Yeremiyas 6 - Ɗû na sɗik na wiini Alaw

Gir n'abai a na halasi midiɗi Yeruzalem

¹ Yimi siki edi warɗi Yeruzalem ɗa par, tiki pinzibani Benyamin, piyi hlaiki zi simni war hlai zamai. Yibi faana war Tekuwa, pi drapo amai war Bet-Kerem, buri ɓa gir a na halasi midiki gir n'a na halasi midiki war gal n'azumai ɗa par, a gir n'abai gara.

² Yeruzalem na juvi na pɗemi, ɗai e hilisi aha warɗi gara pini juvɗi.

³ E hilisi midiɗi maiɗi ɗai zi giɗimi na gaini farani faraiɗi nɵa, e pi gumuɗi edi par siɗi tiɓ tiɓ, haa gaini gûni amlai gun, ɗif paŋ a ka farani faraini aŋ simi.

⁴ E miɗi: hulumu amai hutumumu hatam na sɗik gaiɗi, mu sukuɗumu aha girvudi, aiya, futi te hala ɗaw, seze na koskoi maa a na wasi tini edi.

⁵ Mu sukuɗumu aha duvuk, mu tuurumu dalamɗi na pɗamai ɗa edi.

EPIƊ-ƊAI a ziɗi zaida n'abai

⁶ EPIƊ-ƊAI zi spak paŋ a na muɗa maini nɵa: bili luwuŋ, libi hlai na ki pri aha midini ɗaw amai si ɗi ɵagai na Yeruzalem, a fuŋ n'abai na seŋni meefeŋ, aha warni ɗa a na a karai sal.

⁷ Meefeŋɗi ɗa a wayasi pra pra maini yem n'a liwa warɗi kiliŋi nɵa, a hina aha warɗi ɗa a karai gaini vram, a na wuzani ara kureɗ a gir gaini wuruk.

⁸ Yeruzalem, yima gadai na mu na suŋku ɗa, ɵa kai ɗa aga mu bunda ara edi suku par, mu bunduku aŋ basga na kaɗataŋ, aŋ afti na ɗai e simni midini kai.

Ɗai n'e diri buri e ɵini kai

⁹ EPIƊ-ƊAI zi spak paŋ a na muɗa maini nɵa: piɗi aliɗi Izrayel n'e hini karɗi ɗa, ɗai aga e piyiɗi maini n'e piyi alini luwuŋ zi vin, amai par sini luwuŋ ɗa nɵa. Ki wii tiki sini tini n'a waŋ edi paŋ, maini epiŋgezani luwuŋ zi vin n'a na paya alini luwuŋ zi vin ɗa nɵa.

¹⁰ Aga mu miɗini wiini asiya ɗa? Aga mu za aŋ zaidaŋa ɗa asiya ɗa na kapai e ɵini ma ɗa? E ɵi gûrgûle wiini ɵimaɗi kai, e tiki hangalɗi mini wala kai, seŋ na wiini EPIƊ-ƊAI ɗa, e yimiŋ ɗa aŋ wala zi siyer, jaaɗi gaini kai.

¹¹ Suwar na wiini EPIƊ-ƊAI ɗa, a suwa gdaŋŋa suwai, ta a ɵa mini kir kai. Hina suwar hanɗa midiɗi aliyagoi na warɗi futi, midini vokɗi aliyagoi gaini hlaiɗi paŋ, maɵagai gaiɗi falakai, na walakai gaiɗi na walakai kro kro paŋ.

¹² Dalamɗi ɗa aga a sa siɗi ɗai zamai, vowaiɗi gaiɗi falakaiɗi nɵa lai. Aga mu siŋka spakŋa siɗi ɗai na midini afti ɗa, a miɗi na sini EPIƊ-ƊAI par.

¹³ Buri ɓa siɗi na agogoi par haa siɗi na abakai ta, e si siɗi edi pini piyini der ɗa ta, ɗai na mini Alaw gaiɗi paakai zi ɓaka paŋ, ɗif na a muɗa jre aŋ kai.

¹⁴ Gir n'aŋ siɗi ɗaiŋa ɗa e yimiŋ ɗa aŋ wala kadai, e miɗi ɓa: wala na meefeŋ aga a za kai, paŋ ktai hlai a hala kai.

¹⁵ E wii siɗi war siyer gaini sdakai na haharai n'e ziŋ ɗa, amma siyer ɗa a suma siɗi kai, e siɗi ɓa e ɗi war siyer kai, buri nɵa aga e mri gaiɗi nagai n'e mri ɗa, aga e yiki azumai won hlai na mu faka li aŋ zilbiɗi miɗi ɗa, a muɗaŋ ɗa a EPIƊ-ƊAI.

