Yob 37 - Ɗû na sɗik na wiini Alaw

¹ Buri hanɗa agula te muguza amlai wara te dara te niyasi edi wara par

² ɵini, ɵini wulani Alaw n'a na ɓara ɗa, ɓarai n'a na niyasi edi war mini par ɗa

³ Wulani a na wa, a hinaŋ a wa edi war hlai n'amai ɗa paŋ wilɗini a ŋala haa edi war koŋɗi yai na puɗu paŋ

⁴ Asakal par a ŋurya ɵigim ɵigim wulani n'abai ɗa a wa pra a ɓara li ɗa a hina wilɗi a ŋala.

⁵ Won hlai n'Alaw a ɓara ɗa, a za wazagai zi hiila n'abakai a za wazagai n'abakai n'a suwa gdaŋmu

⁶ A miɗini wiini maɗɗai zi glas buri a wa midini afti a muɗa hanɗa sini faŋ n'a ɵa abai, sini faŋ n'a ɵa dai dai gaini n'a ɵa abai a suwa lai

⁷ Won hlai n'a za hanɗa li ɗa, a caka sda na tiɗi ɗai paŋ kapai a yima midiɗi lai ɓa a rgiɗi ɗa a ni

⁸ wala n'edi buza ɗa, ayima sini edi war waŋni a sumna war hlai n'a fana woni.

⁹ Barawai ɗa a halasi sin smer na war gal n'amai par ɗa par, hlai na ɗarak ɗa, a halasi sin smer na war gal n'azumai par lai

¹⁰ Gaini smer na mini par ɗa, Alaw a za glas, a haɓa yem gdaŋ maini ali-fuŋ nɵa.

¹¹ A bula yem war ɗugul zi faŋ ɗa, ɗugul n'a wulɗa ɗa, a ɵaraŋ edi lai

¹² A guna ɗugul war gal paŋ ɗa a ni, maini n'a hiinaŋ ɵa, kapai a za pin wala n'a miɗiɗi gaini aŋ ziŋ warɗi duniya na gaini abaiɗi paŋ.

¹³ Na ɓa a dara a za gir wiini afti, zaw a dara a za pɗem sini ɗa, a zaŋ ɗa gaini hanɗa

¹⁴ Tuku Yob, tika hangalku sini wazagai hanɗa, hiina hulum miɗini sda n'abakai n'Alaw a na zaŋ ɗa.

¹⁵ Ku sda yel n'Alaw a kaŋ gaini ɗi? Wilɗi n'a wuulɗasi warni ɗugul zi faŋ ɗa par ɗa, ku sɗa futini ɗi?

¹⁶ Ɗugul n'a hiŋila amai arbani hlai n'amai gaiɗi yai ɗa, ku sɗa yel n'a ɗiya gaini ɗi? Wazagai zi hiila hanɗa a zaŋ ɵa ɗa a siɗi na gaini futini na jre kai ɗi?

¹⁷ Won hlai na smer z'afu na war gal n'amai par a niyasi midini afti, suku ɗa a gobo amlai warni sapa na suku.

¹⁸ Tuku ɗa ku kiɗa aŋ zina pini Alaw aŋ gaŋa hlai ‘amai ɗa edi gdaŋ kaŋ, aŋ bundaŋ maini kotron zi kawai nɵa ɗi?

¹⁹ Tiyana ɗa, miɗiyi haw ɗa, mi miɗini wiini Alaw maɵa ɗa? Wala na mi miɗiŋ ɗa mi sdiŋ kir kai, mi ɗi na malvanai.

²⁰ Won hlai na mu muɗa seŋ li ɗa, e kiini seŋ gaini ki ɓa mu muɗa seŋ ta ɗi? E sini labar gaini si haw kapai a ɵina ɗi?

²¹ Hlai zamai tizaw gaglai aŋ kir kai ɗugul a yima mini, asakal par agwi smer a ɵasi a dogoŋ edi.

²² War gal n'azumai par, gaglai na maini or nɵa a halasi, gaglai zi mili hunai a guna Alaw amlai gun.

²³ Alaw ɗa a Alaw zi spak paŋ, ɗif a kiɗa amlai sini kai, spakni ɗa abai gara, jreni ɗa abai gara lai, a kirpa ɗif n'a na jre ɗa kai.

²⁴ Ɗai ɗa e hûniŋ na ɗa burini hanɗa, amma Ni a mula arni sini ɗif n'a sɗa sini yel ɗa kai.