Yeremiyas 8 - Ɗû na sɗik na wiini Alaw

¹ War mefeŋ ni ɗa, a miɗi na sini EPIƊ-ƊAI par, aga e milisi keɵkeɗi paakai gaini na wiiɗi n'abakai na Yuda gaini na wiiɗi paakai zi ɓaka, gaini na wiiɗi ɗai na Yeruzalem ɗa lai edi wrni waŋɗi par.

² Aga e miliŋ arni futi, arni tile gaini wazagai zi rgi n'arbani hlai n'amai, n'e ɗi ka e diriŋ, e zi ɵeŋni, e hili pini, e piyiŋ e hûrgû azumai wuzani lai. Aga e tipiŋsi amai kir kai, e piŋ azumai kir kaalai, aga a bunda maini flai n'e pûkûŋ war vowai nɵa.

³ Piɗi n'a hina, nagai n'e hini karɗi pini pinzibaɗi ɗai na maafanai hanɗa, aga e firiyi mri a suwa simnia na karɗi, war hlai na mu ɵiriɗi edi woni paŋ ɗa, a miɗi na sini EPIƊ-ƊAI zi spak paŋ par.

Hriŋ n'a yima midini ɗif kir kai

⁴ Ku miɗiɗi ɓa: EPIƊ-ƊAI a na muɗa maini nɵa: Ɗif n'a kɵa li azumai ɗa a faka amai kir kai ɗi? Ɗif n'a sala li edi warɗi futi par ɗa, a wayasi warɗi futi na pɗemi kir kai ɗi?

⁵ Ɗai na Yeruzalem hanɗa e zi siɗi hraŋai, e hili wuzaɗi gaini meefeŋɗi ɵa buri maɗa? a siɗi war rhaiɗi ɵa, e diri e wiyisi sa kai,

⁶ Mu tika hangala siɗi ta, mu zuɓura haa ɗa, seŋ n'a niyasi war miɗi par ɗa, jreni aŋ kai, ktai na meefeŋni a fiɗini sini nɵa aŋ kai, n'a muɗa lai ɓa: Mu za ɵa ɗa a ma ɗa aŋ kai. A siya ɗi paŋ a lawa wuzani sek bas maini plis n'a hriŋŋa war luwi na mini hatam sek nɵa.

⁷ Sahaw n'arbani hlai n'amai a sɗa sarti na wiini jûgûni, mokokrai, muguɗi muguɗi gaiɗi alma siɗi sarti n'e wiyi aha warni lai, amma ɗaiŋa ɗa e siɗi gadai zi ɗiyi na wiini EPIƊ-ƊAI kai.

Yel na wiiɗi na yalakai ɗa aga a zina piɗi kai

⁸ Ki siɗi aŋ miɗi ɓa: Tiyi mi ɗi ɗai na yalakai, gadai zi ɗû na wiini EPIƊ-ƊAI ɗa aŋ tiyi maɵa maɵa ɗa? A bunda a gadai na jre kir kai, pin ɗû na jre kai na ɗai zi ɗû gadai e ɗûŋ ɗa.

⁹ Ɗai na yalakai ɗa e wii siɗi war siyer, e ɗi na ɗa war hunai, e ɗi na ɗa gaini yimi yaw, e hini seŋ na wiini EPIƊ-ƊAI edi mak, e yiki siɗi ɓa e ɗi na maafanai warni a ma ɗa?

Ɗai paŋ e zi sda gaini eles

¹⁰ Buri nɵa, aga mu siɗi falakaiɗi wiiɗi ɗai na zamai, mu sa vowaiɗi wiiɗi ɗai n'e miliɗi lai. buri ɓa siɗi n'agogoi par haa siɗi n'abakai ta e si siɗi edi pini piyini der ɗa ta, sini ɗif na mini Alaw par haa siɗi paakai zi ɓaka ta, gaini hlaiɗi paŋ e zi ɗa eles.

¹¹ Gir n'aŋ siɗi ɗaiŋa ɗa, e yimiŋ ɗa aŋ wala kadai, e miɗi ɓa: Wala na meefeŋ aga a za kai, wala na meefeŋ aga a za kai, paŋ ktai, hlai a hala kai.

¹² E wii siɗi war siyer gaini wazagai na haharai n'e ziŋ ɗa, amma siyer ɗa a suma siɗi kai, e siɗi ɓa e ɗi war siyer kir kaalai, buri nɵa aga e mri gaiɗi nagai n'e mri ɗa, aga e yiiki azumai won hlai na mu faka li aŋ zilbiɗi miɗi ɗa, a miɗi na sini EPIƊ-ƊAI par.

Bayai zi siyer a wiini Alaw gaini na wiiɗi ɗai

¹³ Aga mu vidiɗi edi kafa, a miɗi na sini EPIƊ-ƊAI par, aga mu hina alini luwuŋ zi vin amai tini luwuŋni kaalai, ɵimani maa aga a hula edi, wala na mu siŋɗi ɗa, e zi gaini woɗi futini kai.

¹⁴ Mu sumnumu kadai nɵa ca ɗa buri maɗa? Diŋgisi hulumu war fuŋ n'abakai zi ɵaga ɗa, mu murumu woni, buri EPIƊ-ƊAI Alaw a wimu a fuɗumu na ɗa a fiɗi, a sumu aŋ ci na ɗa a yem na wala zi fiɗi ɗai a na arni, buri ɓa mu zumu tuwur sini EPIƊ-ƊAI.

¹⁵ Mi biyi ɗa ɓa wala na meefeŋ aga a za kir kai, amma hlai a hala kai sam, mi biyi ɗa a zûûli, amma a cosi ɗa a hunai n'abai.

¹⁶ Tuwini plasai a na wasi a Dan par, pin tuwini plasai zi hatam ɗa, afti paŋ a ziriya, a na halasi, aga a tuura, afti gaini wazagai na warni paŋ, fuŋ n'abai ɗa gaiɗi ɗai na warni paŋ lai.

¹⁷ Mu ɵinaɗi midiki na ɗa, a wala meefeŋ gaini makai, na hila na wiiɗi ɗai zi hila a suma sini kai, aga a limiki. A miɗi na sini EPIƊ-ƊAI par.

Ɵini hama na wiini Yeremiyas

¹⁸ Mu firiya mu rɗa amai midini girŋa ɗa, agula te na sɗa gir amlai wara,

¹⁹ mu na ɵina tuwi na ɗaiŋa e ɗa tûwi sa ɗa haa edi midini afti na gai gai par e miɗi ɓa: EPIƊ-ƊAI a na aha war Siyon kir kai ɗi? Paiɗi ɗa a na aha warɗi kir kai ɗi? -E tûûritiŋa agula gaini alawaiɗi zi rgi buri maɗa? Daini wazagai na nafani aŋ kai na wiiɗi ɗai n'edi par ɗa buri maɗa?

²⁰ - Hiɗi ɗa a vada vat, piya te vada vat, amma mu kurɗumu edi kai hai ɗa koo!

²¹ Gir na wiiɗi ɗaiŋa ɗa a gɵa keɵkeŋa duk, m'aŋ war kwimi, mu sɗa wala ktai na mu zaŋ ɗa kai.

²² Kurgum war Galaad kai ɗi? Doktor woni kai ɗi? Ɗaiŋa ɗa e zûûli kai ɗa buri maɗa?

²³ Aiya mada a na fu aŋ kiliŋi lai, ara ɗe aŋ hlai zi liwi tuwi lai ɗa, aga mu tuwiɗi ɗaiŋa n'e mri ɗa, girvudi gaini duvuk paŋ.