Yob 22 - Ɗû na sɗik na wiini Alaw

Miɗi n'ag'aŋ hu na wiini Elifaz: Yob ɗa, tini aŋ war seŋ jre jre

¹ Nɵa Elifaz na Teman par a tika seŋ a muɗa:

² Ɗif murɗek ɗa a nafa Alaw war a maɗa, koo ɓa a ɗif zi yel maa a nafa ɗa a sini ni dama,

³ Alaw zi spak ɗa, jaani gaini jreku ɗa a wiini a maɗa? Na ɓa payaiku pɗem ɗa, ribani na warni ɗa a maɗa?

⁴ Ku hiina ɓa Alaw a hinasi gir muduku lai, a zuku sariya lai na ɗa, buri na ɓa ku hunaŋ ɗa kiɗi?

⁵ A za nɵa na ɗa buri ɓa meefeŋku ɗa a suwa abai suwai, wazagai na maafanai na ku zaŋ na ɗa a pɵa kai kai ɗi?

⁶ Ku na ka na ɗa, ku sa tumuŋ li wiiɗi ɗaiku ɗa, ku tika kaa wala ktai miɗini ɗaw, koo sapa na siɗi maa ku mulaŋ ku hiniɗi ganala.

⁷ Ɗif na sai te zaŋ maa ku sini yem zi ci kai, na wiyamai te zaŋ maa ku sini wala zi simi kai.

⁸ Na gdaŋai ɗa e mili aftiɗi marɗi ɗa, nagai n'e tili siɗi e kiɗi ɗa e simni warni lai.

⁹ Falakai na war greŋ ɗa, ku wiyiɗi gaini tiɗi piɗi ca, ku kirpiɗi na huyokai lai,

¹⁰ Azaw ɗa a gunuku azumai na ɗa burini hanɗa, hunai n'amai te yumuku tizaw na ɗa burini hanɗa.

¹¹ Ku na tala gegeŋ n'a na duguku kai ɗi, yem n'abai n'a na ruɓuku kai ɗi?

¹² Alaw ɗa a na haa amai war hlai n'amai, tala hlai na meeɵek a na amai woni haw, a na gaigai gara lai.

¹³ Ku hiina warku ɓa: “Alaw ɗa amai par ɗa a sɗa wala n'a na za ɗa ɗi? A kiɗa a ziti sariya wiiɗi ɗai amai par miɗini gegeŋ na tikiɗim hanɗa ɗi?

¹⁴ Ɗugul ɗa a gaŋa amai arni maini sapa nɵa a kiɗa a talasi arni ɗaw kai, arni a tala na ɗa edi mini ɗugul ɗa ɗawwa.

¹⁵ Maɵa ɗa! Ku firiya ku tikiti futi na ɗipar na nagai na maafanai e tikiti ɗi?

¹⁶ Nagai e yimi edi wuzani mefeŋɗi par, maini ɵaga na yem a haɗaŋ nɵa.

¹⁷ E ɗi ka e miɗini wiini Alaw ɓa: A yima sini edi miɗi par, Alaw zi spak ɗa a kiɗa a ziɗi zi pɗem ɗa a maɗa?

¹⁸ Paŋktai a na ka a va dalamɗi gaini wazagai na pɗamai ɗa a ni, hiini na wiiɗi ɗai na maafanai ɗe aŋ wara kai.

¹⁹ Ɗai na jrekai aga e tili wala n'a za ɗa, aga e firiyi lai, na tiɗi war seŋ kai ɗa aga a ziɗi yewere lai, e miɗi:

²⁰ Tili, nagai n'e ɗi ka e fiki amai sumu ɗa e vidi edi kai ɗi? Afu a ya wazagaiɗi edi kafa lai kai ɗi?

²¹ Mu siiwuku, ku wayasi hangalku sini Alaw aga ku na nava ɵeɗ, gaini hanɗa, wazagaiku ɗa aga a za pɗamai.

²² Mu siiwuku, ku yima hitrai na mini Alaw par ɗa, ku giɗima seŋŋi warɗi agulku.

²³ Na ɓa ku wayasi li sini Alaw zi spak paŋ ɗa, aga a wuyuku warni mulukku n'avut ɗa, aga ku burga meefeŋ edi war dalamku par.

²⁴ Bla orku ɗa arni alogodo, orku na Ofir par ɗa arni gorhoyo na warni avakai ɗa.

²⁵ Alaw zi spak paŋ aga a za aŋ or na wiiku, aga a bunda buriku aŋ arzaŋ na gaini pi midini marni tiɓ.

²⁶ Nɵa aga firiyiku a va amai war Alaw zi spak na wiiku, aga ku bunda arku amai sini Alaw zi spak na wiiku lai.

²⁷ Aga ku siiwaŋ, Ni aga a ɵina muku, wala na ku ɵina ha miɗini paŋ ɗa aga ku vaŋ amai lai.

²⁸ Wala na ku tika hiiniku li miɗini ɗa aga a va amai buriku, futiku ɗa aga te za edi gaglai lai.

²⁹ A na ɵa, Alaw ɗa a tuura sdaɗi ɗai n'e kûli siɗi amai ɗa edi, amma nagai n'e tili siɗi wuzani arɗi ɓa e kiɗi kai ɗa, a va sdaɗi amai.

³⁰ Aga a piliɗi nagai na tiɗi war seŋ kai ɗa edi war meefeŋ par. Nɵa ɗa, ku paya pɗem, aga ku nava pli n'edi.