Yosva 10 - Ɗû na sɗik na wiini Alaw

Rɗi n'amai midiɗi paakai na wiiɗi Amoritekai

¹ Adoni-Sedek pai na Yeruzalem a ɵina ɓa Yosva a tikiti Aï ɗa ɗaw, a yiti edi, a za siɗi Aï gaini paiɗi maini na a zaŋ siɗi Yeriko gaini paiɗi nɵa, pra a ɵina ɓa ɗai na Gabawon e zi bonu zi ɵeɗ gaiɗi Izrayel ta lai e simni arbaɗi ca lai.

² Hunai n'amai te yimiɗi buri Gabawon ɗa a fuŋ n'abai n'abai maini fuŋ n'abakai na wiiɗi paakai nɵa, te sûwiti Aï, ɗai na warɗi paŋ e ɗi ɗai zi hatam sal.

³ Adoni-Sedek pai na Yeruzalem a ɵina sini Hoham pai na Hebron, sini Piram pai na Yarmut, sini Yafiya pai na Lakis, sini Debir pai na Eglon lai aŋ miɗiɗi maini nɵa:

⁴ Ki tipisi sa, zini pa aŋ hitimiti Gabawon buri te za bonu zi ɵeɗ gaini Yosva, gaiɗi aliɗi Izrayel lai.

⁵ Paakai na ɵim na wiiɗi Amoritekai, pai na Yeruzalem, pai na hebron, na Yarmut, na Lakis gaini na Eglon lai e tipi e hini gaiɗi askaraiɗi paŋ e sûûri, e pi gobi gaiɗi Gabawon aŋ hitimi gaiɗi.

⁶ Ɗai na Gabawon e ɵini pini Yosva war kaŋ a Gilgal aŋ miɗini maini nɵa: Tiyi ɗaiku zi sda ɗa ku hiniyi edi kai, halasi siyi witaw piliyi edi, zna piyi ta! Buri paakaiɗi Amoritekai n'amai midini huwuŋ par paŋ e diŋgisi midiyi dnak.

⁷ Yosva a hala witaw piɗi a Gilgal gaiɗi ɗaini zi hatam paŋ, gaŋgalaŋai na wiini paŋ lai.

⁸ EPIƊ-ƊAI a miɗini wiini Yosva: Ku hûniɗi kai, buri mu siɗi war tuku ca, ktai n'aga a ɗiya muku aŋ kai.

⁹ Yosva a luɓa midiɗi tizaw, a fana aŋ hili blaŋ haa a Gilgal par.

¹⁰ EPIƊ-ƊAI a ɵiriɗi Amoritekai edi wuzaɗi Izrayel, e fiɗiɗi edi viya gobi gaiɗi Gabawon. E tiki futi piɗi n'e hini amai siɗi Bet-Horon sek, e cikiɗi, e fiɗiɗi a Azeka gaiɗi Makkeda.

¹¹ Won hlai na Amoritekai n'e pri edi wuzaɗi aliɗi Izrayel e hili war gal n'anene par na wiiɗi Bet-Horon ɗa, EPIƊ-ƊAI a hinasi ali-fuŋ n'abakai a yakasi amai par midiɗi haa a Azeka ta, e mri. Nagai n'e mri mini ali-fuŋ ɗa viya e sûwiɗi n'e mri mini kaɵkar ɗa.

¹² Nɵa Yosva a miɗini wiini EPIƊ-ƊAI war mefeŋ na a siɗi Amoritekai war tiɗi Izrayel ɗa, a muɗa wuzaɗi Izrayel paŋ: Futi, ɗiya amai midiɗi Gabawon zaw, Tile ɗiya midini huduk na Ayyalon ɗa zaw lai!

¹³ Futi te ɗiya, tile a ɗiya hilini lai, haa ɗai na Izrayel e rɗi amai midiɗi gawɗi, maini n'aŋ gaini ɗû warni maktuɓ na wiini ɗif na jre ɗa nɵa. Futi te ɗiya zaw amai arbani hlai n'amai, te nawa witaw kai haa gobi yuvai dam.

¹⁴ Mefeŋ na maini hanɗa ɵa a za ka duk kai, wuzani hlai par kaalai, asakal sek kaalai, na EPIƊ-ƊAI a ɵina mini ɗif maini hanɗa nɵa ɗa, buri EPIƊ-ƊAI gaini midini dama a hitima buriɗi Izrayel.

¹⁵ Yosva gaiɗi aliɗi Izrayel na paŋ ɗa e wiyisi aha war kaŋ a Gilgal.

Yosva a fuɗa paakai na ɵim na a rɗa amai midiɗi ɗa edi

¹⁶ Paakai na ɵim e pri edi yaw, e hili e ŋûyi warni waŋ sini huwuŋ na Makkeda.

¹⁷ Ɗai e kinisi labar wiini Yosva, e miɗini ɓa: Paakai na ɵim ɗa e ɗa war ŋoyai war waŋ na sini huwuŋ a Makkeda.

¹⁸ Yosva a muɗa: likiti ali-fuŋ n'abakai, ki finiŋ mini waŋ ɗa, ki mili ɗai mini ca ca aŋ gɗam lai.

¹⁹ Tiki ɗa, ki ɗiyi kai, tiki futi piɗi gawki ɗa, ki fiɗiɗi duɓaɗi par, ki hiniɗi aŋ niyi aha warni fuŋɗi n'abai ɗa kai buri EPIƊ-ƊAI Alaw na wiiki a siɗi war tiki ca.

²⁰ Won hlai na Yosva gaiɗi aliɗi Izrayel e vidiɗi gawɗi edi li, nagai n'e hini karɗi e ŋûyi warni fuŋ n'abakai zi ɵaga.

²¹ Ɗai paŋ e wiyisi aha war kaŋ jam sini Yosva a Makkeda, ɗif ktai na a muɗa seŋ siɗi aliɗi Izrayel nɵa aŋ kai.

²² Yosva a muɗa: Mili mini waŋ ɗa edi, yimiɗisi paakai na ɵim anene, ki kiɗiŋasi.

²³ E zi maini nɵa, e yimiɗisi paakai na ɵim ɗa anene: pai na Yeruzalem, na Hebron, na Yarmut, na Lakis gaini na Eglon lai.

²⁴ Won hlai na e kiɗisi paakai hanɗa wuzani li, Yosva a yikiɗisi ɗai na Izrayel ɗa paŋ, a miɗiɗi wiiɗi abakaiɗi ɗai zi hatam n'e siɗi gaini war hatam maini nɵa: Tûrûsi gobi siɗi paakai hanɗa, bizi eziki pini wuulaɗi. Nagai e tûrûsi e bizi eziɗi pini wuulaɗi lai.

²⁵ Yosva a miɗiɗi: Ki hûni kai, ki ɓiri agul kaalai, ki ɗiyi gdaŋ, ki pi arki, EPIƊ-ƊAI aga a za siɗi gawki n'aga ki hitimiɗi paŋ maini hanɗa nɵa.

²⁶ Asakal hanɗa, Yosva a fiɗiɗi edi, a higiɗi amai sini luwuŋ kiini kiini ɵim, e hini amai sini luwuŋ ɵa haa koskoi.

²⁷ Futi te ŋa ta aŋ nawa ɗa, Yosva a sa futi buri e hûgûɗisi azumai amai sini luwuŋ par, e pûkûɗi azumai warni waŋ n'e ŋûyi warni ɗa, e mili ali-fuŋ n'abakai mini waŋ ɗa ca ca, alini fuŋ ɗa aŋ woni ɵa haa girna.

Yosva a mula fuŋ n'abakai na war gal n'amai sek

²⁸ War mefeŋ ni ɗa, Yosva a tika fuŋ n'abai na Makkeda ɗaw, a fiɗiɗi ɗai na warni gaini paiɗi paŋ edi gaini kaɵkar gaini wazagai na karni n'a na woni paŋ, ɗif ktai maa a hina piɗi kai. A za sini pai na Makkeda maini na a zaŋ sini pai na Yeriko ɗa nɵa.

²⁹ Yosva gaiɗi Izrayel paŋ e fikiɗi war Makkeda par a Libna, a cikiti lai.

³⁰ EPIƊ-ƊAI a siɗi fuŋ n'abai hanɗa war tiɗi gaini paiɗi paŋ, a fiɗiɗi edi gaini kaɵkar haa sini paiɗi ta, ɗif ktai maa a hina piɗi kai. A za sini paiɗi maini na a zaŋ sini pai na Yeriko ɗa nɵa.

³¹ Woni par Yosva gaini ɗai na Izrayel e hili a Lakis, e pi kaŋɗi gobi gaiɗi, e cikiti lai.

³² EPIƊ-ƊAI a sitiɗi Lakis war tiɗi, e tikiti war mefeŋ n'ag'aŋ sulu, a fiɗiɗi edi gaini kaɵkar gaini wazagai na karni na woni paŋ maini na a zaŋ siɗi Libna ɗa nɵa.

³³ Nɵa Horon pai na Gezer a lûwiɗi ɗuwal wiiɗi Lakis. Yosva a rɗa amai midini gaiɗi ɗaini paŋ, a hina ɗif ktai maa piɗi aŋ pra edi kai.

³⁴ Yosva gaiɗi ɗai na Izrayel paŋ e vigi a Lakis par a Eglon, e pi kaŋɗi woni, e cikiti lai.

³⁵ E tikiti warni mefeŋ ni dama, e fiɗiɗi ɗai na woni edi gaini kaɵkar gaini wazagai na woni paŋ, maini n'e ziŋ siɗi Lakis ɗa nɵa.

³⁶ War Eglon par Yosva gaiɗi Izrayel paŋ e hili a Hebron, e hitimiti,

³⁷ e tikiti, e viditi edi gaini kaɵkar gaini paiɗi paŋ, gaini fuŋ n'abakai na piɗi paŋ, gaini wazagai na karni na woni paŋ lai, maini na a zaŋ siɗi Eglon ɗa nɵa. Yosva a tuura fuŋ n'abai edi marwai burini EPIƊ-ƊAI, a fuɗa ɗai na woni kap, ɗif nɵa a hina kai.

³⁸ Yosva gaiɗi ɗai na Izrayel ɗa paŋ e bindi siɗi Debir e hitimiti.

³⁹ E tikiti gaini paiɗi, gaini fuŋ n'abakai na piɗi paŋ, a vidiɗi edi gaini kaɵkar gaini wazagai na karni na woni paŋ, ɗif ktai maa a hina piɗi kai. A za siɗi Debir gaini paiɗi maini na a za siɗi Hebron ɵa, maini na a zaŋ siɗi Libna gaini paiɗi ɵa lai.

⁴⁰ Yosva a rɗa amai midini afti paŋ, a rɗa amai midiɗi paakai na sini huwuŋ, midiɗi paakai na gal n'amai sek, midiɗi paakai na midini afti na plas na gaini zigi lai, a hina ɗif karni kai, wazagai na karni paŋ a vadaŋ edi paŋ, maini n'EPIƊ-ƊAI Alaw na wiiɗi Izrayel a gada midini nɵa.

⁴¹ Yosva a rɗasi amai midiɗi ɗai na Kades-Barneya par haa a Gaza, midini afti na Gozen paŋ haa a Gabawon ta.

⁴² Yosva a yimiɗi paakai hanɗa, a tika aftiɗi paŋ lai war niyi n'edi aŋ hatam ktai, buri EPIƊ-ƊAI Alaw na wiiɗi Izrayel a hitima buriɗi.

⁴³ Asakal par Yosva gaiɗi aliɗi Izrayel paŋ e wiyisi aha war kaŋ, a Gilgal.