Yob 38 - Ɗû na sɗik na wiini Alaw

Miɗi na wiini EPIƊ-ƊAI sini Yob

¹ Nɵa warni berber n'abai ɗa par, Alaw a zilba Yob a miɗini:

² Tuku ku siya ɗa na ku firiya ku dogo hiiniŋa gaini seŋku zi miɗi na baiya kadai ɗa?

³ Mu siiwuku, zizina suku aŋ wus ta, aga mu zilbuku ku wayaŋa seŋ lai.

EPIƊ-ƊAI a pai midiɗi yai paŋ

⁴ Ku na fu wata zaw ɗa, hlai na mu toro eziɗi yai ɗa azumai ɗa? Na ɓa ku zi siɗi gara ɗa, muɗaŋa haw.

⁵ Ɗif n'a kata mogoɗi ɗa asiya ɗa, ku sɗaŋ ɗi? Zaw n'a yima sogom aŋ kataŋ siɗi ɗa asiya ɗa?

⁶ Gaarakai na piɗi ɗa a ɗiya midini a ma ɗa? Fukuni n'azumai pi tar ɗa a tikiti woni ɗa asiya ɗa?

⁷ Won hlai na meeɵek na gorof a na ka a ɗuula gaini firiyi, won hlai n'alini Alaw e ɗi ka e ɵiɓi tiɗi ɗa, ku na fu wa ta zaw ɗa?

⁸ Won hlai na yem-ra n'abai a na ka a firiya a niyasi azumai par arni afti ɗa, ɗif n'a dûgûni mini ɗa asiya ɗa?

⁹ Won hlai na mu za ɗugul ɗa aŋ sapa na sini, gegeŋ na tikiɗim aŋ borgo na sini lai ɗa, ku na fu wa ta ɗa?

¹⁰ Won hlai na mu sini gadaiŋa, mu pa porte na mini, gaini kawakai n'e ɵi mini gaini lai ɗa, ku na fu wa ta ɗa?

¹¹ Won hlai na mu miɗini wiini Yem ra n'abai ɗa ba: Ku halasi haa warni hlai hanɗa nɵa ta, ku suwaŋ edi kai, kûlûni-si na wiini mayawku ɗa a ɗiya nɵa ta.

¹² Warni wiiku par na ɗa, mefeŋ ktai ku sa ka miɗi wiini hlai na gorof ɓa: Sɗasi edi ɗi? Zaw, ku siŋkini ka wiini hlai na rum rum ɓa: Hlaiku ɗa a hanɗa,

¹³ kapai a yima miɗi yai ɗa kaai a kusuraŋ, kapai ɗai na maafanai e puku edi ɗi?

¹⁴ Won hlai na hlai rum rum, afti paŋ a bunda mekele maini grak na gaini kirhi nɵa, a bunda maini na ɓa, a wa sini ɗa a sapa zi fet nɵa.

¹⁵ Amma ɗai na maafanai ɗa veglek na wiiɗi aŋ kai, ɗif n'a na ka a faka amai aŋ za meefeŋ ɗa gdaŋni a vada edi.

¹⁶ Ku hala ka war hlai na yem-ra n'abai a liwasi woni par duk ɗi? Ku paya ka azumai warni hulumni yem-ra n'abai ɗa duk ɗi?

¹⁷ Mini magala na wiiɗi ɗai zi mri ɗa, ku talaŋ ka duk ɗi? Ku tala porte na mini sezeni mri ɗa duk ɗi?

¹⁸ Afti na gaini abaini waŋ ɗa, abaini maɵa ta ɗa ku sɗaŋ ya ɗi? Na ɓa ku sɗa hanɗa ya ɗa, muɗaŋa haw ɗa?

¹⁹ Futi na wiini gaglai ɗa, te na ɗa wa ta ɗa? Gegeŋ ɗa a sumna wa ta ɗa?

²⁰ Na kapai ku sɗa haga n'arbani, kapai ku sɗa futi n'a hala ahaɗi sek ɗa lai ɗa.

