Yeremiyas 5 - Ɗû na sɗik na wiini Alaw

Yeruzalem, fuŋ n'abai n'a va gaini meefeŋ

¹ Gûni warni futi na Yeruzalem ɗa yaw yaw, ki tili arki, ki yimi labar lai, ki hili warni hlai na ɗai e tipi woni ta ta ɗa, na ɓa ki nifi li ɗif ktai, ɗif n'a za maini na gadai a ɗiyaŋ ɵa, n'a firiya jre lai ɗa, aga mu haza meefeŋ na wiini fuŋ n'abai ɗa edi.

² E fiki li e hi wala miɗi ɗa e miɗi ɓa: gaini EPIƊ-ƊAI na karni jaŋ. Miɗi n'e hiŋ na ɗa a jre kai.

³ EPIƊ-ƊAI arku a tala ɗa a jre ɗa kai ɗi? Ku fiɗiɗi, amma a fiɗiɗi siɗi kai, ku vidiɗi edi, amma e diri e yimi gadaiku kai, e bindi midiɗi gdaŋ a suwa kriyit, e diri e wiyisi kai.

⁴ Mu hiina ɓa e ɗi ɗai na hurofai kadai, e zi sdaɗi maiɗi ɗai zi dûûli ɵa, buri ɓa e siɗiti futi na wiini EPIƊ-ƊAI kai, e siɗi jre na wiini Alaw na wiiɗi kaalai.

⁵ Aga mu hala wiya siɗi ɗai n'abakai ɗa, aga mu muɗa gaiɗi, buri ɓa, nagai ɗa e siɗiti futi na wiini EPIƊ-ƊAI ɗa, e siɗi jre na wiini Alaw na wiiɗi lai. Amma nagai lai, e ɗi mai marɗi ɵa, e hiɗi jug na wulaɗi edi ɓaw, e rûwi jaaɓɗi edi raw lai.

⁶ Buri nɵa gurnai na basga par aga a ziɗi, belemke aga a vidiɗi, ahrawai aga a riɓtiɗi mini fuŋɗi n'abakai, nagai paŋ n'e niyisi li aha warni par ɗa a fûwiɗi. Buri ɓa hi n'amai midini gadai na wiiɗi a suwa viya, tuwurɗi ɗa a za viya ta lai, a pɵa kai.

⁷ Kapai mu haza tuwurku wiya edi maini hanɗa ɵa ɗi? Aliku ɗa e hiniŋa edi mak, e hi miɗi ɗa gaini Alaw na jre ɗa kai, mu siɗi der viya, amma e zi ɗa a maɵara, e firi ɗa aha miɗi zawarai.

⁸ E ɗi plasai n'edi buza gaini liki gaini futini, ɗif paŋ n'a tiliti munini maini li ɗa a firiyiti paŋ.

⁹ Ɗai na maini hanɗa ɵa ɗa, mu za wala ktai siɗi kai ɗi? A miɗi na sini EPIƊ-ƊAI par. Pinziba na maini hanɗa ɵa ɗa aga mu zini gir kai ɗi?

¹⁰ Niyi amai midini ɵaga ɗaw, tûûri wazagai ɗa, amma ki vidiŋ edi paŋ kai; Bili tin luwuŋ zi vin ɗa edi, buri ɓa a wiini EPIƊ-ƊAI kai.

¹¹ Buri ɓa ɗai na Izrayel gaiɗi ɗai na Yuda ɗa, e ɗûûliŋa gazi gazi, a miɗi na sini EPIƊ-ƊAI par.

¹² E ɓiɓiri miɗi burini EPIƊ-ƊAI, e miɗi: EPIƊ-ƊAI ɗa asiya ktai ɗa? Gir aga a halasi midiyi kai, gaw aga a ziyi kaalai, wiyamai te ziyi kaalai.

¹³ Ɗai na mini Alaw ɗa, e ɗi smer kadai, Alaw a siɗi seŋni miɗi kai, gir n'e miɗi gaini na ɗa a kɵa midiɗi.

¹⁴ Buri hanɗa, EPIƊ-ƊAI zi spak paŋ a na muɗa maini nɵa: Miɗi n'e miɗiŋ maini hanɗa ɵa ɗa, aga mu wa seŋ war muku tuku Yeremiyas, aga a bunda aŋ afu, ɗai hanɗa aga e bindi aŋ luwuŋ n'afu aga a yaŋ edi.

¹⁵ Ɗai na Izrayel, aga mu kasi pinziba ktai midiki, mu kiɗisi gai gai par, a miɗi na sini EPIƊ-ƊAI par. E ɗi pinziba na gdaŋai, na ɗif a rɗa amai midiɗi kai, e ɗi piziba na haa gamai par, e ɗi pinziba na ki siɗi seŋɗi zi miɗi ɗa kai, n'e miɗiŋ ɗa ki ɵiniŋ kaalai.

