Yohana 17 - Ɗû na sɗik na wiini Alaw

Yesu a siiwa buriɗi ɗaini zi hitri

¹ Asakal n'a muɗa hanɗa ya, Yesu a bunda arni amai war hlai n'amai a muɗa: Apa, hlai a cosi li, sa kol wiini Ahiku kapai Ahiku a suku kol lai.

² Maini na tuku ku sini spak midiɗi ɗai paŋ, nɵa lai ku sa suŋfa n'a vada kai wiiɗi nagai paŋ na tuku ku siɗini.

³ Suŋfa n'a vada kai hanɗa, a na ɗa ɓa e suɗuku tuku Alaw na ktai na Jre, gaini Ni na ku ɵinaŋsi, Yesu Kristu.

⁴ Ta ɗa mu suku kol midiɗi yai, mu va sɗa na ku saŋ war ta aŋ zaŋ ɗa amai.

⁵ Tiyana ɗa, Tuku Api, sitiŋa abai amai gaiku, abai na mu na ka warɗi gaiku wuzani hlai na yai te za kai hai ɗa.

⁶ Mu siŋka yikuku edi gaglai wiiɗi nagai na ku miliɗisi edi arbaɗi ɗai na yai par ku siɗiŋa, e ɗi ka ɗa e ɗi na wiiku, amma ku siɗiŋa ca, nagai e yimi seŋku lai.

⁷ Tiyana ɗa, nagai e siɗi ya ɓa, wala paŋ na ku saŋa ɗa, a halasi na ɗa suku par.

⁸ Buri mu siɗi seŋku na ku saŋa ɗa, e yimi lai, e siɗi fakat ɓa mu halasi suku par, e yimi ɓa ku ɵinaŋasi ku tuku lai.

⁹ Ta ɗa mu siiwa na ɗa buriɗi nagai, mu siiwa buriɗi ɗai na yai ɗa kai, amma buriɗi nagai na ku siɗiŋa, buri ɓa e ɗi na wiiku.

¹⁰ Mu sɗa ɓa wala n'a wiya paŋ ɗa a wiiku, wiiku tuku ɗa a wiya lai, mu nava kol buriɗi nagai lai.

¹¹ Mu na warɗi yai ɗa kir kai, nagai e ɗa warɗi yai, ta mu na halaɗi suku, Api na sɗik, giɗimiɗi war yikuku, yiki na ku saŋa ɗa, kapai e zi ktai maimu tumu nɵa.

¹² Won hlai na mu nasi ka gaiɗi ɗa, ta mu giɗimiɗi war yikuku, yiki na ku saŋa ɗa. Mu giɗimiɗi, ktai arbaɗi par a ba edi kai, sai a ni n'a sa edi buri bi n'edi ɗa, kapai ɗû ɗa a va amai.

¹³ Tiyana mu na halaɗi suku, mu muɗa ɵa na ɗa warɗi yai par kapai firiyi na wiya a va amai warɗi marwai.

¹⁴ Ta mu siɗi seŋku ya, ɗai na yai ɗa e bili gaw siɗi buri e ɗi ɗaiɗi yai kai, maini na ta mu ɗifɗi yai kai ɗa nɵa.

¹⁵ Mu siiwuku na ɗa buri ɓa ku miliɗi edi warɗi yai par ɗa kai, amma buri ku kûtiɗi wuzani meefeŋ.

¹⁶ E ɗi ɗaiɗi yai kai, maini na ta mu ɗifɗi yai kai ɗa nɵa.

¹⁷ Ziɗi edi aŋ sɗik gaini jre, seŋku ɗa a jre.

¹⁸ Maini na tuku ku ɵinaŋasi warɗi yai ɗa nɵa, ta lai mu ɵiniɗi edi warɗi yai.

¹⁹ Ta ɗa mu za sa edi aŋ sɗik gaini mada dama buriɗi kapai nagai lai e zi edi aŋ sɗik gaini jre.

²⁰ Mu siiwa na ɗa buriɗi nagai hanɗa kiiɗi kai, Amma buriɗi nagai n'aga e yimi wara pini seŋ na wiiɗi lai.

²¹ Kapai paŋ e zi ktai, maini na tuku Api k'aŋ wara, ta warku tuku lai nɵa, nagai lai e simni warmu kapai ɗai na yai e yimi ɓa ku ɵinaŋasi ɗa ku tuku.

²² Ta ɗa mu sitiɗi abai na tuku ku sitiŋa ɗa kapai e zi ktai e zi ktai maini na tumu mu ɗumu ktai nɵa.

²³ Ta warɗi nagai, tuku wara ta lai, kapai a va amai war tipi na ktai kapai ɗai na yai e siɗi ɓa ku ɵinaŋasi ɗa ku tuku, e siɗi ɓa, ku diriɗi maini na ku daraŋa nɵa.

²⁴ Amma nagai na ku siɗiŋa ɗa, Api, mu dara ɓa hlai na ta m'aŋ woni ɗa, nagai lai e simni gaya kapai e tiliti abai na wiya na ku sitiŋa buri ku daraŋa ɗa wuzani piɗi yai zi tiki.

²⁵ Api na ɗikat, ɗai na yai ɗa e suɗuku duk kai, amma ta mu suɗuku, nagai e siɗi ya ɓa ku ɵinaŋaɗi ku tuku;

²⁶ Mu siŋkiɗi yikuku ya, aga mu siŋkiɗi pra kapai diri na ku daraŋa gaini ɗa a sumna warɗi maini na ta m'aŋ warɗi ɵa.