Yeremiyas 12 - Ɗû na sɗik na wiini Alaw

¹ EPIƊ-ƊAI, ku suwa jre gara, kadai tiɓ ɗa mu kiɗa mu pa seŋ suku kai, amma gaini hanɗa paŋ ɗa wazagai zamai zamai n'a na vuga ɗa a na maini n'a za ɵa kai. Futi na wiiɗi ɗai na maafanai ɗa, te bunda aŋ futi zi der ɗa maɵa maɵa ɗa? Nagai na jrekai kai, e simni ɵeɗ ɗa maɵa maɵa ɗa?

² Tuku ku piɗi azumai, sirdaiɗi a ruva azumai, e wili amai, e ɗa e wii ali, war miɗi amai ku na siɗi gobi, amma warɗi agulɗi ɗa k'aŋ siɗi gai gai.

³ Tuku EPIƊ-ƊAI ɗa, ku sɗaŋa, ku na talaŋ, ku sɗa hiini n'aŋ warɗi agula, agula te wiiku, na maafanai ɗa ku giɗimiɗi maini adumai n'e kiŋ aŋ fiɗi nɵa, miliɗi edi ca aŋ biyi mefeŋ na wiini fiɗi ɗa.

⁴ Afti ɗa aga a sumna war kwimi ɵa haa kaswata ɗa? Evek n'edi war basga ɗa aga a siita ɵa haa kaswata ɗa? Wazagai n'ezini puɗu puɗu gaini wazagai zi ɗufli aga a vada edi burini meefeŋ na ɗai e ziŋ ɗa ɵa haa kaswata ɗa, buri e miɗi ɓa: Alaw a sɗa wala na dawai sek ɗa kai.

⁵ Na ɓa ku lawa li gaiɗi ɗai ku kaya su ɗa, ku kiɗa ku kata muku gaini plasai ɗa maɵa maɵa ɗa? Na ɓa ku tala suku ɵeɗ midini afti, na hûwyi warni kai ɗa, ku sa li mini ra Yurdan na wazagai na buza na sabapai aŋ warni ɗa, kapai ku za suku maɵa ɗa?

⁶ E zuku meefeŋ na ɗa e ɗi zagalakaiku dama, gaiɗi pakataini apuku lai. Nagai mal ɗa e ɗûûli puku gaini gdaŋɗi, nɵa ku yima piɗi kai, koo e miɗuku seŋ na pɗamai ɗi, ku yima piɗi kai.

Alaw a hina tempelni gaiɗi ɗaini lai edi

⁷ Mu hina dalam na wiya ɗa edi mak, mu hina bulum na wiya ɗa edi mak lai, ɗaiŋa na mu diriɗi gara ɗa, mu siɗi war tiɗi gawɗi.

⁸ Bulum na wiya a bunda ara maini gurnai n'edi warni basga nɵa, a bunda a nuuma sa gaini nûûmi, mu daraŋ kai na ɗa burini hanɗa.

⁹ Bulum na wiya a bunda buriya aŋ wala zi ɗufli, zi fi wala n'a dedeɓa gaini fel ɗi? Na kapai wazagai zi ɗufli zi fi wala a gunaŋ azumai. Hili diŋgisi wazagai na buza paŋ par, ki kiŋsi sini simi ɗa.

¹⁰ Ɗai zi giɗimi viya e ɗa tûûri zardeŋ zi vin na wiya ɗa edi, e tiyiɵi hlaiŋa ɗa azumai, hlaiŋa na mu daraŋ gara ɗa aŋ basga na kaɗataŋ, aŋ hlai na kadai su.

¹¹ E bindiŋ aŋ hlai na kadai su, an na warni kwimi, e tûûriŋ wuzani ara, afti paŋ a tuura edi kok, ɗif ktai n'a hiinaŋ aŋ kai.

¹² Nagai n'e tûûri hlai ɗa e ɗa hilisi warni futi na su su edi war basga paŋ par, buri kaɵkar na wiini EPIƊ-ƊAI a na sumasi hlai ɗa, edi war galni afti ktai par haa sini na ktai ta, ɵeɗ aŋ kir kai buriɗi ɗai paŋ.

¹³ E bili ɗa a algama, amma e hiɗi ɗa a hedek, e kiyi siɗi kadai meere, e nifi wala kai, hini, siyer a yimiki, burini hiy n'abai na wiini EPIƊ-ƊAI ɗa.

EPIƊ-ƊAI gaiɗi ɗai na ɵimaɗi Izrayel

¹⁴ EPIƊ-ƊAI a na muɗa siɗi ɗai na ɵimaɗi na maafanai n'e ɗa ɵi dawaŋ gaini bulum na mu siŋɗi wiiɗi Izrayel na ɗaiŋa ɗa maini nɵa: Aga mu hûrɗiɗi amai midini aftiɗi par, aga mu miliɗisi ɗai na Yuda edi arbaɗi par lai.

¹⁵ Amma asakal na mu hûdiɗisi li amai ɗa, hinini-haw aga a yimaŋa buriɗi pra, aga mu waya ɗif paŋ aha midini aftini aftini.

¹⁶ Na ɓa e hitri li aŋ zi maiɗi ɗaiŋa ɵa, na ɓa, e hi wala miɗi gaini yikiŋa, - gaini EPIƊ-ƊAI na karni zaŋ, - maini na nagai e hitriɗi ɗaiŋa aŋ hi wala miɗi gaini Baal na ɵa ɗa, nɵa aga e nifi hlai zi simni arbaɗi ɗaiŋa.

¹⁷ Amma na ɓa, e ɵini kai ɗa, aga mu hurɗa pinziba n'a za ɵa ɗa amai, mu vadaŋ edi lai. A miɗi na sini EPIƊ-ƊAI par.