Yeremiyas 2 - Ɗû na sɗik na wiini Alaw

Aliɗi Izrayel e hini Alaw na wiiɗi edi mak, pini alawai na a nafa wala kai

¹ EPIƊ-ƊAI a muɗaŋa seŋ, a muɗaŋa ɓa:

² Hala, ɗuula gaini gdaŋku ɵimaɗi ɗai na Yeruzalem, ku miɗiɗi ɓa, EPIƊ-ƊAI a na muɗa maini nɵa: mada a kɵa gaini tipi na ku tapa gaya war hlai na ku na agwi hai ɗa, gaini diri na ku daraŋa hlai na mu tukuku hai ɗa, won hlai na ku na ka pa su edi war basga na kaɗataŋ midini afti na wala a diya woni kai.

³ Izrayel te na ka te wala na sɗik burini EPIƊ-ƊAI, te merfeŋni seyem na a sa sini, nagai paŋ n'e simiŋ li ɗa, e gli midiɗi ɗa a seŋ, a miɗi na sini EPIƊ-ƊAI par.

⁴ ɵini seŋ na wiini EPIƊ-ƊAI, tiki na war pinzibani Yakob, gaiki tiki paŋ na war pinzibaɗi aliɗi Izrayel,

⁵ EPIƊ-ƊAI a na muɗa maini nɵa: meefeŋ na tamaiki e niviŋ sa ɗa a na wata ɗa? Na kapai e yimi siɗi edi sa par, aŋ tiki futi pini wala na nafani kai, kapai nagai lai e bindi aŋ wala na nafani kai lai ɗa buri maɗa?

⁶ E ɗi ka e miɗi ɓa: EPIƊ-ƊAI ɗa aŋ wata ɗa, ni n'a miliyisi edi warɗi Egipte par ɗa, na a ɵa wuzaɗi edi warni basga na kaɗataŋ ɗa, midini afti zi hlai na plas na kooloŋ gaini hlai zi waŋ, midini afti na huleŋ zi sezeni mri, midini afti na ɗif a vuga woni kai, na ɗif murɗek a sumna woni kaalai.

⁷ Mu kiki aha midini afti na luwuŋ z'ali a za warni gara, ɓa kapai ki limi alini, ki firiyi gaini wazagai na pɗamai na sini lai, won hlai na ki cûsi woni ɗa, ki bindi aftiŋa hihir, ki bindi afti zi bulum na wiya ɗa aŋ wala na hihir.

⁸ Paakai zi ɓaka ɗa e zilbi ɓa EPIƊ-ƊAI ɗa aŋ wata ɗi kir kai, nagai n'e siɗi gadai zi ɗû gara ɗa e siɗiŋa kir kai, zi ɵi wuze ɗa e fiki amai sa, ɗai na mini Alaw ɗa e miɗi ɗa war yikini Baal, e tiɓi ɗa piɗi nagai na nafaɗi kai ɗa.

⁹ Aga mu pa seŋ midiki, a miɗi na sini EPIƊ-ƊAI par, mu pa seŋ midiɗi aliki gaiɗi aliɗi aliki lai.

¹⁰ Tiyana ɗa ki hili sini hudi na Kitim, tili, ki ɵini ɗai a Kedar aŋ yimisi labar gaini futini, tili haw na ɓa wala na maini hanɗa nɵa a na a za ɗa.

¹¹ Pinzibaɗi ɗai na a bunda alawni a na ɗi? Paŋktai wazagai hanɗa maa a alawai kaalai! ɗaiŋa ɗa e bindiŋa ta na mu kol na wiiɗi ɗa, gaini wala na a nafa kai.

¹² hlai n'amai, bunda hiyak, ziriya, huula edi lai, a miɗi na sini EPIƊ-ƊAI par.

¹³ Buri ɓa ɗaiŋa ɗa e zi meefeŋ ɗa azi sulu, e hiniŋa, ta na yem zi liiwi na karni na a sa suŋfa ɗa edi mak, e ɓili kalaŋ na warni gaini niɓi na yem a yima warni kai.

