Yowel 1 - Ɗû na sɗik na wiini Alaw

¹ Seŋ na wiini EPIƊ-ƊAI a muɗa sini Yowel, ahini Petuel.

Seŋ siɗi n'abakai na war Yuda

² ɵini pɗem, tiki n'abakai n'arbaɗi ɗai Zigi ɵimaki pɗem, tiki paŋ na ki ɗa midini afti na Yuda, Wala na mai hanɗa ɵa a za ka duk ya, war mefeŋ na wiiki, zaw na wiiɗi tamaiki ɗi?

³ Virni seŋ hanɗa wiiɗi aliki, aliki wiiɗi aliɗi; aliɗi lai wiiɗi pinziba n'asakal sek.

⁴ Wala n'a hina pini atla ɗa, ŋoyek a lumaŋ ta. Wala n'a hina pini ŋoyek ɗa, ayuwi a lumaŋ ta. Wala n'a hina pini ayuwi ɗa, goŋgoloŋ a sumaŋ ta. Wala n'a hina pini goŋgoloŋ li ɗa, jew jew a sumaŋ ta lai.

Siŋkini gir: Vlak gaini Koɓro

⁵ ɵiyi amai, tiki na ki ciini, tûwi, ɵi hama siki, tiki paŋ na ki ci vin buri vin na hehe n'aga a ɗukla edi miki par.

⁶ Vok ktai a fakasi amai aŋ tika aftiŋa, spak gara, a pɵa kai. Sesiyeŋni ɗa maini sesiyeŋni gurnai na wus nɵa, sesiyeŋni zi kirpi wala maini na wiiɗi gurnai na muni nɵa lai.

⁷ A ɵa vowai na wiini luwuŋ zi vin edi su su, a ɗukla luwuŋ Fige azumai daf daf, a fulka fotorok na sini edi, a pokoŋ azumai, tini n'a pasi hahakai a ɓurha muɗukwi fawwa.

⁸ ɵi marava maiɗi ɓulmi na te sɗa wus kai hai, na te wa sapa zi tuwi siɗi, aŋ za grohoni mofoɗi n'a dara a tikiti ɗa nɵa.

⁹ Ɓaka z'avdi gaini vin zi mi azumai n'amlai warni tempel na wiini EPIƊ-ƊAI, aŋ kir kai, paakai zi ɓaka, n'e zi ɵeŋ na wiini EPIƊ-ƊAI ɗa e ɗa war tuwi.

¹⁰ Vowai gai limi edi tak tak, afti aŋ war kwimi, algama aŋ kai, vin na hehe aŋ kai, emel na hehe aŋ kir kaalai.

¹¹ Ɗai zi hirim e siɗi wala n'e zi ɗa kai, e giɵiri ca. Ɗai zi pi luwuŋ z'ali ɗa e ɗa ɵi marawa siɗi, buri ɓa algama gaini orge ɗa a tuura edi kok, seyem zi hiɗi paŋ a ba ta.

¹² Luwuŋ zi vin ɗa a huula, luwuŋ Fige ɗa a siita. Luwuŋ zi grenade, huura, gaini luwuŋ zi pome luwaŋai na war vowai ɗa paŋ a huula paŋ. Firiyi warni fuŋ kir kai, a zogo edi arbaɗi ɗai par.

Tikini sai gaini siiwa na wiiɗi ɗai paŋ

¹³ Paakai zi ɓaka, niggi sapa wuzaki mini tuwi, ɵi hama siki, Ɗûûli tiki zi ɵeŋ na war hlai zi ɓaka, hilisi, ki fini war sapa zi kwimi, tiki ɵeŋ na wiya, ɓuri ɓaka z'avdi gaini vin a na halasi amlai war dalam na wiini Alaw na wiiki kai.

¹⁴ Kiti mefeŋ zi tikini sai, yiki diŋgi n'abai burini Alaw ka, tipiɗi n'abakai n'arbaɗi ɗai, gaiɗi ɗai na midini afti hanɗa paŋ, amlai war dalam na wiini EPIƊ-ƊAI Alaw na wiiki, ɗûûli sini EPIƊ-ƊAI.

Mefeŋ na wiini EPIƊ-ƊAI aŋsi gobi

¹⁵ Aiya, mefeŋ zi gir a na gizi, mefeŋ na wiini EPIƊ-ƊAI, a na gobi, a halasi sin Alaw zi spak paŋ par, maini ɓilki n'edi nɵa.

¹⁶ Wala zi simi a vada edi na wuzani armu kai ɗi? Vini firiyi gaini agul zi ɵiɗi a yima sini edi war dalam na wiini EPIƊ-ƊAI par yaw kai ɗi?

¹⁷ Seyem n'e biliŋ azumai ɗa, a purkuɗuma ca ca azumai pin afti, vrakai n'agogoi ɗa a hurba hrob hrob, vrakai n'abakai ɗa a haɗa azumai ɓaw ɓaw, buri algama n'e miliŋ warni aŋ kir kai.

¹⁸ Tili farai z'ayir a na sɗa gir! Farani ɵaakai a giliŋa gai giliŋi, buri kuzum n'a sumaŋ aŋ kai. Farani haakai gaini adumai a hogo wuzani sek sek.

Siiwa na wiini ɗif na min Alaw

¹⁹ EPIƊ-ƊAI, mu yikuku ma na ɗa ku tuku, Buri afu a na ya evek na war basga ɗa. Alesni afu a na ya luwaŋai n'edi war vowai ɗa paŋ lai.

²⁰ Wazagai n'ezini puɗu puɗu na war basga paŋ, a mulaɗi arni na suku. Klorai paŋ a huula amai ca ca, afu a na ya kuzum na war basga ɗa lai.