Yeremiyas 11 - Ɗû na sɗik na wiini Alaw

Ɗai e zi pni bonu n'e ziŋ ɗa kai

¹ Seŋ n'EPIƊ-ƊAI a miɗiŋni wiini Yeremiyas a na maini nɵa:

² Ki tiki hangalki sini seŋ n'aŋ warni bonu hanɗa, ku muɗa seŋ hanɗa wiiɗi ɗai na Yuda gaiɗi na Yeruzalem,

³ ku miɗiɗi ɓa: EPIƊ-ƊAI, Alaw na wiiɗi Izrayel, a na muɗa maini nɵa: Ɗif n'a ɵina pini seŋ n'aŋ warni bonu hanɗa kai ɗa, tu sa a sumna miɗini.

⁴ Gadai na mu siŋɗi wiiɗi tamaiki war mefeŋ na mu miliɗisi edi war Egipte par, warni waŋ n'e hiliyi kawai warni par, mu miɗiɗi ɓa: Ɵini ma, ki zi pini wala paŋ na mu gidiki miɗini, nɵa tiki aga ki bindi aŋ ɗaiŋa, Ta aga mu bunda aŋ Alaw na wiiki lai.

⁵ Nɵa aga mu va wala na mu haŋ ma wiiɗi tamaiki ɓa: Aga mu siɗi afti na fiyaw gaini emelni ami a ka warni, maini na ki tiliŋ na ɗa nɵa. Mu waya seŋ, mu muɗa: a na ɵa EPIƊ-ƊAI.

⁶ EPIƊ-ƊAI a muɗaŋa: Ku muɗa seŋ hanɗa edi warni fuŋ n'abakai na Yuda, war futi na Yeruzalem paŋ lai, ku muɗa ɓa: Ki tiki hangalki sini miɗi n'aŋ warni bonu hanɗa, ki zi pini lai.

⁷ Daga na mu miliɗisi tamaiki edi war Egipte par ɗa haa girna, yuvai paŋ mu na gidiɗi ɵa, mu yiva aŋ ziɗi zaida ɵa ɓa: Ɵini ma.

⁸ Amma e diri e ɵini ma kai, zigi ɵimaɗi ma kaalai, ɗif paŋ ɗa a za pini hriŋ na wiiɗi agulni na mafuni. Nɵa seŋ n'aŋ warni bonu na mu gidiɗi miɗini buri e zi pini, amma e zi pini kai ɗa, mu vaŋ amai siɗi.

⁹ EPIƊ-ƊAI a muɗa: Kitini seŋ na meefeŋ a na arbaɗi ɗai na Yuda gaiɗi na Yeruzalem.

¹⁰ E wiyi warni meefeŋ na wiiɗi tamaiɗi n'avut, e yimi seŋŋa kai, e tiɓi pini alawai zamai aŋ zi ɵeŋni. Ɗai na Izrayel gaiɗi ɗai na Yuda e ɗûkûli bonuŋa na mu zaŋ gaiɗi tamaiɗi daf.

¹¹ Burini hanɗa, EPIƊ-ƊAI a na muɗa maini nɵa: Aga mu hinasi gir ktai midiɗi, na nagai e kûrɗi edi warni par kai, aga e tûwisi sa, amma aga mu ɵina tuwiɗi kai.

¹² Fuŋ n'abakai na Yuda gaiɗi ɗai na Yeruzalem ɗa aga e hili, e tûwi sini alawai zi rgi n'e ɗa e zini ɓaka gaini wazagai zi ɗûgûdi zi lûgûzi, amma alawai ni ɗa a kiɗa a kûrɗiɗi edi war mefeŋ n'e ɗa war gir ɗa kai.

¹³ Buri ɓa, tuku Yuda ɗa, alawaiku a bunda viya maini fuŋku n'abakai ɵa. Tuku Yeruzalem, ku zizina gûwiŋ zi ɓaka na wiini wala zi siyer viya nɵa lai, a gûwiŋ na ki zi ɓaka na wiini wala zi ɗûgûdi zi lûgûzi miɗini aŋ ɓaka.

¹⁴ Amma tuku Yeremiyas ɗa, ku siiwa buriɗi ɗai hanɗa kai, ku tuwa sa buriɗi kai, ku siiwaŋa buriɗi kaalai, buri ɓa aga mu ɵina hanɗa kai, won hlai n'aga e tûwisi sa war sarti na wiini girɗi ɗa kai.

EPIƊ-ƊAI a bula luwuŋ Olive na wiini ɗa azumai

¹⁵ Marmaya ɗa, te halasi te za zamai amlai warni tempelŋa ɗa a maɗa? Te fuɗa was na ɗa burini hiiniɗi na maafanai, a juva ɓa ɗai ɗa, e milisi neŋ na meefeŋ ɗa ahaku par yaw, buri ɓa, won hlai na ku za meefeŋ li ɗa, firiyuku a va amai a suwa.

¹⁶ Luwuŋ Olive n'a na goɗa, na juv burini alini zi wii, a yiki n'EPIƊ-ƊAI a suŋku ɗa, gaini suura n'abai, aga a ɵa afu pini tini n'a pa hahakai ɗa, aga a nafa kaalai.

¹⁷ A kasi gir muduku na ɗa a EPIƊ-ƊAI zi spak paŋ n'a puku azumai ɗa, burini mefeŋ na ɗai na Izrayel gaiɗi ɗai na Yuda e ziŋ siɗi nagai dama. E ɓilkitiŋa agula, e yi wazagai zi ɗûgûdi zi lûgûzi aŋ ɓaka wiini Baal lai.

Ɗai na Anatot e firiyi sdani Yeremiyas ɗa kai

¹⁸ EPIƊ-ƊAI a zeŋeŋa zeŋ, ta mu sɗaŋ ba, nɵa a siŋkaŋa sdaɗi na maafanai ɗa ta.

¹⁹ Mu na fu maini adime n'a hitra gaiɗi ɗai ta, n'e kiŋ aŋ fiɗi nɵa, mu sɗa ɓa e ɗa kiti miɗi maɗa ɓa: Fuɗumu luwuŋ ɗa azumai gaiɗi alini ɗa, yumuŋmu edi midini afti na wiiɗi ɗai na karɗi par kapai midini ɗif a kɵa gaini yikini kir kai.

²⁰ EPIƊ-ƊAI zi spak paŋ a ɗif n'a ziti sariya war jre, a sɗa wala n'aŋ warni hinini ɗifn gaini n'aŋ warɗi agulni. Hinaŋa mu tala gir na ku ziŋɗi wiiɗi gawŋa ɗa gaini ara buri ɓa, mu hina seŋŋa war tuku.

²¹ Buri hanɗa, EPIƊ-ƊAI a na muɗa siɗi ɗai na Anatot n'e piyi fiɗiku, n'e miɗi lai ɓa: Ku muɗa war wule na wiiɗi ɗai na mini Alaw war yikini EPIƊ-ƊAI kai, ɵa kai aga mu fuɗuku edi ɗa maini hanɗa nɵa.

²² Buri hanɗa EPIƊ-ƊAI zi spak paŋ a na muɗa maini nɵa: Aga mu zilbiɗi miɗi, aliɗi na gawlakai ɗa aga e mri mini gaw, aliɗi na maɵagai gaiɗi na falakai aga e mri mini wiyamai.

²³ Ktai maa aga a hina piɗi kai, aga mu hinasi gir midiɗi ɗai na Anatot war buza n'aga mu zilbiɗi miɗi ɗa.