Yob 40 - Ɗû na sɗik na wiini Alaw

Yob a wiyini seŋ wiini Alaw azi n'avut

¹ EPIƊ-ƊAI a waya a tika seŋ a miɗini wiini Yob:

² Tuku zi siŋki yel ɗa, ku firya ku miisa sda na wiini Alaw zi spak ɗa ɗi? Tuku zi miisi Alaw ɗa, ku kiɗa ku waya seŋ pin seŋ hanɗa paŋ ɗi?

³ Yob a waya seŋ wiini EPIƊ-ƊAI a muɗa:

⁴ Ta mu wala ktai na wa ɗa, mu wuyuku seŋ na ɗa maɵa ɗa? Mu dogo ta li ma.

⁵ Mu muɗa ɗa a viya, mu muɗa fu seŋ zamai kir kai. Na mu muɗaŋ ta na ɗa, wala zamai na mu tikaŋ mini aŋ kir kai.

Yob ɗa a firya a za sini aŋ Alaw ɗi?

⁶ Arbani berber n'abai par, EPIƊ-ƊAI a zilba Yob a miɗini:

⁷ Za barka, zizina suku ka aŋ wus ta, aga mu zilbuku, ku wayaŋa seŋ.

⁸ Ku firya ku sɗa jre na wiya kai gazi gazi ɗi? Ku firya ku tika seŋ sa, kapai tuku ku za edi aŋ jre ɗi?

⁹ Tuku, gdaŋku maya ta Alaw ɵa ta ɗi? Wulaku ɗa a wa gdaŋ mai na wiya ɵa ta ɗi?

¹⁰ Na ɓa a na ɵa ɗa, wa kûlûni-si suku, wuti abai suku lai ganasi suku gaini juf, gaini ŋili lai.

¹¹ Siŋkasi hiyku ɗa edi, mula arku midiɗi nagai n'e kûli siɗi paŋ ɗa, hiɗiɗi azumai.

¹² Mula arku midiɗi nagai n'e kûli siɗi paŋ, wiyiɗi azumai kirpiɗi na maafanai won hlai n'e ɗi woni ɗa,

¹³ wiiɗi azumai pin afti dûgûɗi war daŋgai na wiini mri ɗa;

¹⁴ Nɵa ta lai aga mu kuluku buri ɓa siɗiku ɗa a suku rɗi n'amai.

Wala n'abai n'arni yem

¹⁵ Tala wala n'abai n'arni yem ɗa haw ɗa! Mu rgaŋ mu ta, maini na mu rguku tuku ɗa ɵa. A luma kuzum maini ɵeŋ nɵa.

¹⁶ Gdaŋni a na sini ɓlaɓlamaini, spakni a na sini sirdai na warni lai;

¹⁷ a huliti giɗirini edi kaŋ maini luwuŋ Sedre nɵa. Sirdai na sini ɓalakni ɗa gaini wi arni marni ɗik ɗik;

¹⁸ keɵkeni ɗa maini tiyo zi kiya nɵa, harawni ɗa, maini kawai na faifai a gɵaŋ nɵa.

¹⁹ A abaini sda na ta Alaw mu zaŋ ɗa paŋ; Ta na mu rgaŋ ɗa, mu ŋa miɗini mu ta ktai.

²⁰ A nava simini ɗa amai sini huwuŋ, war hlai na wazagai na buza a ɵa dawaŋ woni ɗa.

²¹ Amma a fana ɗa azumai pin luwuŋ, a ŋoya ɗa warni avakai, azumai pin vayai;

²² luwaŋai na ɵimaɗi avai ɗa, a gunaŋ azumai, a tika seze miɗini.

²³ Na ɓa yem-ra a bunda li a ka gaini gdaŋni maa, a huwya sini kai koo ɓa yem-ra Yurdan a ma gurɗokni kaw ɗa, sini gai hangalni waŋ.

²⁴ Na ɓa arni edi ca ɗa, a kiɗa a yima kai ɗi? A kiɗa a yima warni azaw kapai e ɓili merfeŋni ɗi?

Leviatan

²⁵ Aga ku yima leviatan ɗa gaiɗi zuwti maiɗi azuguni ɵa ɗi? Ku kiɗa ku bulasi mini gai kadrai ɗi?

²⁶ Ku kiɗa ku pa wala merfeŋni ɗi? Ku ɓula galaini gaini kawai ɗi?

²⁷ Aga a siiwuku ɓa ku ɵaŋ su kiɗi ɗi? Aga a muɗuku gaini wule na pɗem, kapai ku za hanɗa ɗi?

²⁸ Aga a za bonu ktai gaiku ta, kapai a hina aŋ begeku ɵa, haa sin mrini ta kiɗi ɗi?

²⁹ Aga ku ɵa dawaŋ gaini maini wala zi ɗufli ɵa ɗi? Aga ku rgaŋ azumai ɓak, kapai aliku na falakai ɗa, e ɵi dawaŋ gaini ɗi?

³⁰ Ɗai aga e tipi sini tap aŋ wûriŋ edi ɗi? Zaw ɗai zi cakala aga e ɓûrwiŋ arbaɗi ɗi?

³¹ Ku kiɗa ku ɓula amurni gaini kawai tiɓ tiɓ ɗi? Zaw ku ɓula midini gaini turum ɗi?

³² Titimaŋ haw le, aga ku talaŋ, na ɓa dawai zamai ku waya li pini ɗa.