Yob 41 - Ɗû na sɗik na wiini Alaw

¹ Na ɓa ɗif a baiya ɓa aga a rɗa amai midini leviatan ɗa, a wula ɗa a wili. Buri won hlai na ɗai e tiliŋ li tar ɗa, e yiki azumai.

² Ɗif n'agulni a huna kai, n'a kiɗa ɵurgoŋsi pini aŋ kai; nɵa ɗa, ɗif n'a kiɗa a ɗiya ma ta ɗa asiya ɗa?

³ N'a tufaŋa ka wala ta, kapai mu virgiŋni ɗa asiya ɗa? Wazagai na midini afti paŋ a wiya kai ɗi!

⁴ Mu dara mu muɗa midini amur-sini leviatan, gaini gdaŋni, gaini jufni lai. pinzibani

⁵ Ɗif n'a wa sapa na sini edi ɗa asiya ɗa? N'a niya amlai arbani sesiyeŋni asiya ɗa?

⁶ N'a milini ka mini amai gaini gdaŋ ɗa asiya ɗa? Sesiyeŋ n'a gara mini garra ɗa, a mula hunai piɗi ɗai.

⁷ Fotorok na paɵani maini gamar ɵa, gdaŋai, jufai lai. Gaini wi pini marni ɗik ɗik maini n'e diɓikiŋ gaini wala nɵa.

⁸ Gaini diɓiki mini marni duɓak duɓak; smera ka arbani kai.

⁹ Gaini rgi sini marni, a yima marni kaŋ kaŋ, a ɓurwa edi sini marni par kai.

¹⁰ A tursuma li ɗa, afu a niyasi edi war mini par, arni ɗa a sɗasi maini hlai na rum rum na gorof par nɵa.

¹¹ Afu n'abai gaini afu n'a luma pre pre a niyasi edi war mini par.

¹² Agiyiŋ a niyasi edi merfeŋni par, maini agiyiŋ na war dognai na te huura nɵa. Maini na war gadlaŋ na gai suwi kaŋ nɵa lai.

¹³ Smer na mini par ɗa, a yiba min afu amai, alesni afu a niyasi edi wulani par.

¹⁴ Gdaŋni aŋ sini wulani, ɗai paŋ e rûvi wuzani.

¹⁵ Neŋ na sini gai wi arni marni ɗik ɗik, gai ciki sini kiŋ, a muguza kai.

¹⁶ Agulni gdaŋ maini kiryit ɵa, gdaŋ maiɗi funi zi siri wai nɵa.

¹⁷ Na ɓa a yimasi wulani amai li warɗi abaini ɗa, wazagai zi spak paŋ a huna, hunai a giɵiriɗi, e kûti siɗi.

¹⁸ Ɗif a fakasi li ɓa aŋ hitimaŋ ɗa, kaɵkar a sumaŋ kai, kawai te sumaŋ kai, yaala a sumaŋ kai, ɓaraw kaalai.

¹⁹ A tala kawai ɗa arni maini evek ɵa, kiya maini luwuŋ na gani simi ta nɵa lai.

²⁰ A lawa wuzani ɓaraw kai, kirnai na warni viliyu ɗa, a talaŋ sini maini evek ɵa.

²¹ Atala dafgas sini maini evek ɵa, a riya gai riyi pin suuraɗi kawai ɗa.

²² Warni n'azumai ɗa, wala warni gai pi tiɓ tiɓ maini ɓere na mini sûweɗ sûweɗ nɵa, hlai n'a vuga li warni ɗaw ɗa, balamni a hina maini balamni kawai zi gɵi afti n'e sipiŋ nɵa.

²³ A huurasi yem n'azumai par pin hlai amai, maiɗi dognai na te huura nɵa. A bunda yem-ra n'abai ɗa aŋ wala n'e yi wala zi ɗûgûdi zi lûgûzi woni.

²⁴ Futi n'a vuga li warɗi ɗaw ɗa, te hina gaglai su. Pini yem n'azumai na hulum ɗa, a bunda maini ayir na muɗukwi na midini ɗif na wel nɵa.

²⁵ Midini afti ɗa, ɗif n'a ŋa miɗini aŋ kai, a rga ɗa, hunai warni kaalai.

²⁶ Wazagai n'edi buza na gdaŋai ɗa, a riya pini gai riyi, a pai na midini paŋ lai.