Yeremiyas 7 - Ɗû na sɗik na wiini AlawPɵi na ɗai e pɵi midini tempel ɗa a wala na nafani aŋ kai Yer. 26.1-19 1 EPIƊ-ƊAI a na midini seŋ wiini Yeremiyas, a miɗini ɓa: 2 diya mini porte na wiini tempel na wiini EPIƊ-ƊAI zaw, ku muɗa seŋ hanɗa edi maini nɵa, ɵini seŋ na wiini EPIƊ-ƊAI, tiki ɗai na Yuda ɗa paŋ, na ki ɗa niyisi amlai warni mini porte hanɗa, aŋ hûrgû azumai wuzani EPIƊ-ƊAI. 3 EPIƊ-ƊAI zi spak paŋ Alaw na wiiɗi Izrayel a na muɗa maini nɵa: bindi payaiki gaini sdaki kapai mu hiniki aŋ simni won hlai hanɗa. 4 Ki tiki hiiniki midini miɗi z'eles na ɓa: Hanɗa a tempel na wiini EPIƊ-ƊAI, hanɗa a tempel na wiini EPIƊ-ƊAI ɗa, ki tiki hiiniki midini kai. 5 Na ɓa ki bindi payaiki gaini sdaki li, na ɓa ki zi siɗi marki war jre maini n'a na ɗa ɵa, 6 na ɓa ki zini gir wiini ɗif zi jak, wiini ɗif na huyuk kai, wiiɗi muni na war greŋ kaalai, na ɓa ki fiɗi ɗif na tini war seŋ kai war hlai hanɗa kai, na ɓa ki hili pini alawai na kadai aŋ glasi seŋ midiki kai ɗa, 7 nɵa aga mu hiniki ki simni won na midini afti na mu siŋɗisi wiiɗi tamaiki ɗipar, kapai a hina aŋ wiiɗi ɵa haa kureɗ. 8 Amma tiki ki tiki hiiniki na ɗa miɗini miɗi z'eles na a nafa wala ktai kai ɗa. 9 Ki kiɗi ki hili wazagai lai, ki fiɗi ɗai lai, ki zi maɵara lai, ki hi wala miki war jre kai lai, ki yi wazagai zi ɗûgûdi zi lûgûzi wiini Baal lai. Ki hili pini alawai na jrekai kai, na ki sɗiŋ kaalai. 10 Asakal par ki hilisi ki ɗiyi wuza amlai warni tempel n'e yiki yikiŋa warni, aŋ miɗi ɓa: Mi pli edi ya amma siki aŋ zi wazagai na haharai hanɗa ɵa ɗaai ɗi? 11 Tempel n'e ɗa yikiŋa woni a bunda arki aŋ waŋɗi gorɓolokai ɗi? Hanɗa mu talaŋ mu ta gaini ara mal. A miɗi na sini EPIƊ-ƊAI par. 12 Hili a Silo, hlai na wiya, hlai na ykiŋa a yika woni avut ɗa haw, tili wala na mu zaŋ sini burini meefeŋ na ɗaiŋa e ziŋ ɗa, 13 tiyana ɗa, buri ki zi hanɗa paŋ, - a miɗi na sini EPIƊ-ƊAI par, buri ɓa mu miɗiki, mu waya mu miɗiki, haa azi viya mu kaya gaini ta, amma ki ɵini ma kai, buri ɓa mu yikiki, amma ki diri ki ɵini kai. 14 Nɵa ɗa aga mu za sini Dalam n'e yiki yikiŋa warni, na tiki ki tiki hiiniki midini lai, hlai na mu siŋki wiiki tiki gaiɗi tamaiki lai maini na mu zaŋ siɗi Silo ɗa nɵa. 15 Aga mu birgiki edi sa par gai gai, maini na mu birgiɗi tawalakaiki na war pinzibani Efrayim ɗa nɵa. EPIƊ-ƊAI a firiya a ɵina siiwa na wiini Yeremiyas na buriɗi ɗaini kai 16 Tuku Yeremiyas, ku siiwa buriɗi ɗai hanɗa kai, ku tuwasi sa buriɗi kai, ku siiwa buriɗi kai, ku siika ma buriɗi kai, buri ɓa aga mu ɵina siiwaku kai. 17 Ku na tala wala n'e ɗa ziŋ war fuŋ n'abakai na Yuda gaini n'e ɗa ziŋ warni futi na Yeruzalem lai ɗa kai ɗi? 18 Ali ɗa e hili e piyisi luwuŋ, tamaiɗi na maɵagai ɗa e pi afu ɗa, na falakai ɗa e hiɗi avdi n'e zi gato gaini wiiɗi Astarte Alaw na muni na war hlai n'amai. E zi ɓaka zi vin wiini alawai zamai zamai lai kapai e ɓilkiŋa agula gaini. 