Yob 4 - Ɗû na sɗik na wiini Alaw

Miɗi na wiini Elifaz: Ɵeɗ midini ɗif n'Alaw a gdaŋ

¹ Elifaz na Temaŋ par a wiyini seŋ wiini Yob:

² Na ɓa mu muɗuku li seŋ ɗa ɗe, hiiniku ɗa a tuura tûûri lai, kapai ɗif a muɗa mini edi kai zaw.

³ Tuku na ku na ka ku sa arai zi pi wiiɗi ɗai viya, ku pla hiiniɗi nagai na kayai a suwa gdaŋɗi amai.

⁴ Seŋ na ku muɗaŋ ɗa a ɗûpiɗi nagai n'e ɵiɓi tukum, a sa gdaŋ wiiɗi nagai n'e kiyi tini libini gir ɗa lai ɗa.

⁵ Tiyana a za li suku tuku ɗa, gdaŋku ɗa a yimaŋ kir kai, n'a pa amai suku tiɓ ɗa hangalku a turla amai marwai.

⁶ Tuku na marmaini Alaw, ku ɗiya yimiku miɗini kir kai, payaiku na ɗikat ɗa a hunuku aŋ baiya pini ɵeɗ kir kai ɗi?

⁷ Hiina pɗem, ku tala ka ɗif na tini war seŋ kai a mra mini gir ɗa wata ɗa? Ɗai na payaiɗi ɗikat e vidi edi mini gir ɗa wata ɗa?

⁸ Na ta mu sɗa ɗa ba nagai n'e bili meefeŋ gaiɗi nagai n'e sûwiɗi gir ɗa, nagai dama aga e hiɗiŋ lai.

⁹ Alaw aga a fiɗiɗi edi gaini smer na mini, Won hlai n'a za li hiy ɗa a vidiɗi edi.

¹⁰ Alaw a ɗiya nûûmi na wiini gurnai gaini tuwi na wiini ahraw, a haɗa sesiyeŋni alini gurnai edi lai.

¹¹ Nɵa gurnai ɗa a mra buri wala n'a lumaŋ aŋ kai, aliɗi gurnai ɗa a ɵara edi.

¹² Seŋ ktai a sasi sa tizaw war kuɗuhai, ɵima a ɵina ŋûriyini lai.

¹³ Hanɗa a za war duvuk war weseŋ zi pɵi, Won hlai na weseŋ n'abai a yima ɗai ɗa,

¹⁴ hunai n'abai a yimaŋa, haa keɵkeŋa paŋ a ziriya.

¹⁵ Smer ktai a niya sa vuuwa, a faka ayir na sa paŋ amai.

¹⁶ Ɗif ktai a ɗiyasi amai wuza, a ɗif na mu sɗaŋ kai, himir himirni a hina ɵa zaw, asakal par mu ɵina wulani a na muɗa maini nɵa:

¹⁷ Ɗif murɗek ɗa jreni a suwa Alaw ɗi? Zaw hilu a suwa ni n'a rgaŋ ɗa ɗi?

¹⁸ Ɗai zi ɵeŋ na wiini maa a pɵa midiɗi kai, hlai zamai a niviɗi war wili,

¹⁹ azi gama ɗa, nagai n'e ɗa war si z’ afti, n'e niyisi edi arni afti par, na ɗif a kiɗa a kirpiɗi maini aduwai nɵa ɗa.

²⁰ Vidiɗi n'edi ɗa a kiɗa yuvai kai, e vidi edi nɵa gamai, a fuɗa sini ɗif kaalai.

²¹ Sogomni suŋfaɗi a rawa raw, aga e mri, e siɗi yel ɗa kai.