Yob 9 - Ɗû na sɗik na wiini Alaw

Yob a wiyini seŋ wiini Bildad: Ɗif a kiɗa a sispa gaini Alaw ɗi?

¹ Yob a waya seŋ a muɗa:

² A futini, mu sɗa ɓa na ku muɗaŋ na ɗa a na ɵa, ɗif murɗek ɗa, jreni na wuzani Alaw a na wata ɗa!

³ Na ɓa ɗif a dara a sispa gaini ɗa, a muɗa haa dubu, a wiyini seŋ ktai ma kai.

⁴ Yelni abai gara, spakni abai lai, n'a kiɗa a ɗiya mini zaw a nava seŋ kai ɗa asiya ɗa?

⁵ A zogo huwaŋai edi gai habar tini kai, war hiyni, a hogoŋ azumai lai.

⁶ A muguza afti war balamni, gaarakai na pini ɗa, a gigiɗa amai,

⁷ a kiɗa a ɗiliti futi te diyasi amai kai, zaw, a hina meeɵek a za gaglaini kai.

⁸ hlai n'amai ɗa, a gaŋaŋ edi kiini, a hala amai midini mayaw na war yem-ra n'abai.

⁹ A zizina meeɵek n'e yikiŋ ɓa: Urs, diŋis dawra pekne gaini farani meeɵek zamai na war gal n'amai sek ɗa lai.

¹⁰ A za wazagai n'abakai n'a bunda ɗif hiyak, sdani na pɗamai a pɵa tini ɗif kai.

¹¹ A vuga ɵima ɗaw ma mu kiɗa mu talaŋ kai, a hala ɗaw ma mu sɗa kai,

¹² Na a zini gdaŋ miɗini aŋ wayasi wala n'a tikaŋ gaini gdaŋ ɗa asiya ɗa? Zaw n'aga a miɗini ɓa: Ku za ɵa na ɗa a maɗi ɗa asiya ɗa?

¹³ Alaw a za li hiy ɗa a waya asakal kai, wazagai na maswarai n'agoɗom pini yem: Rahab gaiɗi marni na zamai ɗa paŋ a na azumai pini.

Gdaŋ jaaɗi kai

¹⁴ Na ɓa a na ɵa ɗa, mu kiɗa mu wiyini seŋ ɗa maɵa maɵa ɗa, seŋ na mu tikaŋ ma aŋ miɗiŋni tiɓ ɗa, a na wata ɗa?

¹⁵ Koo ɓa meefeŋŋa aŋ kai tekeɗeɗi, mu miɗini na maɵa, mu tuwa ɗa a tuwi sini n'a zitiŋa sariya ɗa bas.

¹⁶ Koo mu yikaŋ a ɵina ta kaw ɗi ɗa, mu sɗa ɓa aga a ɵina seŋ na mu miɗiŋni ɗa kai.

¹⁷ Ni n'a na vadaŋa edi gaini gir n'abai, n'a na riya wurukŋa amai sek sek pini wala ktai ta kaalai.

¹⁸ A hina kaw mu suŋfa kai, a vaŋa gaini marava.

¹⁹ Na ɓa a zi gdaŋ ma, gdaŋ ɗa a Ni, na ɓa a zi sariya maa, ɗif n'a zitiyi sariya n'arbaɗi aŋ kir kaalai.

²⁰ Koo ɓa jre ɗa a wiya ma, na mu muɗaŋ ma par ɗa aga a rgaŋa, koo ɓa ta war seŋ kai kaw, meefeŋ ɗa a wiya ɵa.

²¹ Mu na ɗa seŋ aŋ mada ma mu sɗa hanɗa kai, simni na kara a baza ma ta.

²² Maini na mu muɗaŋ ɗa ɵa, ɗif na tini war seŋ kai, gaini ɗif na seŋ aŋ miɗini ɗa a wala ktai, Alaw a vidiɗi edi sulu paŋ.

²³ Na ɓa gir a cosi tizaw midiɗi ɗai, a fiɗiɗi ɗai edi lai ɗa, Alaw a riya gaini riyi piɗi nagai na tiɗi war seŋ kai n'e ɗa siɗi gir ɗa.

²⁴ Na ɓa afti a sa li tiɗi ɗai na maafanai ɗa, Alaw a digiɗi arɗi paakai n'e ɗûklûti sariya, na ɓa a zaŋ ɗa a ni kai ɗa, asiya kiɗi?

²⁵ Mefeŋŋa a na lawa kokolai a sûwiɗi ɗai zi luwi ɗa, a vuga ɗa war gir ɵa.

²⁶ A vuga maini hulomai n'abakai n'e ziŋ gaini vayai ɵa, maini muka n'a yorasi amai par miɗini wala nɵa.

²⁷ Na ɓa mu hiina li ɓa mu wula mada gaini huwyi n'aŋ sa ɗa, mu hina marava mak, mu yimiti agula lai ɗa,

²⁸ girŋa n'aŋ sa ɗa paŋ a mulaŋa hunai pa, mu sɗa ɓa tuku Alaw, ku yimaŋa aŋ ɗif na tini war seŋ kai kai.

²⁹ Na ɓa meefeŋ mu ta ɗa, mu kaya sa zamai aŋ bulaŋ buri maɗa?

³⁰ Koo ɓa mu ma sa gaini zabul, koo ɓa mu ma ta gaini hum tekeɗeɗi,

³¹ aga ku waŋŋa arni zilgit, koo sapa na sa ma aga mu bunda arni hihir.

³² Buri ɓa Alaw ɗa a ɗif maya ɵa kapai mu wiyini seŋ kai, na kapai mi hili mi ɗiyi wuzaɗi sariya miɗi maryi sa kaalai.

³³ Na ɓa ɗif a na fu arbaɗi zaw, n'a kiɗa a ɓirwiyi edi siɗi maryi par ɗa mariya,

³⁴ aga a caka Alaw cak a ɵiɓa kir kai, hunai na mu huna wuzani ɗe aga vada edi lai.

³⁵ Nɵa mu kiɗa mu miɗini seŋ hunai pa kai, amma a na ɵa kir kai, m'an na kiya pal.