Yohana 1 - Ɗû na sɗik na wiini Alaw

Yesu Kristu a suŋfa, a gaglai

¹ War pi zi tiki ɗa, seŋ a nasi ka, seŋ a nasi ka gaini Alaw, seŋ a Alaw lai.

² Seŋ a nasi ka war pi zi tiki gaini Alaw.

³ Wazagai n'a za paŋ ɗa, a zaŋ ɗa A ni, wala ktai n'a na, n'a za ɗa gaini kai ɗa aŋ kai.

⁴ Suŋfa aŋsi warni, suŋfa ɗa a gaglai na wiiɗi ɗai lai.

⁵ Gaglai a za gaglai war gegeŋ, amma gegeŋ a kiɗa a yimaŋ kai.

⁶ Ɗif ktai a luɓasi, a ɵinaŋsi ɗa a Alaw, yikini Yohana.

⁷ A halasi aŋ zaida, aŋ zaida miɗini gaglai, kapai ɗai paŋ e yimi warni ɗa pini Ni.

⁸ Ni ɗa a gaglai ɗa kai, a halasi ɗa buri a za zaida miɗini gaglai.

⁹ Seŋ n'a na ka ɗa a gaglai na jre, n'a za gaglai midiɗi ɗai paŋ, a halasi warɗi yai.

¹⁰ A na fu arbaɗi ɗai warɗi yai, ɗai warɗi yai ɗa a rgiɗi ɗa A ni, amma nagai e siɗiŋ kai.

¹¹ A halasi aha arbaɗi ɗaini, amma ɗaini e yimiŋ siɗi kai.

¹² Amma wiiɗi nagai paŋ n'e yimiŋ siɗi, gaiɗi nagai n'e yimi warni lai ɗa, a siɗi spak aŋ bindi aŋ alini Alaw.

¹³ Nagai ɗa e wiiɗi ɗa a neŋ-si gaini fel kai, e wi pini dirini ɗif kaalai, amma pini diri na wiini Alaw.

¹⁴ Seŋ ɗa a bunda edi aŋ neŋ-si, a za simnini arbamu, tiyi mi tiliti abaini Abai na wiini Ahi na ketekeɗik na te sasi sini Api par. T'abai zi yum, t'abai na jre lai.

¹⁵ Yohana a za zaida miɗini, a ɗuula a muɗa: Hanɗa A ni na mu muɗa miɗini ɓa: Ni n'a na halasi duɓa par ɗa, a vugasi wuza par ya, buri wuza a na fu.

¹⁶ Buri tiyi ɗa, piɗi abaini ɗa mi nivi wala paŋ, Yum war balamni yum lai.

¹⁷ Buri gadai ɗa a sasi gaini Musus, yum gaini jre ɗa a halasi gaini Yesu Kristu.

¹⁸ Ɗif a tala ka Alaw duk kai, ni n'a siŋkaŋsi edi ɗa a Alaw n'ahi na ketekeɗik n'a na gaini Api ɗa.

Zaida na wiini Yohana si Baptisme miɗini sini dama

¹⁹ Won hlai na Yudiyakai e ɵiniɗi paakai zi ɓaka gaiɗi Levitekai lai a Yeruzalem par sini Yohana buri e zilbiŋ ɓa: Tuku, ku siya ɗi ɗa, a ziɗi zaida maini nɵa.

²⁰ A sɗa sini, a pa mini miɗini kai, a muɗa ɓa: Ta ɗa mu Kristu kai.

²¹ E zilbiŋ, e miɗi: Ku siya kiɗi, k'Aliyas ɗi? A muɗa: Ta mu Aliyas kai. Ku ɗif na mini Alaw ɗa ɗi? A waya seŋ a muɗa: Zaw kai.

²² Na ɓa ɵa ɗa, tuku ku siya ɗa? Kapai mi siɗi aŋ wiyiɗi seŋ wiiɗi nagai n'e ɵiniyisi ɗa, tuku ku muɗa muduku dama maɵa ɗa?

²³ A muɗa: Ta, mu wule n'a wa edi war basga na kaɗataŋ ɓa: Ki kiti warɗi futi na wiini Epiɗ-ɗai kal kal, maini na ɗif na mini Alaw Esaya a muɗaŋ ɗa nɵa.

²⁴ Nagai na e ɵiniɗisi sini ɗa, e ɗi Farisekai.

²⁵ E zilbiŋ e miɗini: Na ɓa ɵa ɗa, tuku ku sa baptisme buri maɗa, na ɓa tuku ku Kristu kai, k'Aliyas kai, ku ɗif na mini Alaw kaalai ɗa?

²⁶ Yohana a wiyiɗi seŋ: Ta mu za baptisme gaini yem, amma ktai a na arbaki na, tiki sɗiŋ kai,

²⁷ a na halasi duɓa par, ta ɗa mu dai dai na mu pla sogomni harabakni edi kai.

²⁸ Wazagai hanɗa a za war Betaniya, anene duɓani ra Yurdan par, won hlai na Yohana a za baptisme woni.

