Yob 33 - Ɗû na sɗik na wiini Alaw

Elihu a muɗa: Alaw ɗa a zini zaida wiini ɗif

¹ Tiyana, mu siiwuku Yob, zuɓura seŋ na mu dara mu muɗuŋku ɗa, ku tika hangalku sini seŋ n'a niyaɗi ma par ɗa paŋ.

² Mu na malaɗi ma amai, seŋ a n'a niyaɗi edi ma par.

³ Aga mu muɗuku ɗa a jreni seŋ ɗa tar tar, aga mu vurnuku na mu sɗaŋ ɗa edi gaglai lai.

⁴ A rgaŋa ɗa a seze na wiini Alaw, mu sumna kara na ɗa pini suŋfa na wiini Alaw zi spak paŋ lai.

⁵ Na ɓa ku kiɗa ɗa, ku wayaŋa seŋ, ku zizina suku pɗem, ɗiyasi ma!

⁶ Wuzani Alaw ɗa, ta mu ɗif maiku ɵa lai, ta ɗe e rgiŋa gaini afti maiku ɵa lai!

⁷ Nɵa ɗa ku kiɗa ku hunaŋa kai, spakŋa ɗe a kiɗa muduku kaalai.

⁸ Ku muɗa seŋ ktai wuzani ara, a wula mada kai hai, mu ɵinaŋ mu ta gaini ɵima mal ɓa:

⁹ Ta mu na hilu, tuwurŋa aŋ kai. Mu na ɵa hiyak, wala ktai na meefeŋ sa kai.

¹⁰ Amma Alaw ɗa a paŋa seŋ mada, a za sa maini gawni nɵa.

¹¹ A waŋa aza war jaɓ ca, arni pa ɵa ca!

¹² Ta mu muɗuku ɓa: Meefeŋ ɗa ku tuku, buri ɓa Alaw ɗa, abai a suwa ɗif.

¹³ Ku piyini mini buri ma ɗa? Buri ɓa a na wiyuku seŋ midini miɗiku na ku muɗaŋ ɗa kai ɗa zaw!

¹⁴ Wiyini seŋ na wiini Alaw ɗa arni viya, amma mu ɗuma aŋ tukumu hangalmu sini kai.

¹⁵ Duvuk ɗa a kiɗa a muɗa war weseŋ zi pɵi, zaw war wala zi siŋki, Won hlai na weseŋ n'abai a yima ɗai, Won hlai n'e ɗa weseŋ miɗini walaɗi zi feŋ.

¹⁶ A yima ɵimaɗi ɗai amai, a ziɗi zaida azi ktai.

¹⁷ Kapai ɗif murɗek ɗa a hina sdani edi, ɗif na gdaŋ ɗa a niya kûlûni-si kai,

¹⁸ kapai a hinaŋ a kɵa war waŋ kai, kapai a mra mini kawai kaalai.

¹⁹ Hlai zamai ɗa, Alaw a gada ɗif, gaini veglek, a yimaŋ azumai midini walani zi feŋ ɗa waŋ, a hinaŋ amai kai, sini a sawa wuzani sek sek, kayai n'amlai war keɵkeni ɗa a vada kai.

²⁰ Nɵa, mini a dara wala zi simi kai, simi na pɗamai paŋ ɗa paŋ a firiya simini kai.

²¹ A hogo arku sini nɵa ca, a hina ɗa a keɵkeni kadai ca.

²² A toro na mini waŋ sek, siɗi nagai n'e fiɗi ɗai ɗa sek.

²³ Amma na ɓa arbaɗi ɗai zi ɵeŋ na dubu ɗa, ɗif zi ɵeŋ na wiini a na, n'a kiɗa a siŋkini ezini wala n'a za ɗa, aga a siŋkini wala n'a kiɗa a zaŋ ɗa lai,

²⁴ Nɵa, ɵeŋni ɗa aga a hiina haw burini, aga a miɗini wiini Alaw ɓa: ɵaŋ su, hinaŋ a niya warni waŋ ɗa kai, mu navasi wala na kapai mu saŋ ezini ya!

²⁵ nɵa neŋ-sini a bunda kekefuɗ maini na war agwini par ɵa, a waya gawla caŋ caŋ,

²⁶ A siiwa Alaw, Alaw a ɵina tuwini, a halasi wuzani gaini firiyi, buri Alaw a siŋka jreni edi ya.

²⁷ A zina yama wuzaɗi ɗai lai ɓa: mu na ka mu za tuwur, mu za pini gadai na wiini Alaw kai, amma, Alaw a za sa pini meefeŋŋa ɗa kai.

²⁸ A hinaŋa aŋ niya war waŋ kai, m'aŋ kara tiyana, mu na tala gaglai lai!

²⁹ Hanɗa paŋ a wala n'Alaw a kiɗa a zaŋ sini ɗif, a kiɗa a zaŋ azi sulu, zaw azi hu ɗi,

³⁰ kapai a kotaŋsi edi sini waŋ par, gaglai na wiiɗi ɗai na karɗi a ŋala miɗini lai.

³¹ Tuku Yob, tika hangalku ta, zuɓura seŋ na mu dara mu muɗuŋku ɗa, ɓa muku nɵa hiyak, mu muɗa ɗa mu ta.

³² Na ɓa seŋku zi miɗi a na ɗe ku wayaŋa seŋ, muɗa haw, buri mu firiya mu zutuku sariya;

³³ na ɓa seŋku zi miɗi aŋ kai ɗa ɗe, ɓa muku hiyak, kapai mu hutruku yel.