Yohana 18 - Ɗû na sɗik na wiini Alaw

Yimini Yesu

¹ Asakal n'a muɗa hanɗa ya, Yesu a hala gaiɗi ɗaini zi hiri anene kata wulaɗi avay Sedon par, woni, zardeŋ ktai a na fu, a niya warni gaiɗi ɗaini zi hitri.

² Yudas, an a saŋ edi ɗa, a sɗa hlai hanɗa ya, buri ɓa Yesu gaiɗi ɗaini zi hitri ɗa e tipi ka woni azi viya.

³ Nɵa Yudas, n'a na kiɗi piɗi askarai zi gɗam na paakai zi ɓaka gaiɗi Farisekai lai e ɵiniɗisi ɗa, a cosi a cosi woni gaini kalu z'afu, gaini lampa, gaini wazagai zi hatam lai.

⁴ Yesu, won hlai n'a sɗa wala n'aga a za ya ɗa, a halasi miɗi a miɗiɗi: Ki piyi ɗa asiya ɗa?

⁵ E wiyi seŋ: Yesu na Nazaret par. A miɗiɗi: Mu ta. Yudas n'a firiya a saŋ edi ɗa, a na fu gaiɗi lai.

⁶ Won hlai n'a miɗiɗi ɓa, mu ta ɗa, e wiyi duɓaɗi, e yiki azumai midini afti.

⁷ A waya a zilbiɗi pra: Ki piyi ɗa asiya ɗa? E miɗi: Yesu na Nazaret par.

⁸ Yesu a waya seŋ a miɗiɗi: Mu midiki ya, mu ta. Na ɓa ki piyiŋa mu ta ɗa, hiniɗi nagai hanɗa e hili.

⁹ Hanɗa a za nɵa kapai seŋ n'a muɗaŋ ɓa: Nagai na ku siɗiŋa ɗa mu ba ktai maa edi piɗi kai ɗa a va amai.

¹⁰ Simun Peter n'a na fu gaini kaɵkar, a sotoŋ, a bla bege na wiini pai zi ɓaka n'abai ɗa, a pirta ɵimaɗi na wus ɗa edi.

¹¹ Yesu a miɗini wiini Peter: Waya kaɵkarku war sutoni, kup na wiini gir na Apa a sitiŋa ɗa, kapai mu siti kai ɗi?

Yesu wuzani Anna, pai zi ɓaka n'abai

¹² Askarai gaini abaiɗi, gaiɗi askarai zi gɗam na wiiɗi Yudiyakai lai e yimi Yesu e niggiŋ,

¹³ e kiŋ wuzani Anna na suwulni Kaifas n'a na fu aŋ pai zi ɓaka n'abai warni buza ni ɗa.

¹⁴ A Kaifas n'a siɗi yel wiiɗi Yudiyakai ɓa: A pɗem ɓa ɗif ktai a mra buriɗi ɗai na gaini abaiɗi ɗa.

Peter a ɓuɓura mini ɓa a ɗif zi hitri na wiini Yesu kai

¹⁵ Simun Peter gaini ɗif zi hitri zamai ktai lai e hili pini Yesu. Ɗif zi hitri ni ɗa, pai n'abai zi ɓaka ɗa sɗaŋ ya, a niya ahani pai n'abai zi ɓaka ɗa gaini Yesu.

¹⁶ Peter, ni a hinasi anene par mini magala, ɗif zi hitri na ktai na pai zi ɓaka n'abai a sɗaŋ ɗa, a niyasi anene a muɗa gaiɗi muni na te giɗima mini hlai ɗa, te ɵasi Peter aha.

¹⁷ Nɵa na na te giɗima mini hlai ɗa, te miɗini wiini Peter ɓa: Tuku ɗa ku ktai arbaɗi ɗai zi hitri na wiini ɗif hanɗa kai ɗi? A waya seŋ a muɗa: Mu ɗif ni kai.

¹⁸ Ɗai zi sɗa gaiɗi askarai zi gɗam n'e ɗi fu woni ɗa, e pi afu tiɓ, morjoni a yima mekele keŋ buri ɓa hlai smer, e ɗi fu aŋ kûpi siɗi mini. Peter a ɗiya gaiɗi zaw aŋ kopo sini lai.

Pai n'abai zi ɓaka a zilba Yesu

¹⁹ Pai zi ɓaka n'abai a zilba Yesu midiɗi ɗaini zi hitri gaini hitri n'a na hitraŋ ɗa lai.

²⁰ Yesu a waya seŋ a muɗa: Ta mu miɗiɗi wiiɗi ɗai ɗa edi papɗak, kureɗ mu hitra amlai warni Sinagogne gaini tempel lai na Yudiyakai paŋ e diŋgi woni ɗa, mu muɗa ka seŋ warni kuɗuhai kai,

²¹ ku zilbaŋa buri maɗa? Na mu muɗa na ɗa, zilbiɗi nagai n'e ɵini ma ɗa, nagai e siɗi wala na ta mu muɗaŋ ɗa ya.

