Yosva 2 - Ɗû na sɗik na wiini Alaw

Yosva a ɵina ɗai zi tili hlai sulu a Yeriko

¹ War Sittim par, Yosva n'ahini Nun a ɵiniɗi ɗai sulu war kuɗuhai buri e tilisi afti, a miɗiɗi: Hili, tilisi afti gaiɗi Yeriko. E hili, e gi aha warni dalamɗi muni ktai zi zawar na yikiɗi ɓa Rahab, e fini woni.

² Ɗai e miɗini wiini pai na Yeriko: Tala, ɗai zamai arbaɗi aliɗi Izrayel e gizi won na duvuk buri e tili aftimu.

³ Pai na Yeriko a ɵina piɗi Rahab a miɗiɗi: Ɗai n'e hilisi ahaku, n'e niyi amlai ahaku lai ɗa, siɗiyisi anene, buri e hilisi aŋ tili aftimu gaini abaini paŋ.

⁴ Muni te miliɗi ɗai na sulu te ŋûyiɗi cok te muɗa: A jre, ɗai hanɗa e gizi ahaya ya, amma mu sɗa hlai n'e ɗisi woni par kai.

⁵ Won hlai na duvuk a za li, hlai n'e diri e dûgû mini magalani fuŋ n'abai ɗa, ɗai hanɗa e niyisi anene, mu sɗa hlai n'e hili woni sek ɗa kai, nɵa ki pirmi, ki tiki futi piɗi aga ki niviɗi.

⁶ Paŋktai, te kiɗi amai midini dalam te ŋûyiɗi azumai pini yahaw na te zizinaŋ amai woni.

⁷ Ɗai na wiini pai e hili piɗi warɗi futi na te ka mini hlai zi hiwi na wiini Yurdan sek, e dûgû mini hlai duɓaɗi par duk lai.

⁸ Wuzani hlai na ɗai zi tili hlai e kili weseŋ kai hai ɗa, Rahab te niya amai siɗi miɗini dalam.

⁹ Te miɗiɗi: Mu sɗa ya ɓa EPIƊ-ƊAI a siki afti hanɗa ta, tiki ki ɗa miliyi hunai piyi gara, ɗai na midini afti hanɗa paŋ e ɗa ziriyi wuzaki.

¹⁰ Buri tiyi mi ɵini ɓa EPIƊ-ƊAI a hula yem ra na mekele wuzaki won hlai na ki niyisi edi warɗi Egipte par ɗa, gaini wala na ki ziŋ sini Sihon gaini Og, paakai na sulu na wiiɗi Amoritekai n'edi duɓani Yurdan par, tiki ki vidiɗi edi gaini wazagaiɗi paŋ.

¹¹ Tiyi, mi ɵini labar hanɗa, agulyi te huna, sezeyi paŋ a bunda huruf won hlai na mi tiliki ɗa, buri EPIƊ-ƊAI Alaw na wiiki a Alaw n'amai war hlai n'amai, na azumai midiɗi yai lai.

¹² Tiyana, mu siiwiki, ki hiŋa wala miki gaini EPIƊ-ƊAI, ɓa aga ki zi pɗem sini dalamni apa maini na ta mu zaŋ siki tiki nɵa. Siŋa wala zi siŋki ktai na kapai mu baya pini.

¹³ Ziŋa ɵinini-ha ɓa, aga ki fiɗi apa, ki fiɗiti ama, ki fiɗiɗi tawalakaya na maɵagai gaiɗi na falakai, gaiɗi zagalakaiɗi paŋ edi kai, aga ku kûrɗiyi edi mini mri par.

¹⁴ Ɗai hanɗa e wiyiɗi seŋ e miɗi: koo ɓa mi mri tekeɗeɗi, aga mi mri buriki na ɓa ki wiyi piyi amai kai ɗa, won hlai n'EPIƊ-ƊAI, a siyi afti hanɗa li, aga mi zi pɗem suku, mi zi pini ɵinini-ha na mi ziŋ ɗa lai.

¹⁵ Te wiɗisi azumai gaini sogom arni baŋa n'arɗi dilimiɗi ɗaw buri dilimiɗi te rga sini ɵaga na wiini fuŋ n'abai hanɗa.

¹⁶ Te miɗiɗi, ki hili edi siɗi huwuŋ, nɵa kai ɗa nagai n'e piyiki e kiɗi aŋ nivi gaiki, ki ŋûyi siki woni haa mefeŋ hu haa e wiyisi haw, kapai ki hili.

¹⁷ Ɗai hanɗa e miɗiɗi: Wala zi hi mi na mi hiŋ miyi aga mi zi pini.

¹⁸ Won hlai na mi niyisi li aha, aga ku rga sapa na mekele hirra amai arni baŋa na ku wiyisi azumai warni ɗaw ɗa, ku yimasi apuku, amuku, tawalakaiku gaini dalamni apuku paŋ ahaku.

¹⁹ Na ɓa ktai arbaɗi a niya li anene mini magala, felni a zilba tini, tiyi seŋ midiyi kai, amma na ɓa mi fiɗi ktai arbaɗi nagai n'e ɗa gaiku warni dalamku, felni a zilba tiyi.

²⁰ Na ɓa ku wiyi piyi amai li, wala mi hiŋ miyi a za wala ktai buriyi kai.

²¹ Te wiyiɗi seŋ: Zi maini na ki miɗiŋ ɗa nɵa. Te hiniɗi e hili wiiɗi. Te rga sapa na mekele hirra amai arni baŋa n'arɗi dilimi ɗa.

²² E hili e gi siɗi huwuŋ, e simni woni mefeŋ hu. Haa nagai n'e hili aŋ piyiɗi, e piyi won hlai n'e kiɗi e vigi woni ta ta paŋ, amma e niviɗi kai, e wiyisi walaɗi aha.

²³ Ɗai na sulu e niyisi edi warni hlaiɗi zi ŋoyai ɗa par, amai midiɗi huwuŋ par, e hiwi Yurdan e hilisi sini Yosva n'ahini Nun, e miɗini miɗini wala na a za siɗi paŋ.

²⁴ E miɗini wiini Yosva: A jre ɓa, EPIƊ-ƊAI a sa afti hanɗa war tumu ta, ɗai na woni paŋ e hûni gara, agulɗi paŋ a ɗukla wuzamu.