19 E hiini ɓa e ɓilkitiŋa na ɗa t'agula ta ɗi? A miɗi na sini EPIƊ-ƊAI par, e zi na ɗa a wala zi siyer na midiɗi nagai dama kai ɗi? 20 Buri hanɗa, Epiɗ-ɗai ALAW a na muɗa maini nɵa: Hiyŋa gaini suwarŋa aga a kɵasi midini hlai hanɗa, midiɗi ɗai gaini wazagai n'ezini puɗu puɗu, midini luwaŋai n'edi basga gaini seyem na midini afti paŋ, afu ni ɗa a afu n'a mra kai. Pinziba n'a ɵina mini Alawni kai 21 EPIƊ-ƊAI zi spak paŋ Alaw na wiiɗi Izrayel a na muɗa maini nɵa: Tipi wazagaiki na ki fiɗiŋ aŋ ɓaka zi yi ɗa gaini wazagai zi ɓaka zamai zamai ɗa lai, limi neŋni ɗa wiiki miki. 22 Buri ɓa mefeŋ na mu milikisi edi war Egipte par ɗa, mu miɗiɗi wala ktai wiiɗi tamaiki kai, mu siɗi gadai ktai miɗini ɓaka zi yi gaini ɓaka zamai zamai kaalai. 23 Na mu miɗiŋɗi ɗa a hanɗa: Ɵini pini seŋŋa nɵa aga mu bunda aŋ Alaw na wiiki, tiki ɗa aga ki bindi aŋ ɗaiŋa lai. Tikiti futi na mu na siŋkitiki ɗa, kapai ki simni ɵeɗ. 24 Amma e ɵini ma kai, e zigi ɵimaɗi ma kai, e zi pini jaaɗi, pini hiriŋ na wiini agulɗi na meefeŋ, e hilisi sa sek kai, amma e hili ɗa edi sek. 25 Haa sini mefeŋ na tamaiki e niyisi edi war Egipte par haa girna ta mu ɵiniɗikiɗi ɗaiŋa zi sda na ɗi na mini Alaw mu ɵiniɗiɗi mefeŋ paŋ, mu kaya gaini kai. 26 Amma nagai ɗa, e ɵini ma kai, e zigi ɵimaɗi ma kai, e zi siɗi hiraŋai e sûwiɗi tamaiɗi ɗa, e bindi meefeŋ na wiiɗi a suwa na wiiɗi tamaiɗi ɗa. 27 Koo na ɓa ku miɗiɗi seŋ hanɗa paŋ tekeɗeɗi, aga e ɵini muku kai, ku yikiɗi haa ma aga e tipisi suku kaalai. 28 Nɵa ku miɗiɗi ɓa: Hanɗa a pinziba n'a ɵini mini EPIƊ-ƊAI Alaw na wiini kai, n'a dara a ɵina gadai na wiini kai, jre te vada edi vat, te yima siɗi edi war miɗi par kai. Huduk n'e fiɗi ɗai woni 29 Ɗukla ayir na muduku zi nazir ɗa edi, pokoŋ edi warɗi futi n'edi war basga na kaɗataŋ sek ɗa, tika yama zi tuwi amai, buri EPIƊ-ƊAI a birgiɗi vna n'e bindiŋ gaini hiy ɗa edi, a hiniɗi edi lai. 30 Buri ɓa ɗai na Yuda e ziŋa wala n'a saŋa firiyi kai, a miɗi na sini EPIƊ-ƊAI par, e mili alawai na wiiɗi na jre kai kai ɗa amlai warni tempel n'e yiki yikini woni ɗa, e bindiŋ hihir lai. 31 E zizini hlai zi ɓaka n'e ykiŋ ɓa: Tofet azumai warni hlai zi huduk na wiiɗi alini Hinnom kapai e yiɗi aliɗi na maɵagai gaiɗi na falakai lai aŋ ɓaka woni, hanɗa a wala na mu miɗiŋɗi ka duk kai, na mu hiinaŋ duk kaalai. 32 Buri nɵa, mefeŋ aga a gizi, a miɗi na sini EPIƊ-ƊAI par, war mefeŋ ni ɗa, ɗif aga a yika Tofet war mini kir kai, aga e yiki huduk na wiiɗi alini Hinnom war miɗi kir kaalai. Amma aga e yikiŋ ɗa ɓa: Huduk n'e fiɗi ɗai woni, aga e piɗi ɗai ɗa war Tofet buri hlai zamai zi pi ɗai aŋ kir kai. 33 Kopoŋɗi ɗai hanɗa aga a bunda aŋ wala zi simi na wiini wazagai zi ɗufli n'arbani hlai n'amai gaini wazagai n'ezini puɗu puɗu na midini afti, ɗif aga a huwyaŋ kaalai. 34 War fuŋ n'abai na Yuda gaiɗi futi na war Yeruzalem ɗa, aga mu ɗiya suura na mini fet gaini ɗuwal zi firiyi, gaini yama na wiiɗi ɗai n'e mili marɗi. Afti hanɗa aga a bunda aŋ hlai zi deeɓer. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon