Yob 1 - Ɗû na sɗik na wiini Alaw

Yob, ni ɗa asiya ɗa?

¹ Midini afti na Us ɗa, ɗif ktai a na ka yikini ɓa Yob. Ɗif hanɗa, a na fu ɗa a ɗif na jre, na ɗikat, n'a huna Alaw, n'a guna sini meefeŋ kai.

² Alini e ɗi fu doogo, na maɵagai muguzak, na falakai hu lai.

³ Adumaini dubu muguzak, ɵiginini dubu hu, ɵaakaini dubu ɗaw, ablehökaini na falakai miya ɵim, bagakaini na maɵagai gaiɗi na falakai e pɵi kai. A ɗif n'abai n'a sûwiɗi ɗai na piɗi futi na dawai par paŋ.

⁴ Alini na maɵagai ɗa e fini yaaha ɗa e tipi ahani ktai tap aŋ zi fet, e yikiɗisi tawalakaiɗi na falakai na hu gaiɗi buri e simi, e ci lai.

⁵ Won hlai na gûniɗi na piɗi marɗi a daba li edi ɗa, Yob a yikiɗisi ahani paŋ a ziɗi edi hilu. Dawaini ɗa, Yob a faka amai gorof a za ɓaka zi yi buriɗi ktai ktai paŋ, buri a hiina ɓa ablaŋtaŋkai n'alini e zi tuwur ktai ta, zaw e hiini wala na meefeŋ warɗi agulɗi sini Alaw na wiiɗi ɗi ɗa, a zaŋ ɵa kûreɗ-kûreɗ.

Titimi n'avut na wiini Yob

⁶ Mefeŋ ktai ɗa, alini Alaw e hilisi wuzani EPIƊ-ƊAI, Satan ɗif zi pi seŋ ɗa a halasi arbaɗi lai.

⁷ EPIƊ-ƊAI a zilbaŋ: Ku halasi wata par ɗa? A wiyini seŋ: M'aŋsi aŋ guna midini afti paŋ aŋ paya.

⁸ EPIƊ-ƊAI a zilbaŋ: Yob na ɗifŋa ɗa ku talaŋsi ya ɗi? Ɗif na maini ɵa midiɗi yai aŋ kai, a ɗif na jre, na ɗikat, n'a huna Alaw, n'a guna sini meefeŋ kaalai.

⁹ Amma Satan a wiyini seŋ: Ku hiina ɓa, Yob a huna Alaw na ɗa kadai ɗi?

¹⁰ A na buri ɓa tuku ku za suku aŋ ɵaɓni ta, ni, pakataini gaini wazagaini paŋ ɗa wala a kiɗa a tetemaŋ kai. Buri ɓa ku ɓaka sda n'a na zaŋ ɗa paŋ, farani faraini ɗa a tika hlai ɗaw.

¹¹ Za barka, ku tika tuku sini wazagaini hanɗa haw le, na ɓa a muɗuku seŋ na maafanai amai arku kai ɗa!

¹² EPIƊ-ƊAI a wiyini seŋ wiini Satan: Pɗem, wazagaini paŋ ɗa aŋ tuku na, za sini maini na ku dara nɵa, amma ku tika tuku sini ni kai. Nɵa Satan a yimasi sini edi wuzani arni EPIƊ-ƊAI par.

Gir n'avut n'a za sini Yob

¹³ Mefeŋ ktai, alini na maɵagai gaiɗi na falakai e ɗi fu ahani tawalɗi n'abai ɗa aŋ simi, aŋ ci lai.

¹⁴ Ɵeŋ ktai a cosi sini Yob a miɗini: Ɵaakai a na fu aŋ hirma, ablehökai na falakai a na fu aŋ suma kuzum ɵimaɗi gobi lai.

¹⁵ Gorɓolakai na Saba par, e hilisi e ciki hlai cak, e mili farai ɗa, e fiɗiɗi ɗaiku na pini edi gaini kaɵkar, mu kurɗasi piɗi par mu ta pal, mu halasi na ɗa aŋ suku labar hanɗa.

¹⁶ Ɗif a ɵa mini edi kai hai, maini zamai a cosi a muɗa: Afu na wiini Alaw a kɵasi amai par, miɗini farani adumai gaiɗi ɗaiku ɗa, a yiɗi edi kafa, mu kurɗasi piɗi par mu ta pal, mu halasi na ɗa aŋ suku labar hanɗa.

¹⁷ A ɵa mini edi kai hai, ɗif zamai a ɓulasi a muɗa: Ɗai na kalde par vok hu e niyi arni ɵigini ɗa e miliŋ yaw, e fiɗiɗi ɗaiku ca. Mu kurɗasi piɗi par mu ta pal, mu halasi na ɗa aŋ suku labar hanɗa.

¹⁸ Mini a ɵa edi kai hai, zamai a luɓasi a muɗa: Aliku na maɵagai gaiɗi na falakai lai e ɗi fu aŋ simi aŋ ci lai ahani tawalɗi n'abai ɗa,

¹⁹ smer na gdaŋ a fakasi edi duɓani basga na kaɗataŋ par a ɵiɓa koŋɗi dilimi na puɗu paŋ. Dilimi te hurba azumai midiɗi aliyagoi ɗa, e mri kafa. Mu kurɗasi piɗi par mu ta pal, mu halasi na ɗa aŋ zuku labar hanɗa.

²⁰ Yob a faka amai, a wa ɓasa sapa na sini edi, a faɗa miɗini edi lai. Asakal par a bla sini, a pa arni azumai a siiwa,

²¹ a muɗa: Mu niyasi warɗi ama par wala ktai maa ta kai, aga mu waya wala ktai maa ta kaalai. EPIƊ-ƊAI a sa, EPIƊ-ƊAI a tika lai. Kol sini EPIƊ-ƊAI.

²² War gir hanɗa paŋ ɗa, Yob a za wala ktai na tuwur kai, a tika seŋ na meefeŋ sini Alaw kaalai.