Yohana 19 - Ɗû na sɗik na wiini Alaw

¹ Nɵa Pilatus a yima Yesu a siŋɗi buri e ɵiɓiŋ.

² Askarai e hiti bogorai zi hedek e pitini miɗini, e wiini sapa zi pai sini lai.

³ E givilisi mini e miɗi: Lapiya, paiɗi Yudiyakai, e tiki piɗi e ɵiɓiŋ galaini lai.

⁴ Pilatus a niyasi anene pra a miɗiɗi wiiɗi Yudiyakai: Mu na kiŋkisi anene kapai a yima midiki ɓa mu nava wala ktai na mu kûti sariya miɗini pini aŋ kai.

⁵ Nɵa Yesu a niyasi anene, bogorai zi hedek ɗa miɗini tiɓ, sapa zi pai sini ca lai, Pilatus a miɗiɗi: Ɗif ɗa an na.

⁶ Won hlai na paakai n'abakai zi ɓaka gaiɗi ɗaiɗi e tiliŋ ɗa, e ɗûûli e miɗi: Tûkûŋ amai, tûkûŋ amai. Pilatus a miɗiɗi: Tiki dama yimiŋ tûkûŋ amai buri ta mu nava wala na meefeŋ na mu kûti sariya miɗini pini aŋ kai.

⁷ Yudiyakai e wiyini seŋ e miɗi: Tiyi ɗa, gadai zi ɗû ktai a na, pini gadai ni ɗa, sai a mra edi buri a za sini aŋ Ahini Alaw.

⁸ Won hlai na Pilatus a ɵina seŋ hanɗa, hunai te yimaŋ a suwa pra.

⁹ A waya aha a miɗini wiini Yesu: Tuku ku na wata par ɗa? Amma Yesu a wiyini seŋ kai.

¹⁰ Nɵa Pilatus a miɗini: Mu muɗuku ku muɗaŋa kai! Ku sɗa ɓa spak aŋ ta buri mu ɵuku, spak aŋ ta buri mu tukuku amai lai kai ɗi?

¹¹ Amma Yesu a wiyini seŋ a muɗa: Spakku ktai maa mada kai, a sasifu suku amai par kai ɗa. Buri nɵa, ni n'a saŋa war tuku ɗa, tuwurni ɗa abai a suwa paŋ.

¹² Woni par Pilatus a paya aŋ ɵaŋ, amma Yudiyakai e ɗûûli e miɗi: Na ɓa ku ɵaŋ li ɗa, ku marmaini Sezar kai. Asiya ɗi paŋ n'a za sini aŋ pai ɗa a faka amai na ɗa sini Sezar.

¹³ Asakal n'a ɵina seŋ hanɗa ya ɗa, Pilatus a kasi Yesu anene, a sumna azumai midiɗi paramai zi sariya, won hlai n'e yikiŋ ɓa: Hlai zi didigi, war seŋɗi Hebrekai e yikiŋ ɓa: Gabbata.

¹⁴ Hanɗa a mefeŋ na buri zizinini-si na buriɗi fet na wiiɗi Paska, futi girvudi n'arba, Pilatus a miɗiɗi wiiɗi Yudiyakai: Paiki ɗa an na.

¹⁵ Amma e ɗûûli e miɗi: Fiɗiŋ edi, fiɗiŋ edi, Tûkûŋ amai. Pilatus a miɗiɗi: Mu toko paiki ɗa amai ɗi? Paakai n'abakai zi ɓaka e wiyini seŋ: Paiyi zamai aŋ kai, sai Sezar tar.

¹⁶ Nɵa a saŋ war tiɗi kapai e tûkûŋ amai. Nɵa e yimi Yesu

Tûkû n'amai na wiini Yesu

¹⁷ E tikinisi dagrani wulani aŋ libi, a niyasi anene aŋ hala war hlai n'e yikiŋ ɓa keɵke na humok, na war seŋɗi Hebrekai e yikiŋ ɓa: Golgota ɗa.

¹⁸ E tûkûŋ amai war hlai ni ɗa, ɗai zamai gaini sulu lai, ktai war gal hanɗa par lai, ktai war gal hanɗa par lai, Yesu arba tok.

¹⁹ Pilatus a ɗo wala ktai ɗo, a tokoŋ amai sini dagra tok, ɗû na warni maini nɵa: Yesu na Nazaret par, pai na wiiɗi Yudiyakai.

²⁰ Yudiyakai viya e ŋi ɗû hanɗa, buri ɓa hlai na e tuku Yesu amai woni ɗa a na fu gobi gaini fuŋ n'abai ɗa. Ɗû hanɗa a ɗo war seŋ na wiiɗi Hebrekai, gaini latin gaini grek lai.

