Yeremiyas 9 - Ɗû na sɗik na wiini Alaw

Eles a tika hlai ɗaw

¹ Kaai, mu na fu gaini kaŋ edi war basga na kaɗataŋ ta, maiɗi ɗai n'e hili morkoi nɵa ɗa, aga mu hiniɗi ɗaiŋa edi, mu yima sa edi siɗi par, buri ɓa gaini hlaiɗi paŋ ɗa e ɗi ɗai na maɵarakai, e ɗi ɗai n'e miɗi jre kai,

² elesɗi edi miɗi nɵa ɗik ɗik, aŋ miɗi seŋ na maafanai ɗa, maini taŋ na ɗif a gidiyaŋ aŋ ɵiɓi nɵa, e bindi aŋ ɗai zi spak midini afti hanɗa buri jreɗi ɗa kai, buri ɓa e zi meefeŋ na ɗa wuzaɗi sek sek, e siɗiŋa kaalai, a miɗi na sini EPIƊ-ƊAI par.

³ Ɗif paŋ a giɗima sini wuzani marmaini, a sini warni wiini tawalni ktai kai, buri ɓa tawal paŋ ɗa a ɗif zi rhai maini Yakob ɵa, marmai paŋ ɗa a gna paŋ.

⁴ ɗif paŋ ɗa a rha maini gaini rhai, e miɗi jre wiiɗi marɗi kai, e hitriti alsiɗi war eles ta, e yivi aŋ kiyi siɗi war zini meefeŋ ɵa,

⁵ eles ɗa e ziŋ aŋ walaɗi zi simi ta, e siɗiŋa kai na ɗa buri ɓa, e siɗiŋa kai ɗa kai, amma e diri kai ɗa a diri. A miɗi na sini EPIƊ-ƊAI par.

⁶ Buri hanɗa, EPIƊ-ƊAI zi spak paŋ a na muɗa maini nɵa: Aga mu ziɗi edi hilu, aga mu titimiɗi haw. N'aga mu za zamai siɗi ɗaiŋa ɗa a maɗa?

⁷ Alsiɗi te ɓûrwi na miɗi a suma gara, a niyasi miɗi par ɗa, sai a rhai, war miɗi amai ɗa, e miɗi wiiɗi marɗi ɗa a miɗi zi ɵeɗ, amma warɗi amlai ɗa, e giŋi azaw wuzaɗi marɗi.

⁸ Ɗai na mai hanɗa ɵa ɗa, aga mu ziɗi gir kai ɗi?

Mefeŋ zi tuwi

⁹ Aga mu tuwa, mu ɵa hama lai, midini huwaŋai, aga mu zina yama zi tuwi, midini hlai na farai a suma woni, edi war basga na kaɗataŋ ɗa. Buri ɓa a ya edi huw, ɗif a na vuga woni kir kai, ɗif a ɵina tuwi na wiini farai kir kai, sini wala zi ɗufli n'arbani hlai n'amai par haa sini wazagai n'ezini puɗu puɗu ta, wazagai ɗa paŋ a ɵara edi paŋ.

¹⁰ Aga mu binditi Yeruzalem aŋ hlai zi deeɓer, aŋ hlai na barka ceŋ-ceŋ a nafa marni woni, fuŋ n'abakai na Yuda ɗa, mu bundaŋ aŋ hlai kadai su, na ɗif a suma warni kai.

¹¹ Ɗif zi yel n'a ɵina hanɗa asiya ɗa? A muɗaŋ haw ɗa, ni n'EPIƊ-ƊAI a miɗini gaini mini ɗa. Afti a tuura edi nɵa, a ya edi maini basga na kaɗataŋ na ɗif a vuga warni kir kai ɵa ɗa maɵa ɗa?

¹² EPIƊ-ƊAI a muɗa ɓa: A za nɵa buri e hini gadaiŋa zi ɗû na mu siŋɗi edi mak, e ɵini ma kai, e tiki futi pa kaalai.

¹³ Buri ɓa e hili ɗa pini hriŋ na wiiɗi agulɗi, gaini Baal lai, n'e hitriŋ siɗi tamaiɗi par.

