Yob 10 - Ɗû na sɗik na wiini Alaw

Wiyini seŋ na wiini Yob: Alaw a waŋa tiɓ ɓa kapai a turaŋa edi ɗi?

¹ Simni na kara ɗa a baza ma ta, nɵa aga mu ɗala maravaŋa zi ɵi ɗa kir kai, n'a na fuɗaŋa sa paŋ ɗa aga mu muɗaŋ lai.

² Aga mu miɗini wiini Alaw ɓa: Ku yimaŋa aŋ ɗif na meefeŋ kai, wala na ku pa seŋ mada pini tiɓ ɗa, siŋkaŋa haw ɗa.

³ Kirpi na ku na kirpaŋa, sda na ku zaŋ gaini tuku na ku na tuuraŋ edi, gaini zinai na ku zina piɗi ɗai na maafanai war sdaɗi n'e ziŋ ɗa lai na ɗa, a tala arku pɗem kiɗi ɗi?

⁴ Arai n'aŋ puku ɗa a na wiiɗi ɗai murɗakai ɗi? Telku na ku tala ɗa maini ɗif murɗek ɵa ɗi?

⁵ Mefeŋku ɗa a na gulai maini na wiini ɗif murɗek nɵa ɗi? Zaw buzaku ɗa maini na wiini ɗif murɗek nɵa lai ɗi?

⁶ Na kapai ku mula arku pini meefeŋ ca, ku tika ezini tuwur na mu zaŋ ɗa lai ɗa,

⁷ paŋktai ku sɗa edi gaglai ɓa ta war seŋ kai, ɗif ktai n'aga a plaŋa edi war tuku par aŋ kir kaalai.

⁸ Tuku ɗa a rgaŋa, a zizinaŋa, tiyana a haɵaŋa amai kiŋ, ku firiya ku turaŋa edi.

⁹ Mu siiwuku, ku hina muduku a wula kai ɓa, tuku ku zizinaŋa maini grak n'afti nɵa, tiyana ku firiya ku wayaŋa azumai arni afti ɗi?

¹⁰ Tuku ku haɓana maini fiyaw n'e tikiŋ war wala ta nɵa, maini emel n'e gûziŋ ɗa nɵa.

¹¹ Ku saŋa neŋ sa, ku waŋa amur miɗini lai, ku saŋa keɵke gaini sirda sa lai.

¹² Ku saŋa suŋfa gaini gdaŋ, ku tika hangalku sa gaini futini ta lai.

¹³ Amma seŋ ktai a na fu warku su, mu sɗa wala na ku na fu aŋ hiinaŋ ɗa lai,

¹⁴ a na ɗa ba, na ɓa mu za meefeŋ li ɗa, ku yimaŋa war hlaini tizaw, arku sini meefeŋ ktai ma kai.

¹⁵ Na ɓa ta aŋ war seŋ ɗa, haw gara buriya, na ɓa mu na jre ma, ara a yima amai kai, m'an na ɗa gaini vi tini miisi ta, gaini siini tini gir ɗa su lai.

¹⁶ Mu yima li mada amai tar ɗa, ku birgaŋa maini gurnai ɵa, sdaku zi spak ɗa, suku aŋ zaŋ sa ɵa.

¹⁷ Zaidakai n'e miɗi sa ɗa, ku jûniɗisi zamai zamai, hiyku na sa ɗa a riya amai sek sek, askaraiku n'e hilisi aŋ hitimiŋa ɗa, e hilisi vokɗi mini piɗi marni tiɓ tiɓ.

¹⁸ Ku waŋasi edi warɗi ama par tiɓ ɗa buri maɗa? Mu mrasi fu wiya su, ɗif ktai ma a sɗaŋa fu kai.

¹⁹ Warɗi ama par ɗa, e kiŋa fu na edi mini waŋ sek tar, maini ɗif n'a wa edi kai nɵa.

²⁰ Mefeŋŋa a hina maɵa ta ki ɗi ɗa, ɵa ta, hinaŋa, mu ɵa dawaŋ agwi lai

²¹ wuzani hlai n'aga mu hala gamai, mu wayasi kir kai, midini afti na wiini gegeŋ, gaini na wiini sezeni mri ɗa,

²² midini afti na wiini gegeŋ na tikiɗim, na tilik, sezeni mri n'aŋ woni ɗa a dûrgûzi, woni, gaglai ɗa a tala maini duvuk na gegeŋ nɵa.