Yosva 8 - Ɗû na sɗik na wiini Alaw

Tikini afti na Aï

¹ EPIƊ-ƊAI a miɗini wiini Yosva: Ku huna kai, ku ba bayai na pini ɵeɗ na wiiku edi, kai ku miliɗi ɗai zi hatam paŋ gaiku, zizina suku aŋ hitimiti Aï. Tala, mu suku pai na Aï gaiɗi ɗaini paŋ war tuku, fuŋni n'abai gaini aftini paŋ lai.

² Aga ku za siɗi Aï gaini paiɗi maini na ku za siɗi Yeriko gaini paiɗi nɵa. Wala zi der gaini farai n'ezini puɗu puɗu na ki niviŋ paŋ ɗa a wiiki. Tuku ɗa, ku miliɗi ɗai zi riɓti edi par duɓani fuŋ n'abai ɗa par ca.

³ Yosva a faka amai gaiɗi ɗaini zi gaw ɗa paŋ buri a hala aŋ cikiti Aï, a viriɗi ɗai n'e siɗi yelni hatam dubu doogo doogo hu, a ɵiniɗi duvuk.

⁴ A miɗiɗi maini nɵa: Tili, tiki aga ki riɓtiɗi duɓani fuŋ n'abai ɗa par, ki ɗiyi edi gai gai par a suwa kai, ki simni gaini zizini.

⁵ Ta gaiɗi ɗai n'e ɗa gaya paŋ aga mi hiliɗi sini fuŋ n'abai ɗa sek, e niyisi li anene aryi ɗa, tiyi aga mi rûvi wuzaɗi maini n'avut ɗa nɵa.

⁶ Aga e tikisi futi piyi, tiyi aga mi tiniɗisi edi gai gai sini fuŋ n'abai ɗa par buri aga e hiini ɓa mi rûvi na ɗa a rûvi wuzaɗi maini n'avut ɗa ɵa.

⁷ Tiki ki niyisi edi warni hlaiki zi ŋoyai ɗa par, ki tiki fuŋ n'abai ɗa, EPIƊ-ƊAI Alaw na wiiki aga a saŋ war tiki.

⁸ Won hlai na ki tiki fuŋ n'abai ɗa li ɗa, ki tiki afu pini. Aga ki zi maini n'EPIƊ-ƊAI a muɗaŋ ɗa nɵa, hanɗa a gadai na mu siŋki ɗa.

⁹ Yosva a ɵiniɗi, e hili e simni aŋ riɓti arbaɗi Betel gaiɗi Aï, war gal na koskoi na wiiɗi Aï, war duvuk ni ɗa, Yosva a fana arbaɗi askarai n'e hini ɗa.

¹⁰ Yosva a faka amai gorof par a tiliɗi ɗai na pini paŋ, ni gaiɗi n'abakai na war Izrayel ɗa e hili edi wuzaɗi ɗai aŋ cikiti Aï.

¹¹ Ɗai zi hatam n'e ɗa gaini paŋ e hili, e tûrû gobi gaiɗi Aï. Won hlai n'e cûsi wuzani fuŋ n'abai ɗa, e pi kaŋɗi wuzaɗi Aï war gal n'azumai sek tiɓ, huduk a na fu arbaɗi gaiɗi Aï.

¹² Yosva a mula ɗai gobi dubu ɵim, a ɵiniɗi aŋ riɓti arbaɗi Betel gaiɗi Aï, war gal na koskoi sek na wiiɗi Aï.

¹³ Won hlai na ɗai e pi kaŋɗi paŋ azumai li war gal n'azumai sek na wiiɗi Aï ɗa, galɗi zamai a sumna piɗi futi na koskoi sek na wiini fuŋ n'abai. War duvuk ni ɗa Yosva a fana edi warni huduk.

¹⁴ Won hlai na pai na Aï a tiliɗi ɗai na Izrayel ɗa, a niyasi edi witaw war fuŋ n'abai ɗa par gaiɗi askaraini paŋ, e hili aŋ hitimiɗi aliɗi Izrayel warni hlai n'avut e hitimiɗi woni ɗa, cir miɗini huduk na Yurdan. A sɗa ɓa ɗai e ɗa riɓtiŋ edi duɓani fuŋ n'abai ɗa par nɵa kai.

¹⁵ Yosva gaiɗi Izrayel e zi siɗi maiɗi ɗai na gdaŋɗi kai nɵa, e pri edi wuzaɗi warɗi futi na te ka edi war basga na kaɗataŋ sek.

¹⁶ Ɗai na Aï paŋ e tipisi buri e tiki futi piɗi, e tiki futi pini Yosva haa e hinisi fuŋɗi n'abai ɗa edi gai gai.

¹⁷ Ɗif ktai na war Aï gaiɗi Betel par na a niyasi edi kai ɗa aŋ kai; e hinisi mini magalani fuŋ n'abai ɗa edi su, e birgiɗi ɗai na Izrayel ɗa.

¹⁸ EPIƊ-ƊAI a miɗini wiini Yosva: Miɗiti kawai na t'aŋ tuku midiɗi Aï, buri mu sutuku li war tuku. Yosva a miɗiti kawai na t'aŋ tini miɗini fuŋ n'abai na Aï.

