Yohana 16 - Ɗû na sɗik na wiini Alaw

¹ Mu midiki nɵa ɓa kapai wala zi dibi azi a za buriki kai.

² Aga e birgiki edi war Sinagogne par, hlai n'a na halasi na woni ɗif n'a fiɗiki li ɗa, a hiina ɓa a za ɗa a ɵeŋni Alaw.

³ Aga e zi hanɗa, buri e siɗi Api duk kai, e siɗiŋa ka duk kaalai.

⁴ Mu midiki nɵa buri ɓa, won hlai na hlai a cosi li ɗa, midiki aga a kɵa ɓa mu miɗiŋki ya. Mu midiki hanɗa war pi zi tiki par kai buri mu na fu gaiki.

Sdani ni n'aga a zina piki ɗa

⁵ Tiyana ɗa, mu na hala sini Ni n'a ɵinaŋasi ɗa, ktai n'arbaki n'aga a zilbaŋa ɓa, ku hala fu wata ɗi ɗa aŋ kai.

⁶ Buri mu miɗiki maini hanɗa nɵa ɗa, kwimi a viti agulki ta.

⁷ Amma ta ɗa mu miɗiki jre, a pɗem buriki ɓa, ta mu hala ɗaw, na ɓa mu hala kai ɗa, ni n'a zina piki ɗa aga a halasi siki kai, amma na ɓa mu hala li ɗa aga mu ɵiniŋkisi.

⁸ Won hlai n'a cosi li ɗa, aga a siŋkiɗi wiiɗi ɗai miɗini tuwur, miɗini jre ɗikat, midiɗi sariya lai.

⁹ Midini tuwur ɗa, buri na ɓa ɗai e yimi wara kai.

¹⁰ Midini jre ɗikat buri ɓa mu na hala sini Apa, nɵa aga ki tiliŋa kir kai.

¹¹ Midiɗi sariya ɗa, buri ɓa paiɗi yai hanɗa sariyani te za ya.

¹² Seŋ aŋ ma viya pra aŋ miɗiŋki, amma gdaŋki a ɵaŋ tiyana kai.

¹³ Won hlai n'a halasi li ɗa, ni Seze na jre ɗa aga a ɵa wuzaki war jre, buri aga a muɗa ɗa gaini midini dama kai, amma aga a muɗa ɗa a seŋ n'a ɵinaŋ ɗa paŋ, aga a miɗiki midini wazagai n'aga a zaŋ ɗa paŋ lai.

¹⁴ Ni ɗa aga a saŋa kol buri aga a mula warni wazagai na wiya par a muɗaŋ edi siki.

¹⁵ Wazagai na wiini Api paŋ ɗa a wiya, mu miɗiki ɓa aga a mula warni wazagai na wiya par aŋ saŋ siki ɗa burini hanɗa.

Kwimi a bunda aŋ firiyi

¹⁶ Safai agwi aga ki tiliŋa kir kai, asakal par safai agwi aga ki tiliŋa.

¹⁷ Nɵa Zamai arbaɗi ɗaini zi hitri e miɗi arbaɗi marɗi: A firiya a muɗumu na ɗa maɵa? Safai agwi, aga ki tiliŋa kir kai, asakal par safai agwi aga ki tiliŋa, pra mu na hala sini Apa.

¹⁸ Nɵa e miɗi: Safai agwi ɗa a siŋka ɗa a maɗa? Wala n'a muɗa miɗini na ɗa, tumu mu suɗuŋmu kai.

¹⁹ Won hlai n'a sɗa ɓa e diri e zilbiŋ ɗa, Yesu a miɗiɗi: Ki sispi arbaki na ɗa miɗini seŋ n'a muɗa ɓa: Safai agwi aga ki tiliŋa kir kai, asakal par safai agwi aga ki tiliŋa ɗa?

²⁰ Jre, jre, mu miɗiki Tiki aga ki tûwi, aga ki ɵi hama siki lai, amma ɗai na yai ɗa aga e firiyi, tiki aga ki kwimi, amma kwimi na wiiki aga a bunda aŋ firiyi.

²¹ Muni ɗa, won hlai na te na poko ɗa, t'aŋ warni kwimi, buri ɓa lerɗi ɗa a cosi li, amma won hlai na te poko ahiɗi li puk ɗa, midiɗi a wula gaini girɗi ɗa, buri firiyiɗi abai ɓa te wa ahi warɗi yai.

²² Nɵa ɗa, tiki tiyana ki ɗa war kwimi, amma aga mu tiliki pra, agulki aga a firiya lai, ɗif a kiɗa a tika firiyi hanɗa edi warki par kai.

²³ War mefeŋ ni ɗa tiki aga ki zilbi wala tini Api kir kai. Jre jre, n'aga ki zilbiŋ war tini Api paŋ ɗa, ni aga a siŋki war yikiŋa.

²⁴ Haa tiyana, ki zilbi wala ktai war yikiŋa kai hai. Zilbi aga a sa siki, kapai firiyi na wiiki a va amai marwai.

Yesu a rɗa li amai midiɗi yai

²⁵ Mu midiki wazagai hanɗa paŋ war seŋ zi siŋka maini, amma hlai a na halasi na woni aga mu muɗa war seŋ zi siŋka maini kir kai, amma aga mu miɗiki edi gaglai midini Api.

²⁶ War mefeŋ ni ɗa, aga ki zilbi wala war yikiŋa, mu miɗiki na ɓa aga mu zilba Api buriki mu ta kai,

²⁷ buri Api gaini midini dama a marmaiki, buri tiki ki ɗi ka ki ɗi marmakaiya, tiki ki yimi jre ɓa mu halasi sini Alaw par.

²⁸ Mu halasi sini Api par, mu halasi warɗi yai, tiyana mu hiniti yai, mu waya sini Api.

²⁹ Ɗaini zi hitri e miɗi: Tiyana ku na muɗa edi gaglai, ku na muɗa warni seŋ zi siŋka maini kir kai,

³⁰ Tiyana mi siɗi ɓa, ku sɗa wazagai paŋ, jaaku a na ɓa ɗif a zilbuku haw kai, mi yimi ɓa ku halasi sini Alaw par na ɗa burini hanɗa.

³¹ Yesu a waya seŋ a miɗiɗi: Tiyana ki yimi li?

³² Hlai a na halasi, a halasi ya lai, Tiki aga ki ɵiri edi sa par, ɗif paŋ aga a tikiti futini futini, aga ki hiniŋa kiya ktai, amma m'aŋ kiiya ktai kai buri Api aŋ gaya.

³³ Mu midiki nɵa ɓa kapai ki simni ɵeɗ gaya, warɗi yai ɗa aga ki nivi gir, amma pi arki. Ta ɗa mu rɗa amai midiɗi yai ya.