A gir gara buri hina EPIƊ-ƊAI edi

¹⁴ Aliɗi Izrayel ɗa e ɗi bagakai ɗi? E wûriɗisi gaini wûri zaw e wii war bege ɗi? Na ɓa ɵa kai ɗa e hini tiɗi ɗai yaw aŋ vram ɗa buri maɗa?

¹⁵ E nûûmi siɗi maini gurnai nɵa, e ɓiri, e tûûri aftiɗi edi marwai, e yi fuŋɗi n'abakai edi lai, ɗif a hina warni kir kai.

¹⁶ Ɗai na war Memfis gaiɗi na Tapanes par aga e kûltiki midiki edi maiɗi ɗai n'e yimiɗi mini gaw par ɵa.

¹⁷ A za siki ɵa na ɗa, buri ɓa won hlai n'EPIƊ-ƊAI Alaw na wiiki a na ka a sa wuzaki warɗi futi ɗa ki hiniŋ edi mak ɗa kai ɗi?

¹⁸ Tiyana ɗa, wala na ki piyisi tiɗi Egipte par ɗa a maɗa? Ki hili na ɗa aŋ ci yem na warni ra Nil ɗa zaw, Wala na ki piyiŋsi siɗi Asiriya par ɗa a maɗa, ki hili na ɗa aŋ ci yem na war Öfrata par zaw?

¹⁹ A juva ɓa meefeŋ na ki ziŋ ɗa a gidiki, jrekai na wiiki ɗa a waya midiki kapai a yima midiki ɓa, hini na ki hiniŋa ta n'EPIƊ-ƊAI Alaw na wiiki edi mak, ki siɗiti abaiŋa kir kaalai ɗa, a wala na meefeŋ gara, na gir gara lai. A miɗi na sini Epiɗ-ɗai ALAW, Alaw zi spak paŋ par.

Izrayel te na maiɗi muni zi zawar na jreɗi aŋ kai nɵa

²⁰ EPIƊ-ƊAI a muɗa: Izrayel, ku fakasi amai sa haa aɗipar, arbamu na gaiɗi marmu ɗa, ku ɗuklaŋ daf lai. Ku muɗa ɓa: mu za ɵeŋ kir kai; paŋ ktai, midini boŋorai paŋ, azumai pini luwaŋai na a goɗo paŋ, ku yiva blaŋ aŋ zi zawar.

²¹ Ta mu puku azumai ɗa ɓa ku luwuŋ zi vin na gaini futini, aŋ luwuŋ na pɗem n'aga a waa ali na pɗamai lai. Amma ku bunda ku luwuŋ zi vin na basga n'a waa ali na maafanai, a za ɵa maɵa maɵa ɗa?

²² Koo ɓa ku kora suku edi gaini hum kaw, koo ɓa ku vada zabul suku gamaɗi ɗa, meefeŋku aga a haza edi wuzani ara par kai, a miɗi na sini Epiɗ-ɗai ALAW par.

²³ Ku kiɗa aŋ muɗa ɓa mu bunda sa hihir kai, mu hurga azumai wuzani Alaw Baal kai ɗa maɵa maɵa ɗa? Ku tala sdaku na ku zaŋ war huduk ɗa, ku sispa kai, ku na maiɗi ɵigini na koluki na te lawa war galni hlai paŋ.

²⁴ Tuku ku na maiɗi Amuri na basga, na te hitra simni na baŋa siɗi su ta nɵa, na mefeŋɗi zi zivini a cosi li ɗa te yima merfeŋɗi pini smer ɗa, War sarti na wiini ziviniɗi ɗa, wala a sɗa aŋ ɗiliti kai, maɵagai e ɗiyivu aŋ piyiti ɗa e niviti gobi kadai, hlai na te na zuvuna tar ɗa, e kiɗi e niviti tar.