¹⁶ EPIƊ-ƊAI a na muɗa maini nɵa: ki ɗiyi afuti caaŋa tili arki, zilbi miɗini futi na ɗipar ɗa, futi na pɗemi te na wata ɗa, tikiti futi na ɗa, aga ki nifi si n'amla. Amma e wiyini seŋ ɓa: aga mi tikiti na ɗa kai.

¹⁷ Mu miliki ɗai n'e zi helek e ɗa ca ca buriki, ki tiki hangalki sini wala n'aga e siŋkiŋki ɗa. Amma e wiyi seŋ: tiyi mi tiki hangalyi siɗi kai.

¹⁸ Buri nɵa, pinziba n'edi par ɗa ki ɵini pɗem, tiki vokɗi ɗai na Izrayel, sɗa wala n'e ɗa e ziŋ ahaɗi ɗa.

¹⁹ Tiki ɗai na midiɗi yai, ɵini pɗem, mu kasi gir midiɗi ɗai hanɗa mu ta, gir hanɗa a za na ɗa pini hiiniɗi na meefeŋ. Buri ɓa e tiki hangalɗi sini seŋ na mu miɗiŋɗi kai, gadaiŋa zi ɗû ɗe e ɗiyi sini kaalai.

²⁰ Wazagai zi ɗûgûdi zi lûgûzi na Saba par, mu za gaini ɗa a maɗa? Vayai na a luguza pɗem n'e piyiŋsi midini afti na gai gai par ɗa, mu za gaini ɗa a maɗa? Ɓakaki zi yi ɗa mu yimaŋ a yimi kai, ɓaka na zamai ɗa paŋ ɗa, a saŋa firiyi kaalai.

²¹ Buri hanɗa, EPIƊ-ƊAI a na muɗa maini nɵa: aga mu tika wala zi dibi azi wuzaɗi ɗai hanɗa nagai paŋ eziɗi aga a daba sini, tamai gaiɗi ali, ɗai na ɵimaɗi marɗi gaiɗi marmakai, aga e mri gaini hlaiɗi paŋ.

Ɗif zi tûûri hlai a na halasi war gal n'azumai par

²² EPIƊ-ƊAI a na muɗa maini nɵa: pinziba ktai a na halasi midini afti na war gal n'azumai par, a pinziba n'abai, e fikisi ya, e ɗa hilisi edi mini dibini afti par.

²³ E yimi ɓarawɗi gaini yaalaɗi amai; e ɗi ɗai na maafanai gara na hiinini haw warɗi kai, e sûûri maini mayaw n'abai na wiini yem-ra n'abai nɵa, miɗini plasai dam dam, e giri miɗi marɗi gaara, e zizini siɗi gaini futini, e diri e hitimuku, tuku Yeruzalem.

²⁴ Tiyi mi ɵini labar hanɗa, gdaŋyi a vada edi, hunai n'abai a yimiyi, mi tiki piyi mi siɗi gir maiɗi muni na pûkû a na a ziti nɵa.

²⁵ Ki hili edi warni basga kai, ki hili war futi kai, buri ɓa gawki ɗa aŋ woni gaini kaɵkar tini ɗaw, hlai paŋ ɗa ɗai e hûniŋ.

²⁶ Tiki ɗaiŋa, wii sapa zi sak siki, bibli siki azumai arni alogodo, zi groho maini na wiiɗi muni n'ahiɗi ktai nɵa. Zna yama zi tuwi na a vada gdaŋɗi ɗai edi, buri ɗif zi tûûri hlai ɗa aga a luɓasi mudumu tizaw.

²⁷ Mu tukuku arbaɗi ɗaiŋa ɗa aŋ tiliɗi, kapai ku titimiɗi, ku sɗa na siɗi ɗa. Titima payaiɗi lai.

²⁸ Nagai paŋ e ɗi ɗai n'e ɵini gat kai na hiraŋai, e ɗi ɗai n'e miɗi meefeŋ midiɗi, agulɗi ɗa gdeŋi maini kiiya nɵa, maini kawai nɵa lai, nagai paŋ e ɗi ɗai n'e tûûri hlai.

²⁹ Vugum ɗa a yiba, tatna ɗa a hiliya arni afu, ɗai e kiyi siɗi na ɗa meere kadai, selte na sini ɗa a yima edi kai.

³⁰ Ɗai hanɗa e yikiɗi ɓa: arzaŋ zi bili edi, buri ɓa EPIƊ-ƊAI a pûkûɗi edi puk.