¹⁹ Tizaw won hlai na a miɗiti tini edi li, ɗai zi ripti e niyisi edi witaw tar war hlaiɗi zi ŋoyai ɗa par, e niyi aha war fuŋ n'abai ɗa, e tiki hlai paŋ, e tiki afu pini witaw tar tar lai.

²⁰ Ɗai na Aï e ɵi arɗi duɓaɗi ɗa, e tili agiyiŋ a na aha amai war fuŋɗi n'abai ɗa par amai warni hlai n'amai sek, hlai ktai na e ki siɗi woni sek aŋ kir kai, ɗai na Izrayel n'e rûvi wuzaɗi edi warni basga sek ɗa e bindisi arɗi.

²¹ Won hlai na Yosva gaiɗi ɗai na Izrayel paŋ, e siɗi ɓa, ɗai zi riɓti e tiki fuŋ n'abai ɗa ɗaw, agiyiŋ na wiini fuŋ n'abai a na ha amai lai ɗa, e bindisi arɗi, e fiɗiɗi ɗai na Aï ɗa edi.

²² Izrayel na zamai n'e bindisi aha duɓaɗi par e hilisi arɗi zaw, ɗai na Izrayel e gûniɗi ɗai na Aï azumai, e vidiɗi edi paŋ, ktai n'a hina karni aŋ kai, na a pra edi aŋ kaalai.

²³ Pai ɗa e yimiŋsi karni, e kiŋsi wuzani Yosva.

²⁴ Won hlai na ɗai na Izrayel e vidi li gaini fiɗiɗi ɗai na Aï paŋ edi war basga ɗa, e wiyisi aha warni fuŋ n'abai e fiɗi piɗi n'a hina aha ca lai.

²⁵ Pɵaɗi ɗai n'e mri warni mefeŋ ni ɗa, maɵagai gaiɗi falakai paŋ e zi ɗai dubu doogo pi sulu. Paŋ e ɗi ɗai na Aï.

²⁶ Kawai na Yosva a miɗiti edi midiɗi Aï te hina woni gaini miɗi meɗ ɵa haa ɗai na warɗi paŋ e vidi edi.

²⁷ Pini miɗi n'EPIƊ-ƊAI a miɗiŋni wiini Yosva ɗa, Izrayel e mili der na maini farai n'ezini puɗu puɗu gaini der zamai zamai lai na wiini fuŋ n'abai hanɗa aŋ wiiɗi.

²⁸ Yosva a yiti Aï edi, a ziti aŋ zö na a rga amai kir kai haa girna.

²⁹ Pai na Aï ɗa, a tokoŋ amai sini luwuŋ haa koskoi. Siɗi futi koskoi sek ɗa, Yosva a sa miɗi buri e tikisi kopoŋni azumai amai sini luwuŋ par. E biliŋ gobi gaini mini magala na wiini fuŋ n'abai ɗa, e tipi kriyit amai midini viya, haa girna a na.

³⁰ Nɵa Yosva a rga gûwiŋ zi ɓaka burini EPIƊ-ƊAI Alaw na wiiɗi Izrayel sini huwuŋ Ebal.

³¹ A rgaŋ maini na Musus, ɵeŋ na wiini EPIƊ-ƊAI a miɗiŋɗi wiiɗi aliɗi Izrayel ɗa nɵa, maini n'aŋ gaini ɗû war maktuɓ na wiini gadai na wiini Musus ɗa nɵa lai. A gûwiŋ zi ɓaka na a rga gaini alini fuŋ n'e hiŋɗi sini gaini kawai kai, e zini ɓaka zi yi gaini ɓaka zi ɵeɗ lai wiini EPIƊ-ƊAI miɗini.

³² Woni hlai ni, Yosva a ɗo gadai miɗini alini fuŋ na Musus a siŋɗi wiiɗi aliɗi Izrayel.

³³ Izrayel paŋ, abakaiɗi paŋ, ɗaiɗi zi ɗû wazagai ɗa paŋ, paakaiɗi zi sariya paŋ e ɗiyi sini zunduk war galni na sulu paŋ wuzaɗi paakai zi ɓaka. Levitekai n'e libi zunduk na wiini EPIƊ-ƊAI na morkokoi paŋ e tipi paŋ, galɗi miɗini huwuŋ Garizim, galɗi na zamai miɗini huwuŋ Ebal lai pini miɗi na wiini Musus, ɵeŋ na wiini EPIƊ-ƊAI buri a ɓikiɗi ɗai na Izrayel avut haw.

³⁴ Asakal par, Yosva a ŋa seŋ n'aŋ warni gadai zi ɗû paŋ, ɓiki gaini tuusa lai kal kal maini n'aŋ gaini ɗû warni maktuɓ zi gadai ɗa nɵa.

³⁵ Wala ktai na Musus a ɗoŋ na Yosva a ŋaŋ wuzaɗi vokɗi aliɗi Izrayel kai ɗa aŋ kai, falakai gaiɗi aliyagoi, morkokoi n'e ɗa arbaɗi paŋ lai.