Yob 5 - Ɗû na sɗik na wiini Alaw

Pi zi tiki na wiini ɗif na meefeŋ

¹ Ɗuula, na ɓa ɗif n'a zina puku a na ɗa? Aga ku ɗuula mini ɗif zi ɵeŋ na wata ɗa?

² Aakam, ɗif na tatala ɗa a mra mini hiy, na gaini niiyi kai ɗa a fuɗaŋ ɗa a sile lai.

³ Aftini, mu tala ɗif na tatala ktai a za farai, amma won hlai na mu tala dalamni, mu tusaŋ, mu muɗa:

⁴ A juva ɓa alini ɗa ɗif a zina piɗi kai, wuzaɗi sariya ɗe e rgiɗi li ɗa, ɗif a piliɗi edi kaalai.

⁵ Wazagai n'a tapaŋ amai ɗa, ɗai na wiyamai te ziɗi ɗa e simiŋ, gaini ɵaɓ na sini paŋ tekeɗeɗi e miliŋ, ɗai na walaɗi aŋ kai ɗa, e mili faraini lai.

⁶ Buri ɓa meefeŋ ɗa a niyasi azumai arni afti par kai, haw ɗe te diyasi arni afti par kaalai.

⁷ Ɗif murɗek a na buri a sɗa gir maini afu n'a luɓa, n'a pra amai arni smer ɗa nɵa.

⁸ Ɓa Mu na fu war balamku mu ta ɗa, mu bunda ara ɗa sini Alaw, mu virnini na sa paŋ lai.

⁹ Ni n'a za wazagai n'abakai na tini ɗif a ɵa mini kai, na sdani zi hiila ɗa, pɵani aŋ kai.

¹⁰ A hina faŋ a ɵa midiɗi yai ɗa a Ni, a ɵa faŋ edi war basga ɗa a Ni lai.

¹¹ Nagai n'azumai piɗi marɗi par ɗa, a yimiɗisi amai, nagai na war kwimi ɗa, a siɗi pli n'edi lai.

¹² A bubuɵa hiiniɗi ɗai na maafanai ɗa, n'e diri e ziŋ paŋ ɗa aɵa edi kai.

¹³ Ɗai na yalakai ɗa a yimiɗi war azaw na wiini yelɗi dama, kitini-mi na wiiɗi zi rhai ɗa a nafa kir kai.

¹⁴ Girvudi ɗa, gegeŋ a dûgûɗi azumai duk, girvudi n'arba ɗa, e tipiki gaini tipiki maini na duvuk ɗa nɵa.

¹⁵ Nɵa ɗa, Alaw a kurɗa ɗif na murga ɗa edi mini kaɵkarɗi na miɗi par, mini tetrekɗi zi spak ɗa par lai.

¹⁶ Nɵa ɗai na hurofai ɗa e kiɗi e biyi pini ɵeɗ, nagai n'e zi meefeŋ ɗe miɗi a doogo lai.

¹⁷ Buri nɵa ɵeɗ aŋ miɗini ni n'Alaw a gdaŋ ɗa, Yob ɗa, ku bla edi sini wala n'Alaw zi spak paŋ a dara a hutruŋku ɗa kai.

¹⁸ Buri ɓa ni ɗa a za wuruk li wiini ɗif ɗa a rga mini ɗa, a haɗa ɗif li ɗa a yimaŋ lai.

¹⁹ A kiɗa a puluku edi mini gir par azi ɵaara, azi n'ag'aŋ muguzak ɗa kaw, a hina meefeŋ a tutumuku kaalai.

²⁰ War wiyamai aga a hunuku ku mra kai, War hatam ɗe aga a kurɗuku mini kaɵkar par.

²¹ Aga a pa tini muduku kapai seŋ na miɗi na ɗai na maafanai ɗa a pa suku kai. Kapai ku huna ɓilki n'edi n'a cosi ɗa kaalai.

²² Ɓilki n'edi gaiɗi wiyamai ɗa, aga ku riya pini gaini riyi, wazagai na buza ɗe aga ku huna wuzani kaalai.

²³ Wala na meefeŋ aga a za sini vowaiku kai, aga e pûkû ali fuŋ warni kai, wazagai na buza ɗe aga a zuku wala meefeŋ kaalai.

²⁴ Aga ku nava ɵeɗ aha war dalamku, hlaiku n'aga ku tala farani faraiku ɗa, n'aŋ kai ɗa aŋ kai.

²⁵ Pinzibaku aga e sisiɗi viya, aliɗi aliku ɗa aga e bindi viya maini evek n'edi buza nɵa.

²⁶ Aga ku niya azumai warni waŋ sek gaini gdaŋku warku, maini algama zi rgi n'e piŋ amai tiɓ ɗa nɵa.

²⁷ Tala, wala hanɗa tiyi mi hiiniŋ haa mi niviŋ ɓa a na maini hanɗa nɵa, a jre lai, tuku ɗa, ku hiina pɗem, yima seŋ hanɗa aŋ wiiku lai.