Yosva 24 - Ɗû na sɗik na wiini Alaw

Diŋgi na a Sikem

¹ Yosva a tipiɗi pinzibaɗi aliɗi Izrayel paŋ a Sikem, a yikiɗi n'abakai zi ɵi wuze, paakai, paakai zi sariya, ɗai zi ɗû wazagai, paŋ e hilisi a Sikem wuzani EPIƊ-ƊAI.

² Yosva a miɗiɗi wiiɗi ɗai na Izrayel paŋ, EPIƊ-ƊAI Alaw na wiiɗi Izrayel a na muɗa maini nɵa: Tamaiki, Terak n'epini Abraham gaini Nakor, avut par ɗa e zi fuŋ ɗa anene kata duɓani ra Öfrata par, e hûrgû azumai wuzani alawai na zamai lai.

³ Mu yimasi Abraham n'epiki anene par duɓani ra Öfrata par, mu siŋkini afti na Kanaan paŋ, mu bunda pinzibani viya, mu sini Isaak aŋ ahini.

⁴ Mu sini Yakob gaini Ezaw wiini Isaak. Mu sitini huwuŋ na Seyir wiini Ezaw, amma Yakob gaiɗi alini e hili war Egipte.

⁵ Asakal par mu ɵinasi Musus gaini Aaron. Mu ziɗi gir wiiɗi Egipte arni kiini kiini viya, asakal par mu milikisi edi woni par lai.

⁶ Aha war Egipte par, tamaiki e gi agoɗom wulani yem ra n'abai na mekele, gaini saret gaini plasai zi gaw lai.

⁷ Nɵa tamaiki e ɗûûli sini EPIƊ-ƊAI, a hina gegeŋ arbaki gaiɗi ɗai n'Egipte, a hina yem ra n'abai a wayasi a fana midiɗi. Arki a tala wala na mu zaŋ siɗi Egipte ɗa ya, ki simni mefeŋ viya edi war basga na kaɗataŋ.

⁸ Mu kikisi midini afti na wiiɗi Amoritekai na e simni anene kata duɓani Yurdan par. Nagai e hitimiki, ta mu siɗi war tiki, ki tiki afti na wiiɗi buri mu vidiɗi edi wuzaki vat.

⁹ Balak n'ahini Sippor pai na Mowab a faka amai aŋ hitimiti Izrayel, a ɵina pini Balaam n'ahini Beyor kapai a tûûsiki.

¹⁰ Amma mu ɵina mini Balaam ɗa kai, a ɓikiki gaini ɓiki, mu piliki edi tini Balak par.

¹¹ Tiki ki vigi Yurdan, ki gi war Yeriko, ɗai na Yeriko e hitimiki, Amoritekai; Perezitekai, Kanaaniyakai, Hititekai, Girgazitekai, Hivitekai, gaiɗi Yebuzitekai lai, mu siɗi paŋ war tiki.

¹² Mu ɵina ami wuzaki, a ɵiriɗi ɗai edi wuzaki par, maiɗi paakai na sulu na wiiɗi Amoritekai nɵa. Hanɗa a za burini kaɵkarku na gaini ɓarawku kaalai.

¹³ Mu siki afti na ki hirmiŋ duk kai, gaini fuŋ n'abakai na ki rgiŋ amai kaalai, amma ki simni woni. Luwuŋ Fige gaini luwuŋ Olive na ki piŋ kiɗi tiki kai, amma a bunda aŋ walaki zi simi.

¹⁴ Amma tiyana ɗa, ki hûni pini EPIƊ-ƊAI, ki ɵini pini war ɗikat, war jre lai, alawai na tamaiki e ɵini pini anene kata duɓani ra Öfrata par, zaw war Egipte par ɗa, hiniŋ edi, ki ɵini pini EPIƊ-ƊAI.

¹⁵ Na ɓa ɵeŋ na pini EPIƊ-ƊAI a tala arki pɗem kai ɗa, girna viri a siya na ki diri ki ɵini pini. Zaw alawai na kadai na tamaiki e ɵini pini anene par duɓani ra Öfrata ɗa, zaw alawai na wiiɗi Amoritekai na ki simni tiyana midini aftiɗi ɗa. Amma ta gaini dalamŋa ɗa, aga mi zi ɵeŋni EPIƊ-ƊAI.

¹⁶ Ɗai na Izrayel e wiyi seŋ e miɗi: Duk kai zaŋ, tiyi aga mi hini EPIƊ-ƊAI edi aŋ hûrgû azumai wuzaɗi alawai zamai kai.

