Yob 12 - Ɗû na sɗik na wiini AlawWiyini seŋ na wiini Yob: Alaw a ɗif n'a za gir wiiɗi ɗai gaini hiinini haw kai 1 Nɵa Yob a tika seŋ a muɗa: 2 A futini, siɗi na wiini ɗif murɗek ɗa, a daba siki tiki, yel ɗa ɗe a daba siki tiki lai. 3 Amma ta m'aŋ gaini yel mada maiki tiki nɵa lai, tiki ki sûwiŋa gaini yel kaalai, na ki miɗiŋ na ɗa, ɗif n'a sɗaŋ ɵa kai ɗa asiya ɗa 4 Mu ɗuula sini Alaw buri mu paya zinai war tini par, amma mu bunda aŋ wala zi yewere tiɗi marmakaiya, e bindi e zini yewere na ɗa, wiini ɗif na jre, na ɗikat ɗa. 5 Ɗai na wala aŋ tiɗi ɗa e hiini ɓa, ɗif n'aŋ war gir ɗa, burini ɗa a miisi, e miɗi seŋ hanɗa siɗi nagai na eziɗi a ɵiɓa tukum ɗa lai. 6 Ahaɗi gorɓolokai maa ɵeɗ a na, n'e tûûrini agulni Alaw maa e ɗa gaini hangalɗi, n'e piki Alaw amlai tiɗi pek ɗa nɵa lai. 7 Zilba ɵaakaiku ɗa, aga e hitriku, zilba wazagai zi ɗufli n'arbani hlai n'amai ɗa, aga a suku labar hanɗa. 8 Haɗa kalaŋ gaiɗi yai, aga te hitriku, hilif na agoɗom ɗa aga a vurnuku. 9 Arbani wazagai hanɗa paŋ ɗa, ktai n'a sɗa ɓa a za gaini tini Alaw kai a na ɗi? 10 Ni, suŋfaɗi agulni wazagai na karni paŋ aŋ war tini, gaini suŋfaɗi ɗai murɗakai paŋ lai. 11 Ɗai e miɗi seŋ ɓa: A sɗa pɗemni seŋ zi miɗi ɗa a ɵime, maini n'a sɗa pɗemni simi ɗa a miy ɗa nɵa. 12 Yel ɗa a nava siɗi ɗai na walakai, siɗi ɗa ɗe aŋ siɗi ɗai n'e zi buza viya ɗa lai. 13 Amma yel gaini spak ɗa aŋ tini Alaw, siɗi zi zi wala gaini siɗi ɗa aŋ war tini ni lai. 14 Wala n'Alaw a tuuraŋ li ɗa, a zizina tini ɗif kir kai, ɗif na Ni a ɵaŋ li war daŋgai ɗa, ɗif n'a ɵaŋsi edi aŋ kaalai. 15 Na ɓa a ɗalasi yem li ɗa, koɓro a za, na ɓa a hinaŋsi li ɗa ɗe, a biti yai ɗa ta lai. 16 Gdaŋ gaini yel ɗa aŋ war tini, ɗif na zini a wula gaini ɗif n'a wula ɗai edi e ɗi wiini paŋ. 17 A bindiɗi ɗai na yalakai gara e hili eziɗi azumai kadai ca, n'e ɗûklûti sariya ɗa ɗe a bindiɗi tiŋ tiŋ lai. 18 A vada spakɗi paakai edi, a miliɗi sapa na wiiɗi ɗai zi daŋgai siɗi, 19 a bindiɗi paakai zi ɓaka e hili eziɗi azumai kadai ca, n'abakai n'e gigiɗi kai ɗa, a ɵiɗi azumai. 20 A tika seŋ zi miɗi na pɗem edi miɗi nagai n'e girɗi seŋ ɗa par, zini ɓraw n'arbani meefeŋ gaini pɗem a tikaŋ edi siɗi na walakai par lai. 21 A ko miisi midiɗi n'abakai zi ɵi wuze, a pla sentir na wuzaɗi ɗai zi spak ɗa, 22 a siŋkasi wazagai n'a na azumai war hulumni gegeŋ ɗa amai, a kasi sezeni mri edi war gaglai. 23 A riya pinziba amai haa asakal par a tuuraŋ edi, a kiɗi haa edi midini afti zamai asakal par a wiyiɗisi aha. 24 A mula siɗi na midiɗi n'abakai n'e ŋi midini afti edi, a hiniɗi e giliŋi edi war basga na futi warni kai. 25 Nagai e piyi war gegeŋ na gaglai warni kai, Alaw a hiniɗi e kɵiŋi maiɗi ɗai n'e ciini ca nɵa. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon