Yob 36 - Ɗû na sɗik na wiini Alaw

Gadai n'Alaw a gada ɗai

¹ Asakal par Elihu a hala wuzani gaini seŋ a muɗa:

² Yob, mu ɵa ma edi kai hai, mu firiya mu suŋkuku wazagai zamai, buri ɓa zaida zamai aŋ ma, na mu dara mu muɗaŋ miɗini Alaw.

³ Siɗi na wiya ɗa mu payaŋsi na gaigai par, kapai mu siŋka jre na wiini ni n'a rgaŋa ɗa edi wuzani arɗi ɗai.

⁴ Buri ɓa, jre kai tiɓ ɗa, seŋ na mu muɗaŋ na ɗa eles warni kai, ta na m'aŋ muku zaw na ɗa, mu ɗif na mu sɗa wala fakat fakat.

⁵ Alaw ɗa spak gara, amma a miisa ɗif kai, spakni a siŋka edi war ɗiyini seŋni n'a ɗiyaŋ gdaŋ kaŋ ɗa.

⁶ A hiniɗi ɗai na maafanai e simni karɗi kai, amma a za pɗem siɗi nagai n'e siɗi gir tiɗi ɗai ɗa.

⁷ A bunda arni edi sini ɗif na jre ɗa par kai, a miliɗi paakai miɗini paramaiɗi pai, a tikiɗi woni ɓa kapai e simni aŋ paakai haa kureɗ, kapai e nivi kol lai.

⁸ Amma na ɓa e ɗa warni jaɓ, zaw e ɗa warni gir ɗi ɗa,

⁹ a pa mini miɗini meefeŋɗi kai, a dogo arni sini fiki n'amai na wiiɗi n'e ziŋ warni kûlûni-si ɗa kai.

¹⁰ A yima ɵimaɗi amai kapai e ɵini wala n'a dara a hitriŋɗi, a miɗiɗi buri e hini meefeŋɗi ɗa edi lai.

¹¹ Na ɓa e ɵini, e zi pini seŋ lai ɗa, aga e vidi mefeŋɗi war muluk, buzaɗi war firiyi lai.

¹² Amma na ɓa e ɵini kai ɗa, e mri ɗa mini kawai, aga e mri buri ɓa e ɵini wala kai.

¹³ Ɗai na maafanai ɗa e niyi war hiy; Won hlai n'Alaw a rgiɗi gaini jaɓ ɗa, e piyi zinai kai.

¹⁴ E mri gaini agogoiɗi, arbaɗi zawarai na wiini Alaw.

¹⁵ Amma a kurɗasi ɗif na war gir ɗa gaini gir ni dama, a gidiɗi ɗa gaini gir.

¹⁶ Aga a yumukusi edi war gir par, a ɵuku baŋa suku, wala a huwyuku kai, simi na midiɗi tabelku ɗa aga a za ɗa a simi na pɗamai.

¹⁷ Amma na ɓa ku ɗûklûti sariya maini ɗif na meefeŋ nɵa ɗa, sariya gaini jre ɗa aga a yumuku.

¹⁸ Hina hiy ɗa a kuku war meefeŋ kai, za hangal, hiina kai ɓa aga ku wura Alaw gaini like na pɗamai kai. Ku zaŋ li maini hanɗa nɵa ɗa a wili.

¹⁹ Faraiku gaini orku ɗa a kiɗa kai, gdaŋku ɗe a kiɗa kaalai.

²⁰ Ku pɵa midiɗi duvuk ɗa kai, buri ɓa duvuk ɗa, te ɵima ɗai edi war balamɗi par.

²¹ Ku za hangal, ku bunda arku edi sini meefeŋ par, buri ɓa pini gir n'aŋ suku ɗa, ku vara ɗa a hanɗa.

Abai na wiini Alaw

²² Alaw ɗa abai war spakni, a kiɗa a hitra maini ɵa ɗa asiya ɗa?

²³ Ɗif n'a tala payaini ɗa asiya ɗa? Ɗif n'a kiɗa a miɗini ɓa ku za ɗa afutini kai ɗa asiya ɗa?

²⁴ Hina muduku a kɵa gaini sda n'abakai n'a zaŋ, na ɗai e ɗa kûlûŋ gaini warni yama ɗa.

²⁵ Ɗif murɗek paŋ ɗa a na talaŋ, ɗif paŋ a guliyaŋɗi edi gaigai par.

²⁶ Alaw ɗa a abai, amma tumu mu suɗumu ɵa kai, buzani ɗe a pɵa kaalai.

²⁷ Yem n'a ɗuguda amai aŋ agiyiŋ ɗa a tapaŋ war hlai ktai, a bundaŋ aŋ faŋ a ɵaŋsi azumai.

²⁸ Ɗugul zi faŋ a hinaŋ a ɵasi, a ɵa midiɗi ɗai na midiɗi yai ɗa paŋ.

²⁹ Ɗif n'a kiɗa a sɗa hilini ɗugul n'arbani hlai n'amai ɗa asiya ɗa? N'a kiɗa aŋ sɗa ɓarai n'Alaw n'amai a ɓara ɗa asiya ɗa?

³⁰ A hina gaglai na wiini a wulɗa edi sini ɗawwa, amma a dogo hulumni yem-ra n'abai ɗa azumai duk.

³¹ Gaini wazagai hanɗa, a za sariya wiiɗi ɗai, a siɗi simi viya lai.

³² Wilɗi aŋ war tini, a siŋkini wala n'aga a pa sini.

³³ Gizini ɗa a siŋka edi gaini Alaw zi ɓarai, farani farai ɗa ma a sɗa ɓa a na gobi.