²¹ Paakai n'abakai zi ɓaka na wiiɗi Yudiyakai e miɗini wiini Pilatus: Ku ɗoŋ ɓa, pai na wiiɗi Yudiyakai kai, amma ɗif hanɗa a muɗa mu pai na wiiɗi Yudiyakai.

²² Pilatus a waya seŋ: Na mu ɗoŋ ɗa, mu ɗoŋ ɗa a ɗû ɵa.

²³ Askarai, won hlai n'e tuku Yesu amai li ɗa, e mili sapani, e ɓûrwiŋ arni puɗu, askar paŋ ɗa gal ktai ktai. E militi ropni na ziigi siɗi kai gaini hi ktai amai par haa azumai ta ɗa yaw lai.

²⁴ E kitiŋ arbaɗi ɓa: Mu ɓusutumu edi kai, amma mu ɓultumu aŋ tambulo kapai mu suɗumu ɗif n'aga te sa sini ɗa. A za nɵa kapai ɗû na a muɗa ɓa: E ɓûrwi sapakaini arbaɗi, E ɓiliti robni aŋ tambulo lai a va amai. Hanɗa a wala na askarai e ziŋ ɗa.

²⁵ Gobi gaini dagrani Yesu ɗa, emini gaiɗi Mariya na tawalɗi emini na munini Klopas gaiɗi mariya Magdelena e ɗi fu ca.

²⁶ Yesu, won hlai n'a tiliti emini gaini ɗif zi hitri n'a daraŋ gara ɗa, ɵimaɗi zaw lai ɗa a miɗiɗi wiiɗi emini: Muni ahiku ɗa an na.

²⁷ Asakal par a miɗini wiini ɗif zi hitri ɗa ɓa: Amuku t'aŋ na. War hlai ni par ɗif zi hitri ɗa a yimiti aha gaini.

Mri na wiini Yesu

²⁸ Asakal hanɗa, kapai ɗû a va amai ɗa, Yesu won hlai n'a sɗa ya paŋ ɓa a vada li ɗa, a muɗa: Sai te na zaŋa.

²⁹ Grak ktai a na fu zaw, gaini vi gaini vin, e rgi tipeɵ na gaini diyɓi arni vinegre mini tini luwuŋ Izop ɓak, e kiŋnisi mini.

³⁰ Won hlai n'a ca vinegre hanɗa, Yesu a muɗa: Paŋ a va amai li, asakal par a pa miɗini azumai, suŋfani a wa edi.

Wuruk na paɵani Yesu

³¹ Hanɗa a mefeŋ na wiini zizinini-si, kapai kopoŋ ɗa a hina amai sini dagra warni Sabbat kai ɗa, buri ɓa Sabbat ni ɗa a mefeŋ n'abai. Yudiyakai e zilbi Pilatus buri e hiɗi eziɗi ɓaw ɓaw, e miliɗisi azumai.

³² Nɵa askarai e hilisi e hiɗi ezini n'avut n'a toko amai sini dagra gaini,

³³ won hlai n'e cûsi sini Yesu ɗa, e niviŋ gaini mri, e hiɗini ezini kir kai.

³⁴ Amma ktai arbaɗi askarai a ɓla paɵani gaiɗi kaway, won hlai ni yem gaini fel a niyasi edi.

³⁵ Ni n'a tala hanɗa a za zaida miɗini lai, zaidani a jre, ni a sɗa ɓa a muɗa na ɗa a jre lai kapai tiki ki yimi.

³⁶ Hanɗa a za nɵa kapai ɗû n'a muɗa ɓa: Keɵkeni ktai maa a haɗa kai ɗa a va amai.

³⁷ Ɗû zamai a na muɗa pra ɓa: Aga e mili arɗi sini Ni na e ɓiliŋ ɗa.

E tiki Yesu azumai war waŋ

³⁸ Asakal hanɗa Yosef na Arimatiya par, a ɗif zi hitri na wiini Yesu amma war kuɗuhai buri hunai na wuzaɗi Yudiyakai, a zilba Pilatus buri a tikasi kopoŋni azumai, Pilatus a sini futi, nɵa Yosef a tika kopoŋ azumai.

³⁹ Nikodemus, ni n'a halasi ka sini duvuk ɗa a cosi lai, a kasi mir gaini yitir zamai lai, a za kilo gobi doogo doogo hu.

⁴⁰ E tiki kopoŋni Yesu ɗa, e rgiŋ gaini sapa, gaini wazagai zi ɗûgûdi zi lûgûzi lai maini na Yudiyakai e pi ɗaiɗi nɵa.

⁴¹ Zardeŋ ktai a na fu won hlai na e tûkûŋ amai warni ɗa, war zardeŋ hanɗa, waŋ na hehe a na fu woni n'e tiki ɗif warni kai hai.

⁴² E tiki Yesu warni waŋ ni ɗa, buri zizinini-si na wiiɗi Yudiyakai buri ɓa waŋ ɗa a na fu gobi.