Yohana 9 - Ɗû na sɗik na wiini Alaw

Yesu a zuula ɗif n'a wa melveŋ

¹ won hlai n'a na vuga, a tala ɗif ktai n'a wa melveŋ.

² Ɗaini zi hitri e zilbiŋ e miɗi: Rabbi, n'a za tuwur ɗa asiya ɗa, a ni zaw, e ɗi tamaini zaw, na kapai a wa melveŋ ɗa?

³ Yesu a waya seŋ a miɗiɗi: A na buri na ɓa, ni zaw, tamaini e zi tuwur ɗa kai, amma a wa nɵa kapai sdani Alaw a siŋka gaglai gaini.

⁴ Na ɓa girvudi te na hai ɗa, a dewele ɓa mu vumu sdani Ni n'a ɵinaŋasi ɗa amai, duvuk te na halasi, woni ɗif a kiɗa aŋ za sda ktai kai,

⁵ won hlai na mu na warɗi yai hai ɗa, mu gaglai na wiiɗi yai.

⁶ Asakal n'a muɗa hanɗa ya, a ɵaɓa teenek azumai, a haɗa afti gaini teenek na mini ɗa; asakal par a likasi afti hanɗa, a girdiŋni arni ɗif zi melveŋ ɗa,

⁷ A miɗini: Hala, ma suku warɗi avai Silowa, a dara a muɗa: Ɵeɗ. Ɗif ɗa a hala a ma sini lai, won hlai n'a wayasi, arni a tala lai.

⁸ Ɗai na ɵimaɗi gaiɗi nagai n'e tiliŋ avut par aŋ siiwa ɗa e miɗi: Hanɗa a ni n'a na ka dam aŋ siiwa kai ɗi?

⁹ Na zamai e miɗi: A ni, na zamai ɗa ɓa: A ni kai, a ɗif n'a sɗa maini ɵa. Amma ni dama a muɗa: Mu ta.

¹⁰ Nɵa e zilbiŋ e miɗini: Arku a mala edi maɵa maɵa ɗa?

¹¹ A waya seŋ, a muɗa: Ɗif n'e yikiŋ ɓa Yesu ɗa, a haaɗa afti, a girdaŋ miɗini ara, a muɗaŋa ɓa: Hala, ku ma suku warɗi avai Silowa, nɵa mu hala woni, mu ma sa, ara a mala edi lai.

¹² E miɗini: Aŋ wata ɗa, ɗif ni ɗa? A waya seŋ a miɗiɗi: Mu sɗa kai.

Farisekai e zilbi ɗif zi melveŋ n'a zuula ɗa

¹³ E ki ɗif n'a na ka melveŋ ɗa wuzaɗi Farisekai,

¹⁴ Yesu a haaɗa afti, a milini arni edi lai war mefeŋ Sabbat.

¹⁵ Farisekai lai e zilbiŋ ɓa: Arni a mala edi maɵa maɵa ɗa? A miɗiɗi: A girdaŋa afti ara, mu ma sa, tiyana mu na tala.

¹⁶ Nɵa zamai arbaɗi Farisekai e miɗi: Ɗif hanɗa a na sini Alaw par kai, buri ɓa a za pini Sabbat ɗa kai. Zamai e miɗi: Ɗif na tuwur ɗa a sɗa aŋ za wazagai zi siŋki na maini hanɗa ɵa maɵa maɵa ɗa? Ɓraw a za arbaɗi.

¹⁷ E zilbi ɗif na melveŋ pra e miɗi: Tuku ɗa, a muluku arku edi mal lai, ku muɗa miɗini maɵa ɗa? A waya seŋ a muɗa: A ɗif na mini Alaw.

¹⁸ Yudiyakai e yimi ɓa a wa melveŋ kapai arni a mala edi gaini mili nɵa kai, haa e yikiɗisi tamaini haw.

¹⁹ E zilbiɗi e miɗi: Hanɗa a ahiki na tiki ki miɗi ɓa a wa melveŋ ɗi? Tiyana arni a bunda a tala maɵa maɵa ɗa?

²⁰ Tamaini e wiyi seŋ e miɗi: Tiyi mi siɗi ɓa a ahiyi, a wa ɗa melveŋ lai.

²¹ Amma tili n'a na tala tiyana ɗa, tiyi mi siɗi hanɗa kai, a milinni arni edi ɗa asiya ɗe tiyi mi siɗi hanɗa kaalai. Zilbiŋ, ni ɗa arwagwi kai, ni dama aga a miɗiki midini wala n'a za sini ɗa.

²² Tamaini e miɗi nɵa buri hunai piɗi wuzaɗi Yudiyakai ta. Buri Yudiyakai e kiti miɗi ta ya ɓa, ɗif n'a yima ɓa ni a Kristu ɗa, e birgiŋ edi warni Sinagogne par.

²³ Tamai e miɗi ɓa a arwagwi kir kai, zilbiŋ na ɗa buri hanɗa.

²⁴ Farisekai e yikisi ɗif n'a na ka melveŋ azi n'ag'aŋ sulu pra, e miɗini: Sini kol wiini Alaw, tiyi mi siɗi ɓa ɗif hanɗa a ɗif na tuwur.

²⁵ Ɗif na melveŋ a waya seŋ a muɗa: A ɗif na tuwur ɗe mu sɗa kai, amma wala ktai na mu sɗaŋ ɗa ɓa, mu na ka melveŋ, amma tiyana mu na tala.

²⁶ E miɗini: A za suku ɗa a maɗa? A muluku arku edi maɵa maɵa ɗa?

²⁷ A waya seŋ a miɗiɗi: Mu midiki ya, tiki ki diri ki ɵiniŋ kai, ki firiyi ki ɵiniŋ pra ɗa buri maɗa? Tiki lai ki diri ki bindi aŋ ɗai zi hitri lai ɗi kai?

²⁸ Farisekai e tirkiŋ e miɗi: Ɗifni zi hitri ku tuku, tiyi mi ɗi ɗai zi hitri na wiini Musus.

²⁹ Tiyi mi siɗi ɓa Alaw a muɗa seŋ gaini Musus, amma ɗif hanɗa mi siɗi hlai n'a halasi woni par kai.

³⁰ Ɗif n'a wa melveŋ a waya seŋ a miɗiɗi: Hanɗa a wala n'a bunda ɗif hiyak kiɗi, tiki ki siɗi hlai n'a halasi woni par kai, paŋ ktai a malaɗa ara edi mal koo!

³¹ Tumu mu suɗumu ɓa Alaw a ɵina miɗi ɗai na tuwarai kai, na ɓa ɗif a sini hormo wiini Alaw a za pini dirini lai ɗa, ɗif hanɗa Alaw a ɵina mini.

³² Mu ɵunumu ka ɓa, ɗif a mala arni ɗif n'a wa melveŋ edi nɵa duk kai.

³³ Na ɓa ɗif hanɗa, a nasi fu sini Alaw par kai ɗa a kiɗa a za wala hanɗa kai.

³⁴ E wiyi seŋ e miɗini: Tuku na ku wa arni tuwur tekiɓ ɗa, ku hiriyi tiyi? E birgiŋ anene.

³⁵ Yesu a ɵina ɓa e birgiŋsi edi su, a nava gaini a miɗini: Tuku ɗa, ku yima pini Ahini ɗif ɗi?

³⁶ A miɗini: Epiɗ-ɗai, Ahini ɗif ni ɗa asiya ɗa, na kapai mu yima pini ɗa?

³⁷ Yesu a miɗini: Ku talaŋ ya, ni n'a na muɗa gaiku na ɗa A ni.

³⁸ Nɵa a muɗa: Mu yima Epiɗ-ɗai, a hurga azumai wuzani.

Na malvanai na jre ɗa e ɗi ɗai maɗa?

³⁹ Yesu a muɗa: Ta, mu halasi warɗi yai buriɗi sariya, kapai n'e tili kai ɗa e tili, n'e tili ɗa e bindi malvanai lai.

⁴⁰ Asakal n'e ɵini seŋ hanɗa ya, Farisekai zamai n'e ɗa gaini e miɗini: Tiyi mi ɗi malvanai lai ɗi?

⁴¹ Yesu a waya seŋ a miɗiɗi: Na ɓa ki ɗi fu malvanai ɗa, tuwurki aŋ kai, amma tiyana ki miɗi ɓa, tiyi mi tili ɗa, tuwurki a na.