²² Won hlai n'a muɗa hanɗa, askar zi gɗam ktai a na fu woni, a ɵiɓa Yesu galaini a muɗa: Ku waya seŋ ɵa na ɗa wiini pai n'abai zi ɓaka tiɓ!

²³ Yesu a wiyini seŋ a muɗa: Na ɓa mu muɗa ɗa a meefeŋ ɗa, siŋkaŋa meefeŋ na mu muɗaŋ ɗa, Na ɓa mu muɗa ɗa afutini ɗa, ku ɵiɓaɗa buri maɗa?

²⁴ Nɵa Anna a ɵinaŋ gaini rgi ɓak wiini Kaifas, pai n'abai zi ɓaka.

Peter a ɓuɓura mini burini Yesu pra

²⁵ Simun Peter a ɗiya zaw aŋ kopo sini, ɗai e miɗini: Tuku lai ku ktai arbaɗi ɗai zi hitri kai ɗi? Peter a ɓuɓura mini a muɗa: Ta mu ktai arbayi kai.

²⁶ Ktai arbaɗi ɗai zi sɗa na wiini pai n'abai zi ɓaka, na zigelni ɗif na Peter a pira ɵimaɗi edi ɗa a muɗa: Ta mu tulukusi warni zardeŋ gaini ko!

²⁷ Peter a ɓuɓura mini, won hlai ni Yugur a yika.

Yesu wuzani Pilatus

²⁸ Ahani kaifas par e ki Yesu aha warni dalamni Lawan, a za na ɗa gorof par. Nagai gaini midiɗi dama e niyi aha warni dalamni Lawan ɗa kai, kapai e zi siɗi haharai kai, kapai e simi simi na wiiɗi fet na wiiɗi Paska ɗa.

²⁹ Pilatus a niyasi anene miɗi a muɗa: Seŋ na meefeŋ na ki niviŋ sini ɗif hanɗa a na wata ɗa?

³⁰ E wiyi seŋ e miɗini: Ɗif hanɗa a na fu meefeŋ kai ɗa, mi kiɗi mi kiŋsi wuzaku kai.

³¹ Nɵa Pilatus a miɗiɗi: Tiki dama yimiŋ, zini sariya pini gadai na wiiki. Yudiyakai e miɗini: Futi te sa siyi buri mi fiɗi ɗif kai.

³² A za nɵa kapai seŋ na Yesu a muɗaŋ ɗa a va amai, miɗini mri n'aga a mra gaini ɗa.

³³ Pilatus a niya a waya aha warni dalamni, a yika Yesu a miɗini: Tuku ɗa ku paiɗi Yudiyakai ɗi?

³⁴ Yesu a waya seŋ a miɗini: Ku muɗa hanɗa gaini muduku dama zaw, e muɗuŋku mada ɗa e ɗi ɗaiɗi?

³⁵ Pilatus a waya seŋ, a miɗini: Ta mu ɗif na Yudiya ɗi? E sukusi ta na ɗa e ɗi ɗaiku gaiɗi paakai zi ɓaka, ku za ɗa a maɗa?

³⁶ Yesu a waya seŋ a muɗa: Pay na wiya ɗa te na warɗi yai hanɗa kai, te na fu na warɗi yai hanɗa, an na ta ɗa, ɗaiŋa e hitimi pa ya, kapai mu sa edi tiɗi Yudiyakai kai, amma pai na wiya te na won na kai.

³⁷ Pilatus a miɗini: Tuku ɗa ku pai ɗi? Yesu a waya seŋ a miɗini: Ku muɗa ɓa mu pai na ɗa ku tuku, ta ɗa mu wa, mu halasi warɗi yai lai buri mu muɗa edi miɗini jre, asiya ɗi paŋ n'aŋ warni jre ɗa a ɵina ma.

³⁸ Pilatus a miɗini: Jre ɗa a maɗa? Asakal n'a muɗa hanɗa ya, a niya anene siɗi Yudiyakai pra a miɗiɗi: Ta mu nava seŋ ktai na meefeŋ na mu rgaŋ pini nɵa aŋ kai.

Sariya zi mri te ɗukla midini Yesu

³⁹ Amma maini na mu ɗuma zuŋmu kûreɗ-kûreɗ ɵa, mu ɵiki ɗif ktai miɗi fet na wiiɗi Paska suwa suwa ɗa, tiyana miɗi haw, mu ɵiki paiɗi Yudiyakai ɗi?

⁴⁰ Nɵa nagai paŋ e tiki piɗi e ɗûûli e miɗi: Ɗif ni kai, a Barabas. Barabas ni ɗa a ɗif na gorɓolo.