²⁵ Ɗiya ta, ɵa kai ɗa aga ku hina blaŋ wala tuku kai, muku aga a ya warku lai, amma ku muɗa ɓa: aza maɗa? Mu firyiɗi ɗa e ɗi ɗai n'edi par, mu hala piɗi.

²⁶ Aliɗi Izrayel ɗa siyer aga a yimiɗi maini ɗif zi mihill na e niviŋ war hil nɵa, nagai lai, paakaiɗi lai, ɗaiɗi n'abakai lai, paakaiɗi zi ɓaka lai gaiɗi ɗaiɗi na mini Alaw lai.

²⁷ Nagai e miɗini wiini luwuŋ ɓa: tuku k'apiyi, ki miɗini wiini alini fuŋ ɗa ɓa: ku wiiyi ku tuku, e bindisi arɗi sa sek ɗa e diri kai, e siŋa ɗa a duɓaɗi, amma won hlai na gir a niviɗisi li ɗa, e ɗûûli ɓa: fakasi amai fak, kûrɗiyi edi kruɗ kai ɗe!

²⁸ Alawai na wiiku na ku zizinaŋ ɗa aŋ wata pra, e fikisi amai kir ka, na ɓa e kiɗi e kurɗuku edi mini gir par ɗa, buri ɓa alawai na wiiki a suwa viya gara maini fuŋki n'abakai. A ɗai na Yuda!

²⁹ Seŋ n'aga ki piŋŋa mada ɗa a na wata ɗa, gaini hlaiki paŋ ki fiki amai sa kafa ɗa koo, a miɗi na sini EPIƊ-ƊAI par.

³⁰ Mu fiɗiɗi aliki ɗa edi kadai meere, wala na mu firiya mu yimiŋɗi midiɗi ɗa e yimiŋ kai, kaɵkar na wiiki ɗa a vidiɗi ɗai na mini Alaw na wiiki ɗa edi maini gurnai na a tuura wala nɵa.

³¹ Tiki na war vuna na ki ɗi na ɗa, tiki hangalki sini seŋ na wiini EPIƊ-ƊAI ɗa! mu na ka buriɗi Izrayel mu basga na kaɗataŋ ɗe, zaw m'afti na gegeŋ tekeɗum ɗi. Ɗaiŋa ɗa e miɗi ɓa: mi hili wiyi wa ta sek ɗa kal, mi wiyiɗi suku sek kir kai ɗa, buri maɗa?

³² Ɓulmi ɗa midiɗi a wula gaini wazagaiɗi zi gaŋ ɗa ɗi, muni na e tikiti ɗa, midiɗi a wula gaiɗi robɗi zi tiki ɗa ɗi? ɗaiŋa ɗa midiɗi a wula gaya skeŋ, tiyana ta kai, feŋ a za yaw.

³³ Tuku ɗa, piyini diri ɗa ku sɗaŋ gara, koo falakai na seŋɗi meefeŋ gara kaw ɗi ɗa, ku kiɗa ku hitriɗi.

³⁴ Mini sapaku n'edi maa e nifi felɗi ɗai na murgakai gaiɗi na tiɗi war seŋ kai ɗa mini, paŋ ktai ku niviɗisi aŋ hiɗi mini hlaiku gaini gdaŋ kai. Gaini hanɗa paŋ ɗa,

³⁵ ku muɗa ɓa: ta warni seŋ kai, hiy na wiini EPIƊ-ƊAI ɗa aga a vuga edi mada vug. Amma aga mu niya warni sariya gaiku, buri ku muɗa gaini muku ɓa: mu za tuwur kai.

³⁶ Ku hala haa gai gai ɵa aŋ bunda futiku tiɓ buri maɗa? Egipte aga te tukuku siyer, maini n'Asiriya te tukuku ka siyer ɗa nɵa lai.

³⁷ Woni par ɗa aga ku niyasi edi gaini tuku muduku ca lai, buri ɓa nagai na ku pɵa midiɗi na ɗa EPIƊ-ƊAI a firyiɗi kai, aga ku nafa ɗa maini hanɗa ɵa kai.