Yob 20 - Ɗû na sɗik na wiini Alaw

Miɗi na wiini Sofar: Muluk na wiiɗi ɗai na maafanai ɗa a fana viya kai

¹ Sofar na Naama par a tika seŋ a miɗini wiini Yob:

² Mu roto sa haaŋŋa mu firiya mu muɗa kai, amma hiiniŋa a saŋa ɓa sai mu muɗuku.

³ Seŋ n'a niyasi war muku par ɗa, mu talaŋ sa ɗa a tirki, amma sezeŋa a hogoŋa aŋ waya seŋ pini hanɗa.

⁴ Tuku ku sɗa ɓa haa gamai par, haa hlai na ɗif aŋ midiɗi yai par na ɗa,

⁵ muluk na wiiɗi ɗai na maafanai na ɗa a na burini hlai n'agwi, firiyi na wiiɗi ɗai n'e hûni Alaw kai ɗa a na buri hlai n'agwi lai.

⁶ Koo ɓa wûlini ha amai Alaw ta, koo ɓa miɗini amai pini ɗugul tiɓ kaw,

⁷ aga a vada edi gamai maini fulai na warni par nɵa, nagai n'e siɗiŋ ɗa aga e zilbi ɓa: aŋ wata ɗa?

⁸ A vuga maini weseŋ zi pɵi nɵa, a nava kir kai, a ɵa li amai aŋ luwi ɗa, maini wala zi siŋki n'a za arni ɗif war duvuk ɗa nɵa.

⁹ Arai na te na ka te talaŋ ɗa, aga te talaŋ kir kai, hlai n'a na ka woni maa aga a talaŋ kir kaalai.

¹⁰ Alini ɗa e virgiɗi wazagaiɗi ɗai na murgakai edi, ni gaini tini dama aga a ɓurwa derni ɗa edi lai.

¹¹ Keɵkeni a na fu gdaŋai maini na wiini gawla ɵa, amma aga a niya war waŋ gaini gdaŋ hanɗa.

¹² Buri ɓa meefeŋ ɗa a na fu mini neeme, a ŋoyaŋ azumai piɗi alsini,

¹³ A seseɓaŋ wuzani sek a hinaŋ kai, amlai mini ɵa ɗik,

¹⁴ Simi n'a sumaŋ ɗa a hofa amlai warni, a bunda aŋ masnaw na wiiɗi makai.

¹⁵ Wazagai n'a sumaŋ tiɗi ɗai par ɗa aga huŋvaŋsi edi, warni par ɗa, Alaw aga a yimaŋsi edi.

¹⁶ A na ka a seseɓa na ɗa, a musnawɗi makai, aga a mra maini ɗif na kaaɗi a lumaŋ ɵa.

¹⁷ Aga a tala arakai na wiini emelni ami gaini arni kai, a tala ra gaini avakai na wiini fiyaw kir kaalai.

¹⁸ Wazagai n'a navaŋ paŋ ɗa aga a suma mini kir kai, n'a navaŋ pini sakalani paŋ ɗa aga a firiya gaini kaalai.

¹⁹ Buri ɓa a kirpiɗi na murgakai, a hiniɗi edi yaw, a rga dalam miɗini kai, a sumna warni na wiiɗi ɗa,

²⁰ sunani ɗa a hinaŋ a va kai, na arni a talaŋ paŋ ɗa a firiyaŋ a wuraŋ paŋ.

²¹ Wala ktai n'a vuga mini sunani aŋ kai, buri hanɗa, mulukni na wiini aga a fana viya kaalai.

²² Won hlai na faraini a suwa li viya ɗa, gir aga a yimaŋ, pinzibani gir paŋ aga a luɓasi miɗini gaini gdaŋni paŋ.

²³ Won hlai n'a na paya aŋ va warni ɗa, Alaw aga a ɵinasi hiy n'abai ɗa miɗini, aga a niya amlai sini maini ɓaraw ɵa.

²⁴ Na ɓa a pra edi mini kaɵkar na wiini gawni par su maa, ɓûrwi zi kiiya aga te yimaŋ.

²⁵ Na ɓa a rɗitisi li ɓûrwi edi sini par, a rɗasi li kawai na miɗi na sûweɗ n'a ŋala edi sini eɵeɵetni par lai ɗa, hunai na wiini mri ɗa aga a yimaŋ tar.

²⁶ Godaini paŋ ɗa gegeŋ aga a sumna miɗini, afu n'a yibaŋ amai ɗa a ɗif kai, aga a yaŋ, wala n'a hina karni aha war dalamni paŋ, afu aga a yaŋ edi lai.

²⁷ hlai n'amai ɗa a siŋkasi meefeŋni edi, yai te faka amai sini lai.

²⁸ Der n'aha war dalamni ɗa aga a ba edi kap, aga a mula edi kap, war mefeŋ zi hiy na wiini Alaw ɗa.

²⁹ Hanɗa a wala n'Alaw a na baiya ɗif na meefeŋ gaini ɗa, a buri na wiini n'aga a sa sini ɗa.