ɗai na tuwarai zi kûli siɗi e miɗiŋni.

¹⁶ E ɗi ɗai na kureɗ e ŋûriyi gaini ŋûriyi, e tuwi gaini Alaw burini wazagai n'aga a za siɗi ɗa, n'e piyi pin diri na wiiɗi, miɗi a muɗa seŋ na ɗewek, e kûli ɗai pin arai, kapai e nivi der.

Gadai buriɗi zi yimi

¹⁷ Amma tiki ɗa marmakaiya zi diri gara, ki hini midiki a kɵa gaini seŋ n'apostelai na wiini Epiɗ-ɗaimu Yesu Kristu e miɗiŋsi wuzani hlai par.

¹⁸ E miɗikisi ɓa war mefeŋ n'asakal ɗa, ɗai zi anya aga e gizi, nagai aga e zi pin diriɗi, aŋ ɗai na maafanai.

¹⁹ Hanɗa e ɗi nagai ɗa, e piyi ɗa a ɓraw, e ɗi ɗai na war neŋ-si, ɗai na seze warɗi kai.

²⁰ Amma tiki ɗa, marmakaiya zi diri gara, ki rgi siki amai midini yimiki na sɗik, ki siiwi war Seze-sɗik.

²¹ Ki giɗimi siki war diri na wiini Alaw, ki biyi yum na wiini Epiɗ-ɗaimu Yesu Kristu, n'a sa suŋfa n'a vada kai.

²² nagai na hiiniɗi sulu sulu ɗa ki hiini haw buriɗi,

²³ na zamai ɗa, ki kûrɗiɗi edi min afu par, na zamai ɗa, ki hiini buriɗi lai, ki huniɗi haa sin sapa na siɗi, buri a bunda hihir pin neŋ-si.

Zini tese

²⁴ Sini ni n'a kiɗa buri a kutiki burini kɵi n'azumai, n'a kiɗa a ɗiiki wuzaɗi abai na wiini gaini tirki siki kai, war firiyi n'abai,

²⁵ sin Alaw na ktai, Ɗif-zi-kûri na wiimu, gaini Yesu Kristu Epiɗ-ɗai na wiimu, kol, pay, spak gaiɗi abai a sa sini haa gamai par, tiyana lai, haa hlai n'a vada kai, n'a vada kai. Amen.