Yob 26 - Ɗû na sɗik na wiini Alaw

Yob a wiyini seŋ wiini Bildad: Ku muɗa wala ktai kai sam

¹ Nɵa Yob a tika seŋ a muɗa:

² Ku sɗa zinai na ku zina piɗi ɗai na hurofai gara, piɗi nagai na gdaŋɗi kai ɗa gara lai!

³ Ku sɗa gadai zi si wiiɗi nagai na yel midiɗi kai ɗa gara, ku sɗa sini gaini futini lai.

⁴ Tiyana miɗi na ku muɗaŋ na ɗa, ku muɗaŋ na sini asiya ɗa, n'a suku hiini hanɗa asiya ɗa?

Alaw a ŋa miɗini wazagai paŋ

⁵ Ɗai zi mri e ziriyi tini hunai, azumai pini yem gaini wazagai n'arni paŋ.

⁶ Wuzani arni Alaw ɗa, hlai zi simni na wiiɗi ɗai zi mri a na edi papɗak ta, wala ktai n'a ŋoyaŋ nɵa agwi wuzani arni aŋ kai.

⁷ A maaɗa galni ɗugul na war gal n'azumai sek edi miɗini baŋa na kadai ɗa a Alaw, a hiŋiliti yai amai arbani hlai kadai waŋ a Ni lai.

⁸ A bla faŋ war ɗugul dodo, amma gumani ɗa a naɓa ɗugul ɗa edi kai,

⁹ a ŋûyûti paramaini ɗa arɗi ɗai cok, a yima ɗugul amai arni kai.

¹⁰ A ɓasa wala wulla midini yem, haa sini haga n'arbani gaglai gaini gegeŋ.

¹¹ Won hlai n'Alaw a ɓara li ɗa, gaarakai na pini hlai n'amai hunai a yimaŋ a gigiɗa amai.

¹² Gaini spakni ɗa, a duhura yem-ra n'abai ɗa amai, gaini yelni ɗa, a kirpa Rahab.

¹³ Gaini smer na mini par, a giyha hlai n'amai ɗa edi, tini ɗa te ɓula Leviyatan, na yikini zamai ɓa: Wala meefeŋ n'a pra edi.

¹⁴ Na ɓa hanɗa paŋ ɗa a duɓani sdani n'anene kadai ɗa, na mu ɵunumu miɗini na ɗa a labarni n'agwi kadai, sdani zi spak na gaini abaini ɗa, na gdaŋni aga a ɵaŋ ɗa asiya ɗa.