Yob 7 - Ɗû na sɗik na wiini Alaw

Yob a ɵa hama gaini Alaw

¹ Yob a muɗa pra, simnini ɗif warɗi yai ɗa a na maini na wiini askar ɗa nɵa kai ɗi? Mefeŋni a na maini ɗif n'a za sda burini vrak nɵa kai ɗi?

² Maini bege n'a na paya seze nɵa, maini ɗif zi sda n'a na baiya vrakni nɵa lai,

³ Ta ɗa, bulum na wiya a tile yaw na wiini gir, godai na wiya ɗa a feŋ na war gir ɗa lai:

⁴ Mu fana li azumai tar ɗa, mu zilba sa ɓa: Mu faka amai na ɗa kaswa kiɗi ɗa? Hlai ɗe a sɗasi edi kir kai, mu hina waŋ aŋ bunda miɗini liyŋa haa gorof par.

⁵ Atla a mula sa ca, amur-sa ɗa a fufuta, a ɓasa, a ka alu lai.

⁶ Mefeŋŋa ɗa a vuga witaw, a suwa wala n'e dibiri e duzi gaini ɗa, Won hlai na sogom na wiini biyi na pini ɵeɗ a vada li ɗa a ɗiyini lai.

⁷ Alaw, ku hina muduku a wula kai ɓa suŋfaŋa ɗa a smer kadai, ɓa ara aga a tala muluk katawai duk kir kai.

⁸ Tuku na arku a na ka mada ɗa, aga ku talaŋa kir kai, aga ku paya futi aŋ talaŋa, amma aga ku navaŋa kir kai.

⁹ Ɗif n'a niya azumai warni hlai zi simni na wiiɗi ɗai zi mri a kiɗa a wayasi amai kai, maini ɗugul n'a bla amai, asakal par a giyha edi nɵa.

¹⁰ A kiɗa a wayasi aha war dalamni kir kai, hlai n'a za fuŋ woni ɗa, ɗai e siɗiŋ kir kaalai.

¹¹ Nɵa ɗa, mu kiɗa mu ba ma kir kai, diriŋa tekeɗe mu muɗa bas, war maravaŋa kaw, mu ɵa hama bas.

¹² Ku tika ɗif ma ta da aŋ giɗimaŋa ɗa, mu yem-ra n'abai zaw, mu wala n'abai ɗi?

¹³ Mu fana azumai sek ɗa, mu hiina ɓa aga mu nava arai zi pi war weseŋ ɗi, girŋa ɗa aga a tika azumai agwiya ɗi,

¹⁴ amma ku halasi ku huwyaŋa gaini weseŋ zi pɵi, ku mulaŋa hunai pa gaini wazagai zi siŋki pra.

¹⁵ Mu rga funa sa amai ɓak ma marya, mri pɗem pɗem sini simni zi gir hanɗa.

¹⁶ Hinaŋa mak, mu hina fu ɵa gamai zaw, suŋfaŋa maa a smer meere kadai, hinaŋa gaini hangala haw.

¹⁷ Ɗif murɗek ɗa ku zaŋ aŋ wala n'abai nɵa maruwai maɵa maɵa ɗa, na kapai hangalku gaini tiki sini ɵa ta,

¹⁸ na kapai gorof gorof paŋ ku tala sdani paŋ, ku tetemaŋ gaini yafai kai lai ɗa maɵa maɵa ɗa?

¹⁹ Kapai ku mula arku pa kir kai ɗa, kaswa ta ɗa? Aga ku hinaŋa mu rɓa teenek agwi nɵa kaswa ta ɗa?

²⁰ Na ɓa mu za tuwur suku ɗa, na mu zuku ɗa a na wa ɗa? Tuku na ku mula arku piɗi ɗai gara, ku yimaŋa aŋ kaltam buri maɗa? Mu bunda buriku aŋ wala na guma nɵa buri maɗa?

²¹ Ku kiɗa ku yima hi-n'amai midini gadai na wiya suku kai ɗi, ku kiɗa ku haza meefeŋ na wiya ɗa edi kai ɗi? Buri ɓa mu ŋa ta, mu waya fu na azumai arni afti, aga ku payaŋa, amma m'aŋ kir kai.