²¹ Ku sɗaŋ kai maɵa? Ku wa na ɗe gamai par lai, buzaku ɗe viya ta lai lai ɗa! Ku sɗaŋ ya ɵa ka.

²² Ku hala won hlai na mu hina maaɗai zi glas woni ta ɗa ya ɗi?

²³ Maaɗai zi glas gaini wutiŋ hanɗa mu mulaŋ edi burini mefeŋ zi gir, burini mefeŋ zi hatam, burini mefeŋ zi gaw.

²⁴ Gaglai ɗa a ɵara edi ɗa wa ta par ɗa? Smer na piɗi futi na dawai par a vuvuwa midini afti paŋ wa ta par ɗa? Ku sɗaŋ ya ɗi?

²⁵ Na a ɓasa baŋa wiini faŋ n'abai ɗa asiya ɗa? Na ɓisitini futi wiini wilɗi gaini Alaw zi ɓarai da asiya ɗa?

²⁶ Ɗif n'a hina faŋ a ɵa midini afti na ɗai warni kai, edi war basga na kaɗataŋ na ɗif murɗek warni kai,

²⁷ kapai afti na huleŋ a ca yem haa a va, a hina seyem gaini evek a diyasi amai, a wula amai lai ɗa asiya ɗa?

²⁸ Faŋ ɗa epini ɗa asiya ɗa? Maaɗai ɗa, a waŋsi ɗa asiya ɗa?

²⁹ Emini glas ɗa te siya ɗa? Na te wa maaɗai zi glas ɗa tesiya ɗa?

³⁰ War sarti ni ɗa, yem a bunda gdaŋ maini kiryit ɵa, midini yem n'amai ɗa a haɓa kaŋ lai.

³¹ Tala meeɵek n'arbani hlai n'amai ɗa, ku kiɗa ku rga meeɵek n'e yikiŋ ɓa diŋis sini marni, zaw ku ɓurwa meeɵek n'e yikiŋ ɓa dawra-pekne edi sini marni par ɗi?

³² Ku kiɗa ku diyasi meeɵek paŋ war sartini ɗi? Ku kiɗa ku kiti maaɵiki n'amai n'e yikiti ɓa emini tile, urs gaini n'agogoi na piɗi ɗa ɗi?

³³ Gadai na war hlai n'amai ɗa, ku sɗaŋ ɗi? Sdani na warɗi yai ɗa, ku zaŋ ɗa ku tuku ɗi?

³⁴ Ku firya ku ɗuula ɗugul zi faŋ, kapai a hinasi faŋ a ɵa muduku ɗi?

³⁵ Wilɗi n'a wulɗa na ɗa, ku ɵinaŋ na ɗa ku tuku ɗi, Wilɗi hanɗa a kiɗa a muɗuku ɓa: Mu cosi ya, mu na ɗi?

³⁶ Ɗif n'a sini yel wiini wala zi ɗufli n'e yikiŋ ɓa ibis ɗa asiya, zaw n'a sini siɗi wiini yugur ɗa asiya ɗa?

³⁷ Ɗif na gaini yelni, n'a kiɗa pɵa ɗugul zi faŋ na war hlai n'amai ɗa, n'a yorosi mini birmil zi faŋ, kapai faŋ na warni a budumasi azumai,

³⁸ kapai alogodo ɗa a bunda aŋ ŋoroɓok, afti na gdaŋ a duɓuka midini marni lai ɗa asiya ɗa?

Alaw a pai midini wazagai n'ezini puɗu puɗu paŋ

³⁹ Tuku ɗa ku piyiɗisi wala zi simi miɗi gurnai na muni ɗa ku tuku ɗi? Ku sa simi mini alini gurnai ɗa ku tuku ɗi?

⁴⁰ Won hlai n'a na amlai warni waŋni rok rok, zaw a na riɓta wala arni hlai ɗa?

⁴¹ Ku sini simi mini alini zeleke ɗa ku tuku ɗi, won hlai n'alini a faka li aŋ tuwa sini Alaw buri wiyamai n'a na fuɗaŋ ɗa?