¹⁶ Gulon n'aŋ tiɗi ɗa a waŋ na mini gaini mili mal, e ɗi ɗai n'e siɗi hatam gaini futini paŋ,

¹⁷ aga e vidi seyemku zi hiɗi gaini wazagaiku zi simi ɗa paŋ, aga e fiɗiɗi aliki na maɵagai gaiɗi na falakai, aga e vidi adumaiki gaini haakaiki gaini ɵaakaiki lai edi. Aga e vidi ali luwuŋ zi vin gaini luwuŋ Fige na wiiki ɗa, fuŋki n'abakai na ki pɵi midini na ɗa, aga e hiɗiŋ azumai.

¹⁸ Amma koo warni mefeŋ hanɗa tekeɗeɗi, a miɗi na sini EPIƊ-ƊAI par, - aga mu vidiki edi marwai kai.

¹⁹ Nɵa, na ɓa e zilbuku li ɓa: EPIƊ-ƊAI Alaw na wiyi a ziyi ɵa paŋ ɗa buri ma ɗi ɗa? Tuku Yeremiyas, ku wiyiɗi seŋ ɓa: Tiki ki hiniŋa edi, ki zi ɵeŋni alawai n'edi par, midini afti na wiiki, nɵa aga ki zi ɵeŋ na wiiɗi ɗai, midini afti na wiiki kaalai.

Won hlai na ɗai e siɗi spakni Alaw kir kai ɗa

²⁰ Miɗi labar hanɗa sini pinzibani Yakob, ki miɗiŋ aha war Yuda lai.

²¹ ɵini pɗem, ɗai na yel midiɗi kai, na hangalki a kiɗa kaalai, arɗi a na, amma e tili kai, ɵimaɗi a na, amma e ɵini kaalai.

²² Tiki aga ki hûniŋa kai ɗi? A miɗi na sini EPIƊ-ƊAI par. Aga ki ziriyi wuza kai ɗi? Ta na mu sini kai kai ɗa wiini yem-ra n'abai aŋ haga ɗa, aŋ haga n'a hina ɵa haa kureɗ, a vugaŋsi edi kai. Mayawni a ɵiɓa amai, amma a za wala ktai kai, a suura amma a vuga haga ni kai.

²³ Ɗai hanɗa, midiɗi gdaŋ, e ɵini seŋ kai, e yimi siɗi edi, e hili wiiɗi pini jaaɗi.

²⁴ E hiini na ɓa: Sumu hormo wiini EPIƊ-ƊAI Alaw na wiimu, n'a sumu faŋ war sartini, a sumu faŋ n'avut gaini faŋ n'asakal, n'a giɗimumu war mefeŋ na wiini hiɗi lai ɗa, hiini hanɗa aŋ warɗi kai.

²⁵ A turla hlai na ɗa a meefeŋki ɗa, a ɗala der hanɗa edi miki na ɗa a tuwur na wiiki ɗa lai.

²⁶ Ɗai na maafanai e ɗa arbaɗi ɗaiŋa ɗa, e ripti maiɗi ɗai n'e gini azaw aŋ yimi wala zi ɗufli ɗa nɵa, e gini azaw e yimi ɗai ɗa gaini.

²⁷ Dalamɗi a va gaini wazagai n'e niviŋ war jre kai ɗa, maini dologo n'a va gaini wala zi ɗufli ɗa nɵa, nɵa e bindi aŋ ɗai zi spak, zi farai lai.

²⁸ E bindi gargalakai, e ŋili gaini ŋili, meefeŋ n'e ziŋ kai aŋ kai, e ɗiyi miɗini jre kai, jre na wiiɗi na huyokai ɗa, e siŋkiŋ edi kai, e riyi wuzaɗi sek sek, jre na wiiɗi na murgakai ɗa, e hiini midini kaalai.

²⁹ Ɗai na mai hanɗa ɵa ɗa, mu za wala ktai siɗi kai ɗi? A miɗi na sini EPIƊ-ƊAI par, pinziba na mai hanɗa ɵa ɗa aga mu zini gir kai ɗi?

³⁰ Wala n'a na vuga midini afti na ɗa, a wala n'a vada gdaŋni ɗif edi, a wala na sabap gara.

³¹ Ɗai na mini Alaw ɗa, e miɗi ɗa a seŋ na jre kai, paakai zi ɓaka e zi ɗa maini n'e diri nɵa, ɗai ɗa e firiyi maini hanɗa ɵa lai, dawai sek ɗa, burini aftiki ɗa aga ki zi ɗa a maɗa?