Yob 24 - Ɗû na sɗik na wiini Alaw

Alaw a hiniɗi ɗai na maafanai e zi pini jaaɗi

¹ Alaw zi spak paŋ ɗa, a kata mefeŋ n'a ziti sariya wiiɗi ɗai woni ɗa ta ta kai ɗa buri maɗa? A zaŋ fu nɵa ɗa, nagai na jrekai ɗa aga e tiliŋ gaini arɗi.

² A za ɵa maɵa ɗa! Ɗai na maafanai ɗa e jûgû haga n'arbani vowai ɗa edi jok jok, e milisi faraɗi marɗi ɗa, e bindi aŋ ɗaini zi gɗam lai.

³ E yimi ablehö na wiiɗi na huyokai ɗa, e yimi gari na wiiɗi muni na war greŋ ɗa miɗini tumuŋ.

⁴ E birgiɗi ɗai na hurofai ɗa edi war futi par, e ziɗi dewele midiɗi na murgakai buri e ŋûyi.

⁵ E niyi edi war sdaɗi gorof gaini hlai rum rum aŋ piyi simiɗi, maini ablehökai na buza n'edi war basga na kaɗataŋ nɵa, simi na miɗi aliɗi ɗa e niviŋsi ɗa edi midini afti na koloŋ par.

⁶ Edi war vowai ɗa, e ɵiɓi kuzum, e rûwini alini luwuŋ zi vin na wiini ɗif na meefeŋ ɗa azumai.

⁷ E fini duvuk ɗa wala n'e biriŋ siɗi aŋ kai, sapa n'e wiŋ siɗi aŋ kai, burguɗi zi smer aŋ kai.

⁸ Faŋ n'amai par sini huwaŋai a diiɓiɗi, e diɓiki amai sini huwuŋ buri ɓa dalam midiɗi kai.

⁹ E tiki ahi na huyuk ɗa mini fiyawɗi emini par gaini gdaŋ, e mili wazagai miɗini tumuŋ tiɗi na murgakai par lai.

¹⁰ E ziɗi dewele midiɗi aŋ hili ganala, sapa siɗi kai, e libisi algama ɗa azumai war luluf, paŋktai e siɗi simi kai.

¹¹ Nagai e sipiɗi emelni luwuŋ Olive, e sipiɗi alini vin ɗa aŋ vin, paŋktai e siɗi yem zi ci kai.

¹² Aha war fuŋ n'abai ɗa, nagai na gdaŋɗi a vada vat ɗa e ɵi hama, na zi wuruk ɗa e piyi zinai, gaini hanɗa paŋ ɗa, Alaw a taka ɵimani tek maini na ɓa wala ktai na meefeŋ a za kai nɵa.

¹³ Ɗai nagai na maafanai ɗa, e firiyi gaglai ɗa kai, e siɗi futi n'abakai kai, e ɗiyi war futi na agogoi kaalai.

¹⁴ Ɗif zi ɵiɓi belek ɗa a ɵa sini amai gorof, a hala a fuɗa ɗif na murga gaini na huruf ɗa lai, war duvuk ɗa a za sini aŋ ɗif zi mihill ta lai.

¹⁵ Ɗif zi maɵara ɗe a mula arni piɗi futi na koskoi sek, a muɗa gaini warni ɓa: Ɗif aga a sɗa kai, a bara wala arni bar lai.

¹⁶ Duvuk ɗa, ɗai na mahalakai e cû dalamɗi ɗai girvudi ɗa, e dûgû miɗi amai duk, e tili gaglai kai.

¹⁷ Buriɗi ɗai hanɗa paŋ ɗa, hlai na gorof par ɗa a tala arɗi maini sezeni mri nɵa. Nagai e siɗi ɓa hunaini sezeni mri aŋ warɗi.

¹⁸ Ɗai ɗa e miɗi ɓa, ɗif na meefeŋ ɗa, yem a fanaŋ maini n'a dara nɵa, wazagaini na midini afti ɗa aŋ gaini tusa, a hala war vowaini zi vin ɗa kaalai.

¹⁹ Maini koɓro gaini hlai z'afu ɗa a giyha yem zi glas edi ɵa ɗa, hlai zi simni na wiiɗi ɗai zi mri ɗa aga a biɗi ɗai na tuwarai edi ɵa lai.

²⁰ Falakai n'e wiiɗi ɗa midiɗi aga a wula gaiɗi, atla aga a limiɗi gaini firiyi maa, midini ɗif aga a kɵa gaiɗi kir kai, meefeŋ na wiiki ɗa aga a kɵa azumai maini luwuŋ n'a kɵa azumai nɵa.

²¹ E niyi ɗa aha piɗi falakai na muɗaŋai na aliɗi kai, e zini piɗi muni na war greŋ ɗa kaalai.

²² Nɵa, Alaw na spakni a na, n'a kiɗa buri a birgiɗi ɗai n'e kiri ɗai edi ɗa, a fakasi amai ya, ɗai nagai ɗa, e siɗi ɓa aga e simni karɗi kir kai.

²³ A na ka a siɗi simni na ɵeɗ, nagai e pɵi midini hanɗa, amma Ni a mula arni miɗini payaiɗi ɗai na zamai.

²⁴ A siɗi rɗi n'amai burini hlai n'agwi, asakal par e ɗi kir kai, aga e yiki azumai maini wai n'e sûwiŋ nɵa, aga e ɗûkûliɗi edi maini miɗini wai ɵa.

²⁵ Na ɓa a na ɵa kai ɗa, ɗif n'a firiya a mulaŋ edi pa ɗa asiya ɗa, n'a kiɗa a haza seŋŋa na mu muɗaŋ edi ɗa asiya ɗa?