¹⁷ Buri EPIƊ-ƊAI a Alaw na wiyi, a Ni na a pliyisi edi warɗi Egipte par, war bege tiyi gaiɗi tamaiyi lai, a Ni na a za wazagai zi hila n'abakai wuzani aryi ɗa, a Ni na a giɗimiyi warɗi futi na mi tikiti ɗa, arbaɗi pinzibaɗi ɗai na mi vigisi arbaɗi par lai.

¹⁸ A birgiɗi ɗai paŋ wuzayi gaiɗi Amoritekai n'e simni midini afti hanɗa lai; Tiyi lai aga mi ɵini pini EPIƊ-ƊAI buri Ni a Alaw na wiyi.

¹⁹ Yosva a miɗiɗi wiiɗi ɗai na Izrayel: Aga ki kiɗi aŋ zi ɵeŋ na wiini EPIƊ-ƊAI kai, buri Ni a Alaw na sɗik, na diri zi sile aŋ warni, aga a siki ni burini hiki n'amai midini gadai gaini meefeŋ na wiiki kai.

²⁰ Won hlai n'aga ki hini EPIƊ-ƊAI edi buri ki ɵini pini alawai na zamai ɗa, aga a ziki meefeŋ, aga a vidiki edi lai, asakal na a ziki pɗem ya ɗa.

²¹ Ɗai na Izrayel e miɗini wiini Yosva: Zaw kai, tiyi aga mi zi ɵeŋni EPIƊ-ƊAI.

²² Yosva a miɗiɗi wiiɗi ɗai na Izrayel: Tiki ki ɗi zaida midiki tiki dama, buri tiki gaini midiki dama ki viri EPIƊ-ƊAI aŋ zi ɵeŋni. E wiyi seŋ e miɗi: Tiyi miɗi zaidakai.

²³ Nɵa, pûkû alawai na zamai n'a na arbaki paŋ edi, binditi agulki sini Epiɗ-ɗai Alaw na wiiɗi Izrayel.

²⁴ Ɗai na Izrayel e miɗini wiini Yosva: Tiyi aga mi zi ɵeŋni EPIƊ-ƊAI, Alaw na wiyi, gadai na ku miɗiŋyi paŋ aga mi zi pini lai.

²⁵ War mefeŋ ni ɗa, Yosva a za bonu gaiɗi ɗai na Izrayel, a siɗi gadai lai war Sikem.

²⁶ Yosva a ɗo wazagai hanɗa war maktuɓ na wiini seŋ zi gadai na wiini Alaw. A tikiti fukuni ktai n'amai a ɗiyiti amai azumai pini luwuŋ n'abai n'a na war hlai na sɗik na wiini EPIƊ-ƊAI.

²⁷ Yosva a miɗiɗi wiiɗi ɗai na Izrayel paŋ: Tili, fukuni hanɗa aga te za aŋ zaida buriki, buri te ɵina seŋ paŋ na EPIƊ-ƊAI a muɗuŋmu, aga te za aŋ wala zi zaida buriki kapai ki ɓiɓiri miki burini Alaw na wiiki kai.

²⁸ Asakal hanɗa, Yosva a hiniɗi ɗai na Izrayel e wiyi aha, a siya a siya paŋ midini galni aftini na a sa sini.

Mrini Yosva

²⁹ Asakalni wazagai hanɗa, Yosva n'ahini Nun, ɵeŋ na wiini EPIƊ-ƊAI a mra, buzani miya gaini doogo.

³⁰ E piŋ midini galni afti na a sa sini war ɓraw a Timnat-Sera, won hlai zi huwuŋ na wiini Efrayim war gal n'azumai sek piɗi huwuŋ na Gayos.

³¹ Izrayel e zi ɵeŋni EPIƊ-ƊAI won hlai na Yosva a na karni hai ɗa, gaiɗi nagai n'abakai n'e ɗi ka gaini gaiɗi n'e hini duɓani par lai n'e tili sdani EPIƊ-ƊAI na a zaŋ siɗi Izrayel paŋ gaini arɗi.

³² Keɵkeni Yosef na aliɗi Izrayel e libiŋsi war Egipte par ɗa, e piŋ a Sikem war galni vowai na Yakob a wuraŋ tiɗi alini Hamor n'epiɗi Sikem par gaini sulai miya ɗaw. A na tiyana war bulum na wiiɗi alini Yosef.

³³ Eleyazar n'ahini Aaron a mra, e piŋ a Gibeya-Fineyas, na te sa sini Fineyas n'ahini war hlai zi huwuŋ na wiini Efrayim.