Na Yohana zi baptisme a muɗaŋ burini Yesu

²⁹ Dawaini a tala Yesu a na halasi sini, a muɗa: Tili, hanɗa Ahiɗi adumi na wiini Alaw n'a tika tuwur na wiiɗi ɗai na midiɗi yai edi.

³⁰ A ni na mu muɗa miɗini ɓa: Ɗif a n'a halasi duɓa par, A ni na mu muɗa miɗini ɓa: Ktai a n'a halasi duɓa par, a vugasi wuza par ya, buri won hlai na m'aŋ kai hai ni a na fu.

³¹ Ta maa, mu na ka mu sɗaŋ kai, na ɓa mu halasi aŋ za baptisme gaini yem ɗa, mu zaŋ ɵa ɓa kapai a siŋka edi arɗi Izrayel.

³² Yohana a za zaida miɗini maini hanɗa nɵa: Mu tala Seze a yorosi azumai war fuŋ-n'Alaw par maini dere nɵa, a halasi a sumna miɗini.

³³ Ta maa, mu na ka mu sɗaŋ kai, ni n'a ɵinaŋasi aŋ za baptisme gaini yem ɗa, a muɗaŋa ɓa: Ni n'aga ku tala Seze a yorosi azumai midini, a sumna miɗini lai ɗa, A ni n'aga a sa baptisme gaini Seze ɗa.

³⁴ Ta mal mu tala wala hanɗa, mu za zaida miɗini lai ɓa: Ni a Ahini Alaw.

Ɗai zi hitri n'avut na wiini Yesu

³⁵ Dawaini pra, won hlai n'a na gaini ɗiyi zaw gaiɗi ɗaini zi hitri gaini sulu lai,

³⁶ a tala Yesu a na vuga, a muɗa: Ahiɗi-adumi na wiini Alaw ɗa an na.

³⁷ Ɗai zi hitri na sulu ɗa e ɵini seŋ hanɗa e tipi pini Yesu.

³⁸ Yesu a bunda arni duɓani, a tiliɗi e ɗa hilisi pini, a miɗini: Ki piyi ɗa a maɗa? E miɗini: Rabbi, a dara a muɗa: Api zi hitri, hlaiku zi simni aŋ wata ɗa?

³⁹ A miɗiɗi: Ki hilisi kapai ki tiliŋ, e hilisi e tili hlai n'a sumna warni, mefeŋ ni e simni gaini, a za gobi sa puɗu na wiini koskoi.

⁴⁰ Andre na tawalni Simun Peter ɗa, a na g'aŋ sulu n'e ɵini labar hanɗa mini Yohana par, n'e tiki futi pini Yesu lai ɗa.

⁴¹ A halasi tar a nava gaini Simun na tawalni mal, a miɗini: Tiyi mi nivisi Mesiyas ɗa ya, a waya edi ɓa: Kristu.

⁴² A kinisi pini sini Yesu. Yesu a talaŋ a muɗa: Tuku ku Simun n'ahini Yohana, amma aga e yukuku ɓa: Kefas, a waya edi ɓa: “Ahi-fuŋ”.

Yesu a yika Filip gaini Nataniyel

⁴³ Dawaini a firiya a waya war Galeliya, a nava gaini Filip, Yesu a miɗini: Tapasi pa.

⁴⁴ Filip a na Betsaida par, a fuŋ n'abai na wiini Andre gaini Peter.

⁴⁵ Filip a nava gaini Nataniyel a miɗini: Ni na Musus a muɗa miɗini war ɗû, na ɗai na mini Alaw e miɗi miɗini lai ɗa, mi niviŋ ya, hanɗa a Yesu na Nazaret par n'ahini Yosef.

⁴⁶ Nataniyel a miɗini: Wala na pɗem a kiɗa a halasi aha warɗi Nazaret par ɗi? Filip a miɗini: halasi, talaŋ haw le.

⁴⁷ Yesu a tala Nataniyel a na halasi sini sek, a muɗa miɗini maini nɵa: Hanɗa a ɗif na Nazaret mal mal, a muɗa na ɗa a hinini fas.

⁴⁸ Nataniyel a miɗini: Ku sɗaŋa wata ɗa? Yesu a wiyini seŋ: Wuzani hlai na Filip a yukuku sek ɗa, ku na fu azumai pini luwuŋ Fige, mu suɗuku ya.

⁴⁹ Nataniyel a muɗa: Rabbi, Ahini Alaw, ku tuku, paiɗi Izrayel ku tuku lai.

⁵⁰ Yesu a miɗini: Ku yima na ɗa buri mu muɗuku ɓa, mu tuluku pini luwuŋ Fige ɗa ɗi? Aga ku tala wazagai n'abakai n'a suwa pra.

⁵¹ Jre jre, mu miɗiki Aga ki tili hlai n'amai ɗa a mala edi wuzani arki, aga ki tili ɗai zi ɵeŋ na wiini Alaw, e hi amai, e niyisi azumai, e hi amai, e niyisi azumai midini Ahini ɗif.