¹⁴ Buri hanɗa, EPIƊ-ƊAI zi spak paŋ Alaw na wiiɗi Izrayel a na muɗa maini nɵa: Aga mu siɗi wala na ɗewek miɗi ɗai hanɗa aŋ simi, mu siɗi yem na gaini wala zi fiɗi ɗai arni aŋ ci lai.

¹⁵ Aga mu ɵiriɗi edi arbaɗi pinzibaɗi ɗai na nagai gaiɗi tamaiɗi e siɗiɗika duk kai, aga mu ɵini gaw piɗi par aŋ vidiɗi edi lai.

¹⁶ EPIƊ-ƊAI zi spak paŋ a na muɗa maini nɵa: hiini pɗem, yikiɗisi falakai zi tuwi ɗa, e hilisi, ɵini piɗi falakai n'e siɗi tuwi gara ɗa, e hilisi lai.

¹⁷ E pirmisi witaw e hilisi e tiki yama zi tuwi amai sumu, a juva ɓa tuwi a va pini armu ɗa, a ka maini yem nɵa.

¹⁸ Buri ɓa ɗai aga e ɵini hama n'a niyasi aha war Siyon par, mi zi na ɗa maɵa, mi bi ta, siyer a yimiyi yaw, buri ɓa mi hinisi afti edi mak, ɗai e hû dalamyi azumai ho ho lai.

¹⁹ Tik falakai ɵini seŋ na wiini EPIƊ-ƊAI pɗem, hini ɵimaki a yima seŋ n'a niyasi war mini par ɗa, hitri ɵini hama wiiɗi aliki na falakai lai. Ki hitri yama zi tuwi wiiɗi marki lai.

²⁰ Buri ɓa mri a niyasi a na arni fenetre ɗaw, a niya a na amlai warni dalammu na pɗamai ɗa, a na fuɗa aliyagoi na yaw war futi ɗa, gaiɗi nagai n'e simni war hlai na ɗai e tipi woni ta ta ɗa.

²¹ Muɗa ɓa: Hanɗa a miɗi na sini EPIƊ-ƊAI par, kopoŋɗi ɗai aga a yaka azumai, maini flai n'e pûkûŋ edi warni vowai nɵa, maini hedek n'a yaka piɗi ɗai zi hiɗi na ɗif a waya piɗi kai ɗa nɵa.

Yel na jre ɗa a siɗi na ɗif a sɗa EPIƊ-ƊAI

²² EPIƊ-ƊAI a na muɗa maini nɵa: Hina ɗif zi yel ɗa a kola sini burini yelni kai, hina ɗif z'agul ɗa a kola sini buriɗi agulni kai, ɗif zi farai ɗa a kola sini burini faraini kaalai.

²³ Amma ni n'a kola sini ɗa, a kola sini buri ɓa a nava yel n'a sɗaŋa gaini, a sɗa ɓa Ta m'EPIƊ-ƊAI, a sɗa ɓa midiɗi yai ɗa, mu za paŋ war ɗikat maini n'a na ɗa ɵa, war jre lai. Buri ɓa mu firiya ɗa a wazagai hanɗa, -a miɗi na sini EPIƊ-ƊAI par.

Miɗi na siɗi na wazagai n'e yiki siɗi ɓa e ɵi gûrgûle ya ɗa

²⁴ Mefeŋ aga a gizi, a miɗi na sini EPIƊ-ƊAI par, - war mefeŋ ni ɗa, aga mu zilbiɗi miɗi nagai n'e ɵi gûrgûle ɗa paŋ.

²⁵ Aga mu zilbiɗi miɗi ɗai n'Egipte, ɗai na Yuda, ɗai na Edom, Ammonitekai gaiɗi Mowabitekai gaiɗi nagai paŋ n'e fiɗiɗi ayir na pini ɵimaɗi edi, n'e simni edi warni basga na kaɗataŋ lai. Buri ɓa pinziba na zamai paŋ ɗa e ɵi gûrgûle kai, pinzibani Izrayel paŋ ɗa e ɵi gûrgûle warɗi agulɗi kaalai.