Yonas 1 - Ɗû na sɗik na wiini Alaw

Yonas a pra edi wuzani EPIƊ-ƊAI

¹ Seŋ na wiini EPIƊ-ƊAI a muɗa sini Yonas n'ahini Amittai, a muɗa:

² Faka amai hala war Ninive, fuŋ n'abai hanɗa, ɗuula warɗi buri meefeŋɗi a coɗi haa amai sa ta.

³ Nɵa yonas a faka amai a lwa warɗi Tarsis sek gaigai wuzani arn EPIƊ-ƊAI par. A hala Jafa, woni a nava gaini hulum n'abai n'a hala war Tarsis sek; a vurga sulai na wiini hilini, a niya warni hulum n'abai gaiɗi nagai paŋ n'e hili warɗi Tarsis sek edi gaigai wuzani arni EPIƊ-ƊAI par.

⁴ Amma EPIƊ-ƊAI a hinasi berber n'abai midini yem-ra, tizaw mayaw a faka amai a ɵiɓa sini hulum n'abai, a dara maini n'a paŋ nɵa.

⁵ Nagai na war hulum n'abai e hûni gara, asiya asiya ɗi paŋ a siiwa alawni alawni; e puku wazagai zamai zamai viya agoɗom arni yem kapai hulum ɗa a bunda kolek. Yonas, a hala amai wulani hulum, a fana azumai aŋ kala weseŋ.

⁶ Ɗif n'a ŋa hulum a toro sini gobi a miɗini: He, ku kala weseŋ nɵa buri maɗa? Faka amai, siiwa tini Alawku, ablaŋtaŋkai n'a hiina burimu kapai mu bumu kai kai ɗi?

⁷ Nagai paŋ n'e ɗa wa hulum e miɗi arbaɗi: yumumu aduzi arbamu kapai mu suɗumu ɗif n'a kasi seŋ zi gir hanɗa. E ziŋ lai, aduzi a yima Yonas.

⁸ Nɵa, nagai e miɗini: Miɗiyi haw, asar hanɗa a kaŋsi midiyi ɗa asiya ɗa? Sdaku ɗa a maɗa? Ku halasi wata par ɗa? Yaiku t'aŋ wata ɗa? Ku pinziba na wata ɗa?

⁹ A wiyiɗi seŋ a muɗa: Mu ta mu ɗif na Yudiya, mu huna EPIƊ-ƊAI Alaw n'amai n'a za yem-ra gaini afti.

¹⁰ Ɗai hanɗa, hunai n'amai te yimiɗi. E miɗi: Ku za wala hanɗa buri maɗa? Nagai e siɗi ya ɓa, a lawasi edi wuzani arni EPIƊ-ƊAI par buri a miɗiɗi seŋ hanɗa paŋ ya.

¹¹ Ezilbiŋ: Tiyana ɗa mi zi suku ɗa a maɗa? Kapai mayaw hanɗa a tika azumai, a za wala na meefeŋ siyi kai ɗa, buri a riya amai abai a suwa pɗemni?

¹² A miɗiɗi: Tikiŋa, biliŋa agoɗom, aga mayaw a tika azumai buri mu sɗa ya ɓa mayaw n'abai hanɗa mu kaŋsi midiki mu ta.

¹³ Ɗai na war hulum e fili gaini gɗaŋ sini daŋ sek, amma e kiɗi amai kai buri smer a riya amai abai sek sek.

¹⁴ Nɵa, e siiwi tini EPIƊ-ƊAI e miɗi: EPIƊ-ƊAI, ku ba suŋfayi burini ɗif hanɗa kai, ku tika fel na tiyi warni kai midiyi kaalai, buri tuku EPIƊ-ƊAI, ku za wala paŋ na ku daraŋ.

¹⁵ Asakal par tiki Yonas e biliŋ agoɗom arni yem, tizaw mayaw a tika azumai tar.

¹⁶ Hunai na pini EPIƊ-ƊAI te yimiɗi gara, e zi ɓaka wiini EPIƊ-ƊAI, e